Saıasatty saǵyzsha sozatyn taksıst emespin - Qýanysh ÁLEN

2918
Adyrna.kz Telegram

Biz biletin kólik júrgizýshileriniń barlyǵy jalpaq tilmen aıtqanda "taksıstter"- júzderi qartań kelgen, elýdi eńsergen jandar. Rasymen qaı kezde bolmasyn "taksıge" mingen boıda kóretin "taksıstterimiz" arasynda biraz ómir kórgender kóp. Ony túr turpatynan, júzinen, tipti kólik aıdaýynan, sózinen ajyratý áste qıyn emes. Iá, búgingi taqyrybymyz "taksıstterge" arnalmaq.

Biraq keıipkerimiz elýdi eńsergen jannyń biri emes. Taqyrybymyz jas ta bolsa jasap júrgen jumysyna úsh jyldan asqan Álen Qýanysh týraly bolmaq. Ol 18 jasynda qujatyn alǵan boıda osy jumysqa qyzyǵýshylyqpen aınalysyp bastaǵan.

Kishkentaıynan mehanıka tiline jaqyn bolyp ósken Qýanysh óz mamandyǵyn da kólik salasymen baılanystyrǵan. Qýanysh bıyl 21 jasta. 18 jasqa tolysymen kólik júrgizý kýáligin alǵan ol- aýyl men qala arasyna qatynap, keıin ádetke aınaldyryp ketken. Qazirgi tańda aýyldyń beldi taksıstteriniń biri. Jastaıynan mashınanyń maıtalmany bolyp alǵan janmen "Adyrna" ulttyq portalynyń tilshisi suhbattasyp kórdi:

- Qýanysh myrza, kóp taksıst kókelerimiz zeınet jasynan keıin úıde bos otyrmaıyn dep osy jumysty qolǵa alýshy edi. Siz 18 jasqa tolysymen bastap ketipsiz. Oǵan ne sebep?

- Kishkentaıymnan oıynshyq kóliktermen kóp oınaýshy edim. Sosyn arbalardy mashına qylyp súıredim. Eseıe kele velosıped teýip júrdim. Úlkender úshin bul jaı ǵana eki dóńgelekti jáı zat kóringenimen men úshin "asyl dúnıe" edi. Dóńgelegi jarylyp qalsa, ózim úrip, jóndep alýshy edim. Keıin 14 jasymnan bastap, ákemniń kóligin aıdap úırendim. Maǵan ákem úıretip áýre bolmady. Ózim onyń qımyldaryn qaıtalaı otyryp 1 apta ishinde lezde úırenip aldym. Aýylda turǵannyń paıdaly tusy sol ǵoı. Kermıyq dalada bóget bolar eshteńe joq. Kólikti tizgindep alyp, oıdy qyrdy aralap qyzyqtaýshy edim. Osylaısha kólikti de jóndep úırenip aldym. Jastaıymnan janyma jaqyn, jatsynbaǵan isim bolǵandyqtan súıikti isimdi- shynaıy jumysyma nege aınaldyrmasqa degen oı týyndady. Onyń ústine bitirgen mamandyǵym da "mehanızator" bolǵasyn tipti alystaǵym kelmedi. Osylaısha 18 jasymda-aq "taksıst" bolyp shyǵa keldim. Oǵan da bıyl 3 jyl tolady eken.

- Sizge aýyl men qala arasyna qatynaý qanshalyqty tıimdi? Aıyna qansha teńge tabasyz?

- Bul jumystyń maǵan berer "raqaty" kóp-aq. Eger, aýyl men qala arasyna qatynaý tıimdi bolmasa, bul jumysty áýelde toqtatqan bolar edim. Jalpy bir adamǵa 1500tg-den alamyn. Sonda aıyna kemi 180 000- teńgeden tómen túspeıdi. Keıde bir kúnde eki ret adamdardy tasıtyn kezder de bolyp turady. Ásirese, jaz aılary tynymsyz qalaǵa aǵylatyn adamdyrdyń sany kóp.
Buryn stýdent kezimde qala ishinde "taksıst" bolýshy edim. Qazir úılendim. Sondyqtan aýyl men qala arasyna adam tasý men úshin eń qolaıly, tıimdi jumystyń kózi. Bir jaqsysy munda saǵan eshkim basshylyq etpeıdi. Qalaǵan ýaqytyńda qalaýyńsha jumysty jasaı alasyń. Men úshin qazirgi ýaqytta budan asqan baqyt joq.

- Jolda kóp júremin dep qaldyńyz. Uzaq ýaqyt boıy tapjylmaı rólde otyrýdan sharshap ketetin kezińiz bola ma?

- Buryn ár balanyń sanasynda "men ǵaryshker bolam" degen qııal bolýshy edi ǵoı. Sol arman meniń de balań júregimde bolǵan edi. Qazir kólikke minip, tulparymmen júıtkigen kezde aspanda qalyqtap ushqandaı sezimge bólenem. Sondyqtan kólikte tapjylmaı otyrý jalyqtyrady dep aıta almaımyn. Áıtkenmen, kúni boıyn kólikte otyrǵannan sharshaıtynym ras. Biraq úıdegi tátti qyzymnyń júzin kórip, bir ıiskegennen maýqym basylyp, sharshaǵanym lezde basylady. Odan qalsa jolda adamdarmen tildesip, jol qysqartatynym taǵy bar.

- Iá, sol jaıynda aıtyp ótińizshi. Mingen jolaýshylarmen qandaı taqyrypta áńgimelesesizder? Qandaı da bir qyzyq jaılar ótken be edi?

- Men aýyldaǵy eń jas "taksıst" bolǵandyqtan mingen jolaýshylarmen onsha áńgimelespeıtinmin. Qazir ýaqyt óte kele qalaı áńgimege tartyp alatynymdy bilmeı de qaldym. Bul osy jumysymnyń arqasy dep bilemin. Sebebi, adam tilin taýyp, birden áńgimege aınaldyrý da ońaı jumys dep oılamaımyn. Saǵan bir qyzyq jaıdy aıtyp bereıin. Qala ishinde qatynap, jumys jasap júrgen kezim. Qazir taksıstterge de adam tabý ońaı ǵoı.

Túrli telefonnyń tilimen adamdar ózderi habarlama qaldyrady. Sóıtip, nesin sozaıyn bir jas jigit habarlama berdi. Ózim de sol aınalada júrgen edim, ala keteıin degen oımen qabyldadym. Sóıtip, ol kisi bir meıramhanadan mindi. Ol kezde áıelimmen áli otbasyn qurmadyq. Qyz ben jigit bop júrgen kezimiz.

Maǵan óz otbasynyń sýretin kórsetip, tanystyrǵan bolatyn. Biraq áli onyń týystarymen júzbe-júz kezdespegen edik. Áıelimmen ol adamnyń ne qatysy bar deısiń ǵoı? Sóıtip júzine qarap qalsam, baǵanaǵy er adam qyzymnyń týǵan jezdesi bolyp shyǵa kelmesi bar ma? Men sol jerde qyzaryp, uıalyp baram. Men ony tanımyn.

Ol meni áli tanymaıdy bir jaqsysy. Sosyn naqty sol kisi ekendigine kóz jetkizý úshin jumysyn surap, áńgime arasynda otbasyn, jónin suraǵam. Dál ózi bolyp shyqty. Mejelegen jerge jetkennen keıin, kelisken aqshany berip jatyr. Men sol jerde ne alarymdy bilmeı, ne almasymdy biraz degbirip qaldym. Almasam taǵy túsinbeı qalar dep, amalsyz jol aqysyn aldym. Mine, sondaı qyzyqtar kóp bolǵan edi.

Keıin tanysqanda ol meniń, men onyń betine qarap biraz kúlip alǵanymyz bar. Negizi qyzyq jaılar óte kóp. Qaısy biri esimde qaldy deısiń? Keıde qalaǵa jetýge sál qalǵanda "oıbaı úıde zatymdy umyttym, keri qaıttyq" ,- deıtin apalar bolady. Joq, deseń aýylda senen asqan jaman adam joq bolyp shyǵa keledi. Sosyn amalsyz keri baratyn kezder de oryn alyp turady. Dál sol ýaqytta ashýǵa býlyqqanymmen qazir eske alsam, eriksiz kúlgim keledi.

Sosyn, men saıasatty saǵyzsha sozyp aıtatyn "taksıstterdiń" qatarynan bolǵym kelmeıdi. Áńgimeniń basqa da kórkem túrleri kóp qoı. Sondyqtan meıilinshe jolaýshylarmen kóńildi sóılesip, áńgimege tartamyn. Báribir kóligime áıel adamdardan góri er adamdardyń mingenin qalap turamyn. Sebebi, apaılar jaǵy kóbine uıyqtaıdy. Er adammen bolsa, qaı jaǵynan bolmasyn áńgimeniń aýany jaqsy bolady.

- Óte áserli áńgime boldy. Jas ta bolsa biraz ómirdi, biraz qyzyqty bastan ótkeripsiz. Jolyńyz qashan da ashyq bolsyn! Astyńyzdaǵy tulparyńyz júıtkı bersin, jolaýshylaryńyz kóp bolǵaı!

"Adyrna" ulttyq portaly

Pikirler