Túrikmenstan Halyq máslıhatynyń tóraǵasy Gýrbangýly Berdimuhamedov áriptesterimen, balalarǵa arnalǵan qaıyrymdylyq qorynyń ókilimen jáne respýblıkanyń Ǵylym akademııasynyń basshysymen ótken kezdesýde jańa kitabyn tanystyrdy, dep habarlaıdy "Adyrna" ulttyq portaly «Týrkmenıstan segodnıa» aqparat agenttigine silteme jasap.
Burynǵy prezıdenttiń aıtýynsha, bul kitapty ol eńbek demalysynda jazǵan.
Gýrbangýly Berdimuhamedov dástúr boıynsha eńbek demalysyn shyǵarmashylyq jumysqa arnaǵanyn, eldiń dańqty tarıhy týraly kóptegen oılaryn qaǵaz betine túsirgenin atap ótti.
Nátıjesinde Hakyda göwheri («Aqyl-oı marjany») atty jańa kitap jaryq kórdi. Bul eńbekte Mahtýmquly Fragı shyǵarmalarynyń jalpyadamzattyq qundylyqtarǵa áseri, sondaı-aq onyń ulttyq mádenıet pen álemdik órkenıetke qosqan úlesi týraly materıaldar qamtylǵan.
«Qaı kezeńdi alyp qarasaq ta, túrikmen mádenıeti árdaıym erekshe qundylyqtarymen tanylyp, adamzat tarıhyna úlken áser etkenin baıqaýǵa bolady», – dep atap ótti Arkadag.
Sondaı-aq, saıasatker Túrki mádenıeti halyqaralyq uıymynyń (TÚRKSOI) sheshimimen 2024 jyl uly aqyn ári oıshyl Mahtýmquly Fragı jyly dep jarııalanyp, Anaý qalasy túrki áleminiń mádenı astanasy bolyp tanylǵanyn eske saldy. Bul túrikmen halqy úshin zor maqtanysh ekenin Berdimuhamedov atap ótti.
Halyq keńesiniń tóraǵasy jańa kitaptyń alǵashqy danasyn óz áriptesterine usyndy. Ol bul kitaptyń jaqyn kúnderi basylyp, kópshilikke qoljetimdi bolatynyn aıtty. Keńeske qatysýshylar avtordy jańa shyǵarmashylyq jetistigimen quttyqtap, Arkadagtyń kitaptary tek túrikmen halqy úshin ǵana emes, búkil álem oqyrmandaryna qundy nusqaýlyq ári oqýlyq bolatynyn atap ótti.
Memlekettik BAQ Gýrbangýly Berdimuhamedovtiń Túrikmenstan prezıdenti Serdar Berdimuhamedovke jazǵan ashyq hatyn da jarııalady. Bul hatta avtor jańa eńbeginiń alǵashqy danasyn Mahtýmquly Fragı shyǵarmashylyǵyna arnaǵanyn aıtyp, ony memleket basshysyna syılyq retinde qabyldaýdy suraǵan.
«Osy múmkindikti paıdalanyp, Hakyda göwheri atty jańa kitabymdy joldaı otyryp, sizge zor densaýlyq, uzaq ǵumyr jáne abyroıly qyzmetińizde tek sáttilik tileımin», – dep jazdy Arkadag ulyna.
Gýrbangýly Berdimuhamedovtiń demalysy 1-25 qarasha aralyǵynda ótti. Osylaısha, ol shamamen bir aıdyń ishinde jańa eńbegin jazyp úlgerdi. Bul kitap saıasatkerdiń bıblıografııasyndaǵy 61-shi eńbek bolyp otyr.
