اتىراۋدا ZERDELI اقىل-وي دامىتۋ مەكتەبى مەن تالانتتاردى انىقتاۋ جانە قولداۋ ورتالىعى 2-5 قاراشا كۇندەرى «التىن ساقا» ماتەماتيكالىق وليمپياداسىنىڭ وبلىستىق كەزەڭىنە دايىندىق ماقساتىندا وقۋ-جاتتىعۋ جيىنىن وتكىزدى، دەپ حابارلايدى "ادىرنا" ۇلتتىق پورتالى دەرەككوزگە سىلتەپ.
«ۇستاز» مەكتەبىندە وتكەن دايىندىققا وبلىس مەكتەپتەرىنىڭ V-VI سىنىپتاردا وقيتىن 62 بالا قاتىستى. جاس ماتەماتيكتەردى دايىنداۋ ءۇشىن نۇر-سۇلتان قالاسى ZERDELI اقىل-وي دامىتۋ مەكتەبىنىڭ ۇستازى ءارىن قايسارۇلى ارنايى كەلدى.
– دارىندى بالالاردى «التىن ساقا» وليمپياداسىنىڭ وبلىستىق كەزەڭىنە دايىنداپ جاتىرمىز. وبلىس بويىنشا جينالعان وقۋشىلارمەن ءبىر اپتالىق جۇمىسىمىز ءساتتى ءوتتى. وقۋ-جاتتىعۋدىڭ سوڭعى كۇنىندە ەرەكشە قابىلەتتى 14 بالاعا وبلىس اكىمىنىڭ ورىنباسارى باقىتگۇل حامەنوۆا العىسحات تابىستادى. بۇل كەزەڭ وقۋشىلار ءۇشىن ۇلكەن مۇمكىندىك دەپ ەسەپتەيمىن. ويتكەنى، بىلىكتى ۇستازدار ءدارىس بەرىپ، وقۋشىلاردى جان-جاقتى دايىنداۋدا. بالالار «ۇستاز» مەكتەبىنىڭ جاتاقحاناسىندا تۇراقتاپ، ۋاقىتتارىن ءتيىمدى وتكىزۋدە، – دەيدى تالانتتاردى انىقتاۋ جانە قولداۋ ورتالىعىنىڭ ديرەكتورى رۋسلان ساربالين.
«التىن ساقا» وليمپياداسى – مەكتەپ وقۋشىلارىنىڭ جوعارى دەڭگەيدەگى وليمپيادالارعا دايىندىعىن جاقسارتۋ جانە ءپان بويىنشا ءبىلىمدى بالالاردى انىقتاۋ، وليمپيادا رەزەرۆىن قالىپتاستىرۋ ماقساتىندا جىل سايىن ءداستۇرلى تۇردە وتكىزىلەدى. بىرنەشە كۇنگە سوزىلعان وليمپياداعا دايىندىق بارىسىندا ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ قولداۋىمەن وقۋشىلار ءتۇرلى پسيحولوگيالىق ترەنينگتەرگە قاتىسىپ، قالانىڭ مادەني وشاقتارىن ارالادى.
جان-ەركە حاليۋللينا،
"ادىرنا" ۇلتتىق پورتالى
