Aqmola oblysynyŋ prokurorlary Atbasar audany äkımdıgınıŋ qūrylys bölımı basşylaryna, «Prestij Stroi 7» JŞS men «Fundamental» ūiymdarynyŋ ökılderıne qatysty 300 mln teŋgeden astam qarajatty jymqyru faktısı boiynşa tergeudı aiaqtady, dep habarlaidy "Adyrna" ūlttyq portaly.
Öŋırlık prokuraturanyŋ mälımetınşe, būl qarajat 2021 jyly ükımet rezervınen bölıngen. Olar Atbasar audanyndaǧy su tasqyny qaupı bar aimaqta tūratyn 200 otbasyny köşıru üşın ekı 100 päterlık tūrǧyn üi saluǧa arnalǧan edı.
Küdıktılerdıŋ äreketterı Qylmystyq kodekstıŋ 189-babynyŋ 4-bölıgı boiynşa, iaǧni asa ırı mölşerdegı mülıktı talan-tarajǧa salu baby boiynşa saralanǧan. Atalǧan bap 12 jylǧa deiın bas bostandyǧynan aiyru jäne mülıktı tärkıleu jazasyn qarastyrady.
Sot sanksiiasymen ekı küdıktı qamauǧa alyndy, al üşınşı qatysuşy üiqamaqqa jıberıldı.
«Tergeu barysynda qylmystyq jolmen tabylǧan mülıkter anyqtaldy. Olardyŋ qatarynda Astana men Almatydaǧy kommersiialyq jyljymaityn mülık, arnaiy tehnika, qūrylys jabdyqtary jäne banktık şottardaǧy 50 mln teŋgeden astam qarajat bar. Barlyq tärkılengen mülıktıŋ jalpy baǧalau qūny 335 mln teŋgeden asty», – dep habarlady prokuratura.
Sondai-aq prokurorlardyŋ mälımetınşe, osy mülıktıŋ bır bölıgı jalǧa berılıp, zaŋsyz tabys äkelgen.
«Osyǧan bailanysty bır küdıktınıŋ äreketı qosymşa Qylmystyq kodekstıŋ 218-babynyŋ 3-bölıgı boiynşa, iaǧni qylmystyq jolmen alynǧan aqşa men basqa da mülıktı zaŋdastyru retınde saralandy. Būl bap boiynşa 10 jylǧa deiın bas bostandyǧynan aiyru jäne mülıktı tärkıleu jazasy közdelgen», – dep tolyqtyrdy qadaǧalau organy.
Ūqsas jaŋalyqtar
