Taldyqorǵan qalasyndaǵy Nazarbaev Zııatkerlik mektebinde «Ádil, taza jáne qaýipsiz Qazaqstan» taqyrybynda «Jas REPUBLIC CUP» respýblıkalyq pikirsaıys týrnıri ótti. Aımaqtyq irikteý kezeńine 31 komanda qatysty, bul oblystyń túkpir-túkpirinen 150-den astam jas pikirsaıysshylar. Aıta keterligi, Ulttyq pikirsaıys týrnıri elimizdiń barlyq aımaqtarynda ótti.
Synı turǵydan oılaý qabiletterin damytý, aqparatty taldaý, toppen jumys jasaý, suraqtar qurastyrý jáne olarǵa jaýap berý. Sonymen qatar oqýshylardy bilimge, tapqyrlyqqa, sheshendikke baýlý. Týrnırdiń maqsaty da osy. Jastar – eldiń bolashaǵy, qoǵamnyń qozǵaýshy kúshi. Irikteý týrnırinde qatysýshylar Qazaqstandaǵy ózekti máselelerdiń sheshimderi men tıimdi tetikterin usyndy.
Pikirsaıys – bilim berý oıyny. Qatysýshylardyń mańyzdy mindeti - daýdaǵy eki pikir de muqııat zertteýge jáne olardy qoldaýdaǵy dálelderdi muqııat óńdeýge laıyq ekenin túsiný. Bir nemese basqa komanda pikirtalasta jeńiske jetkendikten, ol qorǵaıtyn ustanym durys degendi bildirmeıdi. Jeńis tolyǵymen komandanyń sheberligine baılanysty: bul oıynǵa qatysýshylardyń jeke daǵdylary, komandalyq jumys jáne joǵary oıyn deńgeıi. Bul týrnırdi uıymdastyrý jahandyq formatqa ıe bolýda. Munda oınalatyn taqyryptardyń barlyǵy oqýshylardyń jas erekshelikterine, deńgeıine qaraı aıqyndalyp, beıimdelgen», - deıdi «Jas urpaq» pikirsaıys qozǵalysynyń sarapshysy Gaýfarııa Ahmetova.
Bul pikirsaıys týrnıri Qazaqstannyń barlyq aımaqtarynda ótti. Aımaqtyq irikteýden ótken jeńimpazdar qazan aıynda Respýblıka kúnine oraı respýblıkalyq týrnırdiń debattaryna qatysatyn bolady. Bul bastamanyń basty maqsaty – urpaqtarymyzdyń boıyna bilim uıalatyp, patrıottyq qabiletterin arttyrý», – dedi óz sózinde «Respýblıka» partııasy qoǵamdyq birlestiginiń oblystyq fılıalynyń tóraǵasy Rıshat Qojabek.
Aqyldy da bilimdi jastar ózara tájirıbe almasyp, pikir almasty. Aıta keterligi, búgingi kúni barlyq oqý oryndarynda debat klýbtary jumys isteıdi. Olar oqýshylardyń ıntellektýaldyq jáne kommýnıkatıvti daǵdylaryn damytýǵa úlken úles qosýda.
Qazaq lıgasy boıynsha irikteý týrnıriniń qorytyndysy boıynsha Oqýshylar saraıynyń komandasy jeńiske jetti. Taldyqorǵan qalasynyń Nazarbaev Zııatkerlik mektebiniń komandasy orys lıgasynda 1-orynǵa ıe boldy.
Jeńimpazdar qazan aıynda ótetin respýblıkalyq týrnırde Jetisý óńiriniń namysyn qorǵaıtyn bolady.
