28 aqpan künı bokstan Qazaqstan ūlttyq qūramasy İordaniiaǧa attanyp, onda Aziia jäne Mūhit jaǧalaulary elderınıŋ lisenziialyq turnirıne qatysady. Naqtyraq aitqanda, 3-11 nauryz aralyǧynda Amman törıne kerılgen ringte Tokio Olimpiadasynyŋ joldamalary sarapqa salynady.
Būl joly Aziia jäne Mūhit jaǧalaulary elderıne 63 lisenziia bölınıptı. Erler arasyndaǧy 52, 57 jäne 63 kelı salmaq därejesınde 1-6 oryndarǧa ie bolǧan boksşylar jazda Olimpiada oiyndaryna barady. Al 69, 71 jäne 81 kelı salmaqtaǧy boksşylar Tokioǧa baru üşın 1-5 oryndarǧa ie bolulary kerek. 91 kelıge deiıngı jäne 91 kelıden joǧary salmaq därejesındegı alyptarǧa 4 joldamadan bölıngen.
Qazaqstan boks federasiiasynyŋ resmi saity mälımdegen aqparatqa süiensek, Ammanda äielderarasyndaǧy 51 kelı salmaq därejesınde Olimpiada oiyndarynyŋ 6 joldamasy sarapqa salynady. Al 57, 60, 69 jäne 75 kelı salmaq därejelerıne tek 4 lisenziiadan bölınıptı.
Endı Qazaqstan ūlttyq qūramasynyŋ bas bapkerı Ǧalymbek Kenjebaev jariialaǧan tızımge köŋıl audaraiyq:
52 kelı: Säken Bibosynov – 2019 älem chempionatynyŋ qola jüldegerı;
57 kelı: Serık Temırjanov – bırqatar halyqaralyq turnirlerdıŋ jeŋımpazy;
63 kelı: Zakir Safiullin – 2019 jylǧy Aziia chempionatynyŋ kümıs jüldegerı;
69 kelı: Abylaihan Jüsıpov – 2017 jäne 2019 jyldardaǧy älem chempionattarynyŋ qola jüldegerı;.
75 kelı: Äbılhan Amanqūl – 2017 älem chempionatynyŋ kümıs jüldegerı, Aziia chempionatynyŋ qola jüldegerı;
81 kelı Bekzat Nūrdäuletov – 2019 jylǧy älem chempiony;
91 kelı: Vasilii Levit – Rio Olimpiadasynyŋ kümıs jüldegerı, älem jäne Aziia chempionattarynyŋ jüldegerı;
+ 91 kelı: Qamşybek Qoŋqabaev – älem jäne Aziia chempionattarynyŋ ekı dürkın kümıs jüldegerı, Qazaqstan qūramasynyŋ kapitany.
Ǧalymbek Kenjebaev öz sözınde İordaniiaǧa baratyn jıgıtterdıŋ bärınıŋ däl qazır öz salmaqtaryndaǧy üzdıkterı ekenderın tılge tiek etken. Ärı bärınıŋ de täjıribesı bar ekenın jäne kez kelgenınıŋ joǧary jetıstıkke qol jetkıze alatyndyǧyn atap ötken. Qazır qūrama sapynda bäsekelestık joǧary ekendıgıne, äleuetterı joǧary jastardyŋ da ösıp kele jatqandyǧyna toqtalyp ötıp, İordaniiaǧa baratyn qūramdy bırneşe ret özgertuge tura kelgendıgın de jasyrmaǧan.
Bas bapker daiyndyq jūmystarynyŋ joǧary deŋgeide ūiymdastyrylyp, jyldar boiy qalyptasqan öz ädıstemelerınen auytqymauǧa tyrysqandaryn türtıp ötıptı. Ärı Kuba, Angliia jäne Germaniia sekıldı elderdıŋ qarymdy boksşylarymen bırge jattyǧyp, bırlesken jiyn ötkızgenderıne de toqtalypty.
Ǧalymbek Kenjebaev söz soŋynda bar salmaqta Olimpiada joldamasyn jeŋıp aludy maqsat tūtatyndaryn, äitse de, kem degende 6 lisenziia oljalap qaitudy josparlap otyrǧandaryn mälımdegen. Mūndai jaǧdaida, mamyr aiynda Parijde ötetın bükılälemdık ırıkteu turnirınde qalǧan joldamalarǧa qol jetkızu közdelıp otyrǧandyǧyn da bükpesız aitqan.
diamondring.kz
Ūqsas jaŋalyqtar
