Taldyqorǵan qalasyndaǵy Nazarbaev Zııatkerlik mektebiniń 12-synyp oqýshysy Sezim Ertanatov Garvard ýnıversıtetinen shaqyrtý aldy.
Jas jetkinshektiń bilim alýdaǵy jetistikteri, qatarlastary arasynan daralaıtyn kóshbasshylyq qasıetteri, úlken jumys qabilettiligi Sezimge óz josparyn júzege asyrýǵa múmkindik berdi. Óıtkeni, AQSh-taǵy eń tanymal ýnıversıtetterdiń birine túsý - bul kezdeısoqtyq emes, qajyrly eńbek pen tynbaı izdenýdiń nátıjesi.
Garvard oqý orny- joǵary bilim berý standarttarymen tanymal amerıkandyq, elıtalyq ýnıversıtetterdiń biri.
Sezim Garvardtyń kompıýterlik ǵylymdar bóliminde bakalavrıatqa túsýdi josparlap otyr. Onyń sózinshe elimizde sandyq tehnologııany damytý áli de kesheýildep jatyr. Jetkinshek óz bilimin jetildirý arqyly otandyq IT salany ilgeriletýdi kózdeıdi.
- Meni árqashan aqparattyq tehnologııalar teorııalyq jáne matematıkalyq turǵydan qalaı jumys jasaıtyny qyzyqtyrady. Qazirgi ýaqytta men Java, C ++, PHP sııaqty baǵdarlamalaý tilin úırendim. Men sondaı-aq túrli veb-saıttardy jasaǵandy, derekti fılmder túsirgendi jáne redakııalaǵandy unatamyn, - deıdi Garvardtyń bolashaq stýdenti.
Sezimge dáris berip júrgen matematıka pániniń muǵalimi Zýhra Nýrlyhanovnanyń aıtýynsha, jas jetkinshektiń bolashaqta tabysty maman bolýǵa barlyq múmkindigi bar. Ol óz betinshe oqýǵa qabiletti, belgili bir máseleler men suraqtardy sheshýdiń ártúrli nusqalaryn meńgergen. Maqsattylyq pen sanaly basymdylyq - onyń eń myqty qasıetteri.
Onyń tapqyrlyǵy tek matematıka sabaǵynda ǵana emes, jalpy mekteptiń ózin-ózi basqarý «Kóshbasshylyq» salasynda da aıqyn kórindi. Mektep qabyrǵasynda Sezim birqatar eriktiler qozǵalysyn uıymdastyrdy, kásiptik baǵdarlaý komıtetin ashty jáne BUU modeli oıyny boıynsha qalalyq konferenııa uıymdastyrdy. Sonymen birge ol ınformatıka jáne qazaq tili pánderinen «Jas ǵalym», «Daraboz» atty halyqaralyq, respýblıkalyq olımpıadalarynyń júldegeri jáne jeńimpazy atandy.
- Sezim, meniń oıymsha, respýblıkanyń kóptegen mektep oqýshylary úshin óziniń tabandylyǵy men naqty josparlaý qabiletiniń arqasynda álemdegi eń úzdik ýnıversıtetke túse alǵan adamnyń úlgisi boldy. Taldyqorǵan qalasyndaǵy Nazarbaev Zııatkerlik mektebiniń tarıhynda Sezim - Garvardqa shaqyrylǵan ekinshi oqýshymyz», - deıdi dırektordyń oqý isi jónindegi orynbasary Eralı Bıjanov.
