Qazaqstandyq balalardy kásipkerlikke baýlý mektepten bastalatyn bolady. Bul týraly Premer-Mınıstrdiń orynbasary Eraly Toǵjanov habarlady.
«Qazir bilim ýaqyty. Sarapshylardyń pikirinshe, kún saıyn jańa ashýlar paıda bolady. Biz olardy tez ıgerip qana qoımaı, qalyptastyrýdy da úırenýimiz kerek. Bul bizdiń ultymyzdyń qanshalyqty básekege qabiletti ekenin anyqtaıdy», — dedi Eraly Luqpanuly.
«Memleket basshysy Qazaqstannyń bolashaǵy shaǵyn jáne orta bıznestiń qarqyndy damýymen tyǵyz baılanysty ekenin birneshe ret atap ótti. Ol úshin bizge qazirden bastapkásipkerlerdiń jańa tolqynyn daıyndaý qajet. Sondyqtan bilim berýdiń barlyq deńgeılerinde — mektepten bastap joǵary oqý oryndaryna deıin «Kásipkerlik negizderi» páni engiziledi. Osyndaı tásil óskeleń urpaqty ekologııalyq tárbıeleý boıynsha qoldanylatyn bolady»,- dep qorytyndylady ol.
Esterińizge sala keteıik, balalardy kásipkerlikke baýlý 2014-shi jyldan bastap qolǵa alyndy. Sodan beri pánniń baǵdarlamasy men oqýlyǵy ázirlenip, 2017-shi jyldyń kúzinde alǵash ret ár óńirdiń bir mektebine pılottyq joba retinde engizildi. Sondaı-aq, jańa pəndi oqytý úshin muǵalimder «Atameken» ulttyq kəsipkerler palatasynda biliktilik kýrstaryn oqydy.
Oqýshylardy mektep jasynan kásipkerlikke baýlý qanshalyqty mańyzdy?
Shattyq Omarqyzy, ata-ana:
- Bilim eshqashan artyq bolmaıdy. Dese de, muǵalimder oqýshylardy kásipkerlikke qanshalyqty baýlı alady? Eger sabaqty «Myna erejeni dápterge jaz, mynany jatqa aıt»,-dep ótkizetin bolsa, kerek emes. Tekten-tek balanyń qyzyǵýshylyǵyn qaıtaryp alamyz. Fýtboldy qansha qarasań da, fýtbolıst bolmaısyń ǵoı. Sol sııaqty kásipkerlik týraly termınderdi jattaǵannan da paıda joq. Bul pándi oqytý úshin qyzyqty, tájirıbıege súıengen oqý baǵdarlamasyn daıarlaý qajet.
Aınur Omarova, muǵalim:
- Ótken jyly mektebimizdiń oqý baǵdarlamasyna 10-11 synyp oqýshylary úshin «Kásipkerlik jáne bıznes negizderi» atty pán engizildi. Negizgi maqsaty - oqýshylarǵa kásip ashýdaǵy baǵyt-baǵdarlardy túsindirý, bıznes jospar qurýdy úıretý. Jalpy óte qajet pánderdiń biri. «Atameken» ulttyq palatasynyń biliktilik kýrsynan ótken kez kelgen muǵalim bul pánnen sabaq bere alady.
Arman Asqaruly, kásipker:
- Kásipkerlikti bala jastan nasıhattaý óte durys. Jalpy álem elderinde bul tájirıbe oń nátıje kórsetti. Bizdiń ýaqytymyzda oqýshyǵa baǵyt beretin osyndaı pánder bolmady. Ózim bıznes bastarda biraz qınaldym. Kóptegen kýrstarǵa qatysyp, kitaptar oqyǵannan keıin ǵana fýndament qalyptasa bastady. Talaı tanystarym ári qaraı bul salada izdengisi kelmeı, bıznesti tastap ketti. Erteńgi kúni bolashaq bıznesmender qınalmas úshin osy pándi oqytý mańyzdy. Bizde qazir áleýmettik shıelenister jetkilikti ǵoı, sol sebepti jyl saıyn kásipkerlerdiń jańa aǵymyn qalyptastyrýymyz qajet. Óz basym tájirıbeli bıznesmenderdi oqý barysyna qatystyrý qajet dep oılaımyn.
Erasyl Esen, stýdent:
- Mektepte «Kásipkerlik jáne bıznes negizderi» pánin 1 jyl oqydyq. Az ǵana ýaqyttyń ishinde bul pán meniń bızneske degen qyzyǵýshylyǵymdy arttyrdy. Sabaq barysynda túrli jobalardy qorǵaıtyn edik. Qazirgi tańda ál-Farabı atyndaǵy QazUÝ-dyń Ekonomıka jáne bıznes joǵary mektebinde bilim alyp jatyrmyn.
Dıana ASAN,
«Adyrna» ulttyq portaly
