ءبىز بىلەتىن كولىك جۇرگىزۋشىلەرىنىڭ بارلىعى جالپاق تىلمەن ايتقاندا "تاكسيستتەر"- جۇزدەرى قارتاڭ كەلگەن، ەلۋدى ەڭسەرگەن جاندار. راسىمەن قاي كەزدە بولماسىن "تاكسيگە" مىنگەن بويدا كورەتىن "تاكسيستتەرىمىز" اراسىندا ءبىراز ءومىر كورگەندەر كوپ. ونى ءتۇر تۇرپاتىنان، جۇزىنەن، ءتىپتى كولىك ايداۋىنان، سوزىنەن اجىراتۋ استە قيىن ەمەس. ءيا، بۇگىنگى تاقىرىبىمىز "تاكسيستتەرگە" ارنالماق.
بىراق كەيىپكەرىمىز ەلۋدى ەڭسەرگەن جاننىڭ ءبىرى ەمەس. تاقىرىبىمىز جاس تا بولسا جاساپ جۇرگەن جۇمىسىنا ءۇش جىلدان اسقان الەن قۋانىش تۋرالى بولماق. ول 18 جاسىندا قۇجاتىن العان بويدا وسى جۇمىسقا قىزىعۋشىلىقپەن اينالىسىپ باستاعان.
كىشكەنتايىنان مەحانيكا تىلىنە جاقىن بولىپ وسكەن قۋانىش ءوز ماماندىعىن دا كولىك سالاسىمەن بايلانىستىرعان. قۋانىش بيىل 21 جاستا. 18 جاسقا تولىسىمەن كولىك جۇرگىزۋ كۋالىگىن العان ول- اۋىل مەن قالا اراسىنا قاتىناپ، كەيىن ادەتكە اينالدىرىپ كەتكەن. قازىرگى تاڭدا اۋىلدىڭ بەلدى تاكسيستتەرىنىڭ ءبىرى. جاستايىنان ماشينانىڭ مايتالمانى بولىپ العان جانمەن "ادىرنا" ۇلتتىق پورتالىنىڭ ءتىلشىسى سۇحباتتاسىپ كوردى:
- قۋانىش مىرزا، كوپ تاكسيست كوكەلەرىمىز زەينەت جاسىنان كەيىن ۇيدە بوس وتىرمايىن دەپ وسى جۇمىستى قولعا الۋشى ەدى. ءسىز 18 جاسقا تولىسىمەن باستاپ كەتىپسىز. وعان نە سەبەپ؟
- كىشكەنتايىمنان ويىنشىق كولىكتەرمەن كوپ ويناۋشى ەدىم. سوسىن اربالاردى ماشينا قىلىپ سۇيرەدىم. ەسەيە كەلە ۆەلوسيپەد تەۋىپ ءجۇردىم. ۇلكەندەر ءۇشىن بۇل جاي عانا ەكى دوڭگەلەكتى ءجاي زات كورىنگەنىمەن مەن ءۇشىن "اسىل دۇنيە" ەدى. دوڭگەلەگى جارىلىپ قالسا، ءوزىم ءۇرىپ، جوندەپ الۋشى ەدىم. كەيىن 14 جاسىمنان باستاپ، اكەمنىڭ كولىگىن ايداپ ۇيرەندىم. ماعان اكەم ۇيرەتىپ اۋرە بولمادى. ءوزىم ونىڭ قيمىلدارىن قايتالاي وتىرىپ 1 اپتا ىشىندە لەزدە ۇيرەنىپ الدىم. اۋىلدا تۇرعاننىڭ پايدالى تۇسى سول عوي. كەرميىق دالادا بوگەت بولار ەشتەڭە جوق. كولىكتى تىزگىندەپ الىپ، ويدى قىردى ارالاپ قىزىقتاۋشى ەدىم. وسىلايشا كولىكتى دە جوندەپ ۇيرەنىپ الدىم. جاستايىمنان جانىما جاقىن، جاتسىنباعان ءىسىم بولعاندىقتان سۇيىكتى ءىسىمدى- شىنايى جۇمىسىما نەگە اينالدىرماسقا دەگەن وي تۋىندادى. ونىڭ ۇستىنە بىتىرگەن ماماندىعىم دا "مەحانيزاتور" بولعاسىن ءتىپتى الىستاعىم كەلمەدى. وسىلايشا 18 جاسىمدا-اق "تاكسيست" بولىپ شىعا كەلدىم. وعان دا بيىل 3 جىل تولادى ەكەن.
- سىزگە اۋىل مەن قالا اراسىنا قاتىناۋ قانشالىقتى ءتيىمدى؟ ايىنا قانشا تەڭگە تاباسىز؟
- بۇل جۇمىستىڭ ماعان بەرەر "راقاتى" كوپ-اق. ەگەر، اۋىل مەن قالا اراسىنا قاتىناۋ ءتيىمدى بولماسا، بۇل جۇمىستى اۋەلدە توقتاتقان بولار ەدىم. جالپى ءبىر ادامعا 1500تگ-دەن الامىن. سوندا ايىنا كەمى 180 000- تەڭگەدەن تومەن تۇسپەيدى. كەيدە ءبىر كۇندە ەكى رەت ادامداردى تاسيتىن كەزدەر دە بولىپ تۇرادى. اسىرەسە، جاز ايلارى تىنىمسىز قالاعا اعىلاتىن ادامدىردىڭ سانى كوپ.
بۇرىن ستۋدەنت كەزىمدە قالا ىشىندە "تاكسيست" بولۋشى ەدىم. قازىر ۇيلەندىم. سوندىقتان اۋىل مەن قالا اراسىنا ادام تاسۋ مەن ءۇشىن ەڭ قولايلى، ءتيىمدى جۇمىستىڭ كوزى. ءبىر جاقسىسى مۇندا ساعان ەشكىم باسشىلىق ەتپەيدى. قالاعان ۋاقىتىڭدا قالاۋىڭشا جۇمىستى جاساي الاسىڭ. مەن ءۇشىن قازىرگى ۋاقىتتا بۇدان اسقان باقىت جوق.
- جولدا كوپ جۇرەمىن دەپ قالدىڭىز. ۇزاق ۋاقىت بويى تاپجىلماي رولدە وتىرۋدان شارشاپ كەتەتىن كەزىڭىز بولا ما؟
- بۇرىن ءار بالانىڭ ساناسىندا "مەن عارىشكەر بولام" دەگەن قيال بولۋشى ەدى عوي. سول ارمان مەنىڭ دە بالاڭ جۇرەگىمدە بولعان ەدى. قازىر كولىككە ءمىنىپ، تۇلپارىممەن جۇيتكىگەن كەزدە اسپاندا قالىقتاپ ۇشقانداي سەزىمگە بولەنەم. سوندىقتان كولىكتە تاپجىلماي وتىرۋ جالىقتىرادى دەپ ايتا المايمىن. ايتكەنمەن، كۇنى بويىن كولىكتە وتىرعاننان شارشايتىنىم راس. بىراق ۇيدەگى ءتاتتى قىزىمنىڭ ءجۇزىن كورىپ، ءبىر يىسكەگەننەن ماۋقىم باسىلىپ، شارشاعانىم لەزدە باسىلادى. ودان قالسا جولدا ادامدارمەن تىلدەسىپ، جول قىسقارتاتىنىم تاعى بار.
- ءيا، سول جايىندا ايتىپ ءوتىڭىزشى. مىنگەن جولاۋشىلارمەن قانداي تاقىرىپتا اڭگىمەلەسەسىزدەر؟ قانداي دا ءبىر قىزىق جايلار وتكەن بە ەدى؟
- مەن اۋىلداعى ەڭ جاس "تاكسيست" بولعاندىقتان مىنگەن جولاۋشىلارمەن ونشا اڭگىمەلەسپەيتىنمىن. قازىر ۋاقىت وتە كەلە قالاي اڭگىمەگە تارتىپ الاتىنىمدى بىلمەي دە قالدىم. بۇل وسى جۇمىسىمنىڭ ارقاسى دەپ بىلەمىن. سەبەبى، ادام ءتىلىن تاۋىپ، بىردەن اڭگىمەگە اينالدىرۋ دا وڭاي جۇمىس دەپ ويلامايمىن. ساعان ءبىر قىزىق جايدى ايتىپ بەرەيىن. قالا ىشىندە قاتىناپ، جۇمىس جاساپ جۇرگەن كەزىم. قازىر تاكسيستتەرگە دە ادام تابۋ وڭاي عوي.
ءتۇرلى تەلەفوننىڭ تىلىمەن ادامدار وزدەرى حابارلاما قالدىرادى. ءسويتىپ، نەسىن سوزايىن ءبىر جاس جىگىت حابارلاما بەردى. ءوزىم دە سول اينالادا جۇرگەن ەدىم، الا كەتەيىن دەگەن ويمەن قابىلدادىم. ءسويتىپ، ول كىسى ءبىر مەيرامحانادان ءمىندى. ول كەزدە ايەلىممەن ءالى وتباسىن قۇرمادىق. قىز بەن جىگىت بوپ جۇرگەن كەزىمىز.
ماعان ءوز وتباسىنىڭ سۋرەتىن كورسەتىپ، تانىستىرعان بولاتىن. بىراق ءالى ونىڭ تۋىستارىمەن جۇزبە-ءجۇز كەزدەسپەگەن ەدىك. ايەلىممەن ول ادامنىڭ نە قاتىسى بار دەيسىڭ عوي؟ ءسويتىپ جۇزىنە قاراپ قالسام، باعاناعى ەر ادام قىزىمنىڭ تۋعان جەزدەسى بولىپ شىعا كەلمەسى بار ما؟ مەن سول جەردە قىزارىپ، ۇيالىپ بارام. مەن ونى تانيمىن.
ول مەنى ءالى تانىمايدى ءبىر جاقسىسى. سوسىن ناقتى سول كىسى ەكەندىگىنە كوز جەتكىزۋ ءۇشىن جۇمىسىن سۇراپ، اڭگىمە اراسىندا وتباسىن، ءجونىن سۇراعام. ءدال ءوزى بولىپ شىقتى. مەجەلەگەن جەرگە جەتكەننەن كەيىن، كەلىسكەن اقشانى بەرىپ جاتىر. مەن سول جەردە نە الارىمدى بىلمەي، نە الماسىمدى ءبىراز دەگبىرىپ قالدىم. الماسام تاعى تۇسىنبەي قالار دەپ، امالسىز جول اقىسىن الدىم. مىنە، سونداي قىزىقتار كوپ بولعان ەدى.
كەيىن تانىسقاندا ول مەنىڭ، مەن ونىڭ بەتىنە قاراپ ءبىراز كۇلىپ العانىمىز بار. نەگىزى قىزىق جايلار وتە كوپ. قايسى ءبىرى ەسىمدە قالدى دەيسىڭ؟ كەيدە قالاعا جەتۋگە ءسال قالعاندا "ويباي ۇيدە زاتىمدى ۇمىتتىم، كەرى قايتتىق" ،- دەيتىن اپالار بولادى. جوق، دەسەڭ اۋىلدا سەنەن اسقان جامان ادام جوق بولىپ شىعا كەلەدى. سوسىن امالسىز كەرى باراتىن كەزدەر دە ورىن الىپ تۇرادى. ءدال سول ۋاقىتتا اشۋعا بۋلىققانىممەن قازىر ەسكە السام، ەرىكسىز كۇلگىم كەلەدى.
سوسىن، مەن ساياساتتى ساعىزشا سوزىپ ايتاتىن "تاكسيستتەردىڭ" قاتارىنان بولعىم كەلمەيدى. اڭگىمەنىڭ باسقا دا كوركەم تۇرلەرى كوپ قوي. سوندىقتان مەيىلىنشە جولاۋشىلارمەن كوڭىلدى سويلەسىپ، اڭگىمەگە تارتامىن. ءبارىبىر كولىگىمە ايەل ادامداردان گورى ەر ادامداردىڭ مىنگەنىن قالاپ تۇرامىن. سەبەبى، اپايلار جاعى كوبىنە ۇيىقتايدى. ەر اداممەن بولسا، قاي جاعىنان بولماسىن اڭگىمەنىڭ اۋانى جاقسى بولادى.
- وتە اسەرلى اڭگىمە بولدى. جاس تا بولسا ءبىراز ءومىردى، ءبىراز قىزىقتى باستان وتكەرىپسىز. جولىڭىز قاشان دا اشىق بولسىن! استىڭىزداعى تۇلپارىڭىز جۇيتكي بەرسىن، جولاۋشىلارىڭىز كوپ بولعاي!
"ادىرنا" ۇلتتىق پورتالى
