Qashan da qoǵamǵa ashyq bolyp, halyqqa jaqyn bola bilgen bilikti top-menedjer Ashat Aımaǵambetov búgin Oqý-aǵartý mınıstri qyzmetinen bosatyldy. Eshkim kútpegen tosyn habardy estigen halqymyz mınıstrdi qımaıtyndaryn jetkizdi, dep jazady "Adyrna" ulttyq portaly.
Qoǵam qaıratkeri Murat Ábenov Aımaǵambetov jaıly "Elge jasaǵan qyzmetińizge myń alǵys" degen jazba jarııalap, halyqtyń senimine ıe bolǵan mınıstrge rızashylyǵyn bildirdi.
"Memlekettik qyzmetshiniń jumysyn ádil baǵalaıtyn tek halyq. Ashat Aımaǵambetovtaı bilim salasyna jaqsy ózgerister ákelgen mınıstrdi ataý qıyn aý. Jarty mıllıonnan astam bilim salasynyń qyzmetshileriniń basym kópshiligi bul pikirge tolyq qosylady dep senemin. Árıne Mınıstirliktiń basshylyǵynan ketkeni ókinishti. Biraq azamattyń abyroıy qyzmet dárejesimen emes, halyqtyń senimimen, tulǵa retinde abyroıy men jınaǵan bedelimen ólshenedi. Jumys oryn áli talaı ret ózgerýi múmkin, biraq ondaı kezde shyn qurmetteıtin qarapaıym adamdardyń senimi ózgere qoımaıdy. Men Ashat Aımaǵambetov áli de Qazaq eli úshin aıanbaı qyzmet jasaıtynyna jáne aldaǵy kezeńde talaı jetistikke jetetinine senemin! Abyroı bedelińiz arta bersin!", - dep jazdy Murat Ábenov.
Aqmaral Shatemirqyzy esimdi ustaz mınıstrdiń osy ýaqyt aralyǵynda bilim salasynda qol jetkizgen jetistikterine toqtalyp, muǵalimderdiń atynan alǵysyn bildirdi.
"Bilim salasyna jan-tánimen berile qyzmet etken: qazaq tiliniń mártebesin kóterýge kúsh salǵan,ulttyq álippemizdi qaıtarǵan, dıplom satýmen aınalysqan joǵary oqý oryndaryn jaýyp, talaı jemqorlyqtyń aldyn alǵan, aýyldyq jerlerdegi oqýshylardy avtobýstarmen qamtyǵan, "Oqýǵa qushtar mektep" jobasymen oqýshylardyń nazaryn kompıýterden kitap oqýǵa aýdarǵan, muǵalimderdi qaǵazbastylyqtan aryltqan, el ishinde muǵalimge degen qurmet artty, 5 kúndik jumys engizip, muǵalimderdiń el qatarly demalýyna múmkindik bergen, bastaýysh synyptardy tamaqtanýmen qamtamasyz etýge yqpal etken, oqýshylardyń da, muǵalimderdiń de únderin estı bilgen, árdaıym halyqtyń ortasynan tabylǵan mınıstrimiz Ashat Aımaǵambetov. Ashat Qanatuly myrza, qaı salada júrseńiz de aman bolyńyz. Eńbegińiz eren. Sizdeı bilimdi, ójet azamattar halyqqa qyzmet etýdi toqtatpaýy kerek. Muǵalimderdiń sizge degen alǵysy sheksiz. Siz halyqqa kereksiz", -dep jazdy ustaz.
Májilis depýtaty Juldyz Súleımenova Aımaǵambetovtyń bilim salasynda júzege asyrǵan tyń bastamalaryna toqtalyp ótti.
"Ashat Qanatuly bolashaǵynan úlken úmit kúttiretin tájirıbeli saıasatker. Bilim jáne ǵylym salasyn, keıin oqý-aǵartý mınıstrligin damytýda belsendi úles qosty. Memleket Basshysynyń bilim salasyn damytýǵa baǵyttalǵan tapsyrmalaryn sapaly júzege asyrýǵa den qoıdy. Zamanǵa saı salany jetildirýge kúsh saldy. Bergen ýádesine berik boldy. 2 mysal keltireıin: pedagogıkalyq ótili 30 jyldan asqan ustazdardy ulttyq biliktilik testinen bosatý týraly jáne byltyr, «Altyn belgi» ıegerlerin Nazarbaev Zııatkerlik mektepterinde 1 pánnen emtıhan tapsyrýyn ótkizbeý týraly depýtattyq korpýstyń usynystaryn qabyldady, oryndady, halyqtyń alǵysyna bólendi. Halyqaralyq pándik olımpıada júldegerlerine jáne osy júldegerlerdi daıyndaıtyn, súımeldeıtin halyqaralyq pándik olımpıada trenerlerine syıaqy júldeqoryn Zańmen bekitilýine úles qosty. Bilim mazmunyndaǵy 2013-2015 jyldary ketken qatelikterdiń ornyn toltyrýǵa baılanysty aıtar bolsam, 2015 jyldan beri 1-synypta oqýshylar 3-tilde oqyp keldi. Qoǵamdastyq arasynda, ata-analar arasynda kóp suraqtardy týdyrdy. Sony eskere otyryp, Qazaqstan Respýblıkasy Oqý-aǵartý mınıstrligi balanyń jas erekshiligine baılanysty tildi oqytý metodıkasyna sáıkes, bıyl 2022-2023 oqý jylynda Áripti tanyp, bilgenge deıin tek ana tilinde Álippeni úırenýi qajet dep ózgerister engizdi. Negizi 2019 jyldan beri nátıjeli jumystary óte kóp. Birazyn halyqtyń ózi de aıtyp jatyr. Ashat Qanatuly, saıasat sahnasyna jas saıasatker retinde qadam basyp, búginde salmaqty tulǵa, iri reformator, rýhanı batyl qaıratker retinde ózin qoǵamdastyqqa moıyndatty dep oılaımyn. Ashat Qanatuly bizdiń zamandasymyz. Qaı kezeńde de belgili bir urpaq pen býynnyń mańdaıyna tarıh hám ult aldyndaǵy ózindik oryndaıtyn mıssııasy bolady. Sol jolda Ashat Qanatulyna jańa jeńister jáne iri jetistikter tileımin!", - dep jazdy depýtat.
Dana halqymyzdyń aq batasyn alyp, alǵysyn arqalaǵan Ashat Qanatulyna jeli qoldanýshylary alǵystaryn bildirip, tolassyz aq tilekterin arnaýda.
"Halqyna adal qyzmet atqarǵan ádil mınıstr","Bilim salasy siz kelgeli eńsesin tiktedi", "Jas býyn es bilgeli kórgen eń myqty mınıstr", "Qarapaıym, naǵyz isker basshy retinde barlyq halyq ózińizdi qurmetteıdi jáne jaqsy kóredi", "Osy kúnge deıin bir mınıstrdiń aty, zatyn bilmeıtin halyqqa eń jaqyn mınıstr edińiz", "Óte ókinishti, sizdi halyq qımaı jatyr", "Sizdeı tarıhta qalatyn mınıstr endi bizde bola ma, bolmaı ma?", "Ultqa qyzmet etýdiń shynaıy úlgisin kórsete bildińiz", "Halyqtyń kóńilinen shyqqan jalǵyz mınıstrsiz", - dep jyly lebizderin bildirdi jeli qoldanýshylary.
"Adyrna" ulttyq portaly
