1995 jyly Elimizdiń Tuńǵysh Prezdenti – Elbasy N. Nazarbaevtyń bastamasymen qurylǵan Qazaqstan halqy Assambleıasy osy ýaqytqa deıin etnosaralyq kelisimniń qazaqstandyq modelin qalyptastyrý jolynda eseli eńbek etip keledi. 28 sáýirde elordamyz Nur-Sultan qalasynda Qazaqstannyń Tuńǵysh Prezıdenti – Elbasy, QHA Tóraǵasy Nursultan Ábishuly Nazarbaevtyń tóraǵalyǵymen «Birliktiń, tatýlyq pen kelisimniń 30 jyly» taqyrybyna arnalǵan Qazaqstan halqy Assambleıasynyń kezekti sessııasy onlaın formatta bolyp ótkendigi barshaǵa málim. QHA qyzmetiniń qorytyndysyn shyǵaryp, onyń Qazaqstan Respýblıkasy Táýelsizdiginiń 30 jyldyǵy aıasynda memleketimizdiń saıası jáne áleýmettik-ekonomıkalyq negizderin qalyptastyrý men nyǵaıtýǵa qosqan úlesin atap ótetindikten, onyń tarıhı mańyzy zor.
Elimizdiń basty qorǵaýshysy, kúshi sanalatyn qoǵamdyq kelisim men etnosaralyq úılesimdi saqtaý - elimizdiń aldynda turǵan basty mindet. Assambleıanyń basty mindeti – memlekettik ulttyq saıasatty iske asyrý, Qazaqstandaǵy qoǵamdyq-saıası turaqtylyqty qamtamasyz etý, memlekettik jáne azamattyq qoǵam ınstıtýttarynyń etnosaralyq qatynastar salasyndaǵy ózara is-qımylynyń tıimdiligin arttyrý.
Táýelsizdik alǵan jyldary Qazaqstandy úsh mıllıonǵa jýyq adam tastap ketip, el halqy 14 mıllıonǵa deıin azaıǵanyn, búginde Qazaqstan halqy 19 mıllıonǵa jaqyndap qalǵanyn atap ótken Elbasy 2025 jylǵa qaraı el halqynyń sany 20 mıllıonǵa jetýi kerek degen mindet qoıǵandyǵyn, óz oıynsha, bul shekten asatyndyǵymyzdy basa aıtty.
Assambleıa sessııasynda Qazaqstannyń Tuńǵysh Prezıdenti til máselesine toqtalyp, halyqty biriktiretin taǵy bir qundylyq til ekenine nazar aýdartyp, elimizdegi etnostardyń mádenıetin, tilin damytý úshin qajetti barlyq jaǵdaı jasalǵanyn atap ótti. Elbasy birqatar jastyń Assambleıanyń arqasynda ómirge jańa joldama alǵanyn aıtyp, olardyń memlekettik tildi úırenýine dál osy Assambleıa sebep bolǵanyn jetkizdi.
Qazaqstan halqynyń bir shańyraqtyń astyndaǵy yntymaqtastyǵyna álem súısinedi. Barlyq ult bir-birimen teń dárejede bilim alyp, qarym-qatynas jasaı alady, eńbek etedi. Adamdardyń bereke-birligi, yntymaǵy, syılasymdylyǵyn bir-birine jasaǵan qamqorlyǵynan, tatýlyǵynan baıqaýǵa bolady.
Qaı elde bolmasyn ómir súrip jatqan árbir etnos ókilderiniń rýhanı jáne mádenı ómirinde beıbitshilik pen kelisim jáne jasampaz eńbek bolýy qajet ekendigi belgili. Bizder de Qapshaǵaı qalasyndaǵy túrli ult ókilderimen birge elimizdiń damý jolynda eńbek etip, berekeli turmys keship kelimiz. Etnos ókilderi qalanyń áleýmettik-mádenı damýyna eleýli úles qosyp keledi. Osynyń barlyǵyna tek yntymaq pen birliktiń arqasynda qol jetkizip otyrǵandyǵymyz sózsiz.
Dámetken NÚSIPBEKOVA,
Qapshaǵaı qalalyq
Analar keńesiniń tóraıymy
