Almaty oblysynyŋ äkımı Marat Sūltanǧaziev Ortalyq kommunikasiialar qyzmetındegı brifingte bılım, densaulyq saqtau jäne mädeniet salalarynda atqarylǧan jūmystar turaly mälımet berdı.
Äkımnıŋ aituynşa, 2022 jyldan berı 45 jaŋa mektep jäne 6 japsarjai salyndy, sondai-aq 55 mektep kürdelı jöndeuden öttı. Onyŋ 11-ı investorlar esebınen, al 20-y «Keleşek mektepterı» jobasy aiasynda salynǧan.
Jyl soŋyna deiın taǧy alty mektep aşu josparlanyp otyr.
Bılım nysandarynyŋ köbeiuı üş auysymda oqytatyn mektepter sanyn aitarlyqtai qysqartqan. Mektep infraqūrylymyn keŋeitu nätijesınde keiıngı üş jylda üş auysymda bılım beretın mektepterdıŋ sany 52-den 28-ge deiın qysqardy.
«Osy oraida qalǧan 28 mekteptı bır mezgılde bastap salu üşın otandyq jäne şeteldık investorlady EPC mehanizmı boiynşa kelıssözderge şaqyramyn», - dedı Sūltanǧaziev.
Öŋır äkımı densaulyq saqtau jäne mädeniet infraqūrylymynyŋ da damyp jatqanyn atap öttı.
Oblysta 356 medisinalyq nysan bar, olardyŋ 54%-y tozǧan. 2022-2025 jyldar aralyǧynda 55 nysanǧa qūrylys jūmysy jürgızıldı. 6 mlrd teŋgege 153 bırlık medisinalyq jabdyq satyp alyndy. Mäselen, 300 şaqyrym qaşyqtyqta ornalasqan Narynqol auylynyŋ tūrǧyndary Almatyǧa nemese oblys ortalyǧyna kelmesten tolyq medisinalyq qyzmet ala alady.
Sonymen qatar 7 mädeniet üiı, 6 sport keşenı, memlekettık arhiv jäne öner mektebı salyndy.
