مەكتەپ باعدارلاماسىنا جاڭا ءپان ەنگىزىلەدى

5148
Adyrna.kz Telegram

 قازاقستاندىق بالالاردى كاسىپكەرلىككە باۋلۋ مەكتەپتەن باستالاتىن بولادى. بۇل تۋرالى پرەمەر-ءمينيستردىڭ ورىنباسارى ەرالى توعجانوۆ حابارلادى.  

«قازىر ءبىلىم ۋاقىتى. ساراپشىلاردىڭ پىكىرىنشە، كۇن سايىن جاڭا اشۋلار پايدا بولادى. ءبىز ولاردى تەز يگەرىپ قانا قويماي، قالىپتاستىرۋدى دا ۇيرەنۋىمىز كەرەك. بۇل ءبىزدىڭ ۇلتىمىزدىڭ قانشالىقتى باسەكەگە قابىلەتتى ەكەنىن انىقتايدى», — دەدى ەرالى لۇقپانۇلى.

«مەملەكەت باسشىسى قازاقستاننىڭ بولاشاعى شاعىن جانە ورتا بيزنەستىڭ قارقىندى دامۋىمەن تىعىز بايلانىستى ەكەنىن بىرنەشە رەت اتاپ ءوتتى. ول ءۇشىن بىزگە قازىردەن باستاپكاسىپكەرلەردىڭ جاڭا تولقىنىن دايىنداۋ قاجەت. سوندىقتان ءبىلىم بەرۋدىڭ بارلىق دەڭگەيلەرىندە — مەكتەپتەن باستاپ جوعارى وقۋ ورىندارىنا دەيىن «كاسىپكەرلىك نەگىزدەرى» ءپانى ەنگىزىلەدى. وسىنداي ءتاسىل وسكەلەڭ ۇرپاقتى ەكولوگيالىق تاربيەلەۋ بويىنشا قولدانىلاتىن بولادى»,- دەپ قورىتىندىلادى ول.

ەستەرىڭىزگە سالا كەتەيىك، بالالاردى كاسىپكەرلىككە باۋلۋ 2014-ءشى جىلدان باستاپ قولعا الىندى. سودان بەرى ءپاننىڭ باعدارلاماسى مەن وقۋلىعى ازىرلەنىپ، 2017-ءشى جىلدىڭ كۇزىندە العاش رەت ءار ءوڭىردىڭ ءبىر مەكتەبىنە پيلوتتىق جوبا رەتىندە ەنگىزىلدى. سونداي-اق، جاڭا ءپəندى وقىتۋ ءۇشىن مۇعالىمدەر «اتامەكەن» ۇلتتىق كəسىپكەرلەر پالاتاسىندا بىلىكتىلىك كۋرستارىن وقىدى.

وقۋشىلاردى مەكتەپ جاسىنان كاسىپكەرلىككە باۋلۋ قانشالىقتى ماڭىزدى؟

شاتتىق ومارقىزى، اتا-انا:

- ءبىلىم ەشقاشان ارتىق بولمايدى. دەسە دە، مۇعالىمدەر وقۋشىلاردى كاسىپكەرلىككە قانشالىقتى باۋلي الادى؟ ەگەر ساباقتى «مىنا ەرەجەنى داپتەرگە جاز، مىنانى جاتقا ايت»،-دەپ وتكىزەتىن بولسا، كەرەك ەمەس. تەكتەن-تەك بالانىڭ قىزىعۋشىلىعىن قايتارىپ الامىز. فۋتبولدى قانشا قاراساڭ دا، فۋتبوليست بولمايسىڭ عوي. سول سياقتى كاسىپكەرلىك تۋرالى تەرميندەردى جاتتاعاننان دا پايدا جوق. بۇل ءپاندى وقىتۋ ءۇشىن قىزىقتى، تاجىريبيەگە سۇيەنگەن وقۋ باعدارلاماسىن دايارلاۋ قاجەت.

اينۇر وماروۆا، مۇعالىم:

- وتكەن جىلى مەكتەبىمىزدىڭ وقۋ باعدارلاماسىنا 10-11 سىنىپ وقۋشىلارى ءۇشىن «كاسىپكەرلىك جانە بيزنەس نەگىزدەرى» اتتى ءپان ەنگىزىلدى. نەگىزگى ماقساتى - وقۋشىلارعا كاسىپ اشۋداعى باعىت-باعدارلاردى ءتۇسىندىرۋ، بيزنەس جوسپار قۇرۋدى ۇيرەتۋ. جالپى وتە قاجەت پاندەردىڭ ءبىرى. «اتامەكەن»  ۇلتتىق پالاتاسىنىڭ بىلىكتىلىك كۋرسىنان وتكەن كەز كەلگەن مۇعالىم بۇل پاننەن ساباق بەرە الادى.

ارمان اسقارۇلى، كاسىپكەر:

- كاسىپكەرلىكتى بالا جاستان ناسيحاتتاۋ وتە دۇرىس. جالپى الەم ەلدەرىندە بۇل تاجىريبە وڭ ناتيجە كورسەتتى. ءبىزدىڭ ۋاقىتىمىزدا وقۋشىعا باعىت بەرەتىن وسىنداي پاندەر بولمادى. ءوزىم بيزنەس باستاردا ءبىراز قينالدىم. كوپتەگەن كۋرستارعا قاتىسىپ، كىتاپتار وقىعاننان كەيىن عانا فۋندامەنت قالىپتاسا باستادى. تالاي تانىستارىم ءارى قاراي بۇل سالادا ىزدەنگىسى كەلمەي، بيزنەستى تاستاپ كەتتى. ەرتەڭگى كۇنى بولاشاق بيزنەسمەندەر قينالماس ءۇشىن وسى ءپاندى وقىتۋ ماڭىزدى. بىزدە قازىر الەۋمەتتىك شيەلەنىستەر جەتكىلىكتى عوي، سول سەبەپتى جىل سايىن كاسىپكەرلەردىڭ جاڭا اعىمىن قالىپتاستىرۋىمىز قاجەت. ءوز باسىم تاجىريبەلى بيزنەسمەندەردى وقۋ بارىسىنا قاتىستىرۋ قاجەت دەپ ويلايمىن.

ەراسىل ەسەن، ستۋدەنت:

- مەكتەپتە «كاسىپكەرلىك جانە بيزنەس نەگىزدەرى» ءپانىن 1 جىل وقىدىق. از عانا ۋاقىتتىڭ ىشىندە بۇل ءپان مەنىڭ بيزنەسكە دەگەن قىزىعۋشىلىعىمدى ارتتىردى. ساباق بارىسىندا ءتۇرلى جوبالاردى قورعايتىن ەدىك. قازىرگى تاڭدا ءال-فارابي اتىنداعى قازۇۋ-دىڭ ەكونوميكا جانە بيزنەس جوعارى مەكتەبىندە ءبىلىم الىپ جاتىرمىن.

 

ديانا اسان،

«ادىرنا» ۇلتتىق پورتالى

پىكىرلەر