Almaty oblysynyŋ äkımı Marat Sūltanǧaziev Ortalyq kommunikasiialar qyzmetındegı brifingte öŋırdıŋ strategiialyq damuynyŋ negızgı baǧyttaryn qorytyndylap, nazardy Qonaev pen Alatau qalalaryna audardy.
Äkımnıŋ aituynşa, Qonaev qalasynda tūrǧyndardyŋ ömır süru sapasyn arttyru maqsatynda «Smart Qonaev» tūjyrymdamasy engızılgen. Qalada qoǧamdyq beinebaqylau kameralary, iQonaev elektrondyq jüiesı, jolaqy töleu jüiesı jäne Bırıŋǧai tölem qūjaty ıske asyrylǧan.
İnfraqūrylymdy jaŋartu aiasynda Qonaevta 39 şaqyrym jol jöndelıp, 50 jaŋa aialdama ornatyldy, 73 şaqyrym elektr beru jelısı jäne 26 şaqyrym su qūbyry tartyldy, 11 transformator jaŋartyldy. Sonymen qatar qaladaǧy 65 nysan abattandyrylǧan. №5 qalalyq jaǧajai «Üzdık jaǧajai» konkursyna qatysqan 30 qatysuşynyŋ ışınen Burabaidan keiın 2-oryndy iemdendı.
Al Alatau qalasy 88 myŋ gektar aumaqty qamtityn jäne 54,2 myŋ tūrǧynǧa qyzmet körsetetın derbes äkımşılık-aumaqtyq bırlıkke ainaldy. Ükımet qalanyŋ 2050 jylǧa deiıngı Bas josparyn bekıtıp, 12 negızgı ösu nüktesın anyqtaǧan. Memleket basşysy Qasym-Jomart Toqaevtyŋ bastamasymen Alatau qalasyna arnaiy märtebe berılu öŋırdı jaŋa, qarqyndy damu kezeŋıne şyǧardy.
Būl maqsatta Alatau qalasyn damytu jönındegı Premer-ministrdıŋ orynbasary Qanat Bozymbaevtyŋ töraǧalyǧymen jobalyq keŋse qūrylyp, nätijelı jūmys jürgızıldı. Odan ärı Prezident Jarlyǧyna säikes, qalany damytu jönındegı Keŋes jasaqtaldy, ony Premer-ministr basqarady. Qazır Konstitusiialyq zaŋ daiyndalyp, jyl soŋyna deiın Parlamentke engızu josparlanyp otyr.
İnvestisiialyq baǧyt boiynşa Alatau qalasynda jalpy qūny 1,5 trln teŋge bolatyn 42 joba ıske asyryldy. Olardyŋ qatarynda PepsiCo, Mars, «Molochnaia dolina», QazQon Hub taǧy basqalary bar.
Sūltanǧazievtıŋ aituynşa, Almaty oblysynyŋ äleumettık, ekonomikalyq damuy aiqyn nätijelerge jetıp otyr. Är sala boiynşa jüielı jūmys jürgızılıp, tüiındı mäseleler kezeŋ-kezeŋmen şeşılıp jatyr.
Almaty oblysynda Niu-Iork kinoakademiiasynyŋ filialy men «Atletiko Madrid» futbol akademiiasy aşyldy
