Nūraddin Sadyqov: Qazaq şybyndai qyrylyp ketpeuı tiıs

Ekı aiǧa jariialanǧan TJ men qataŋ türde saqtalǧan karantinge qaramastan, elımızde COVID-19 virusyn jūqtyrǧandar sany artyp, ındet örşıp barady. Därıhanalarda därı-därmektıŋ azdyǧy men auruhanalarda orynnyŋ şekteulıgı saldarynan talai adamnyŋ ömırı qiyldy. Soŋǧy uaqytta ındetke qarsy ūiymdastyrylǧan şaralardyŋ kemşılıgı aiqyn körınude. Osy tūsta qarapaiym halyq nauqastardyŋ janyn aman alyp qalu üşın jūdyryqtai jūmylyp, äreket etude. «Aidyŋ nūry», «Däuletten»  syndy qorlardyŋ mūryndyq boluymen Türkiiadan arnaiy medesinalyq qūral-jabdyqtardyŋ alǧaşqy legı kelıp, öŋır-öŋırge taratyluda. Būl ıstı Qairat Joldybaiūly, Syrymbek Tau, Quanyş Şonbai, Qyran Talapbek, Beibıt Älıbekov syndy azamattar jalǧastyruda. Därı-därmek pen medisinalyq apparattardan bölek auruy ortaşa jäne jeŋıl deŋgeidegı nauqastardy emdeitın arnaiy stasionarlyq  bölımşeler aşudy käsıpker Erlan Nūrpeiısov qolǧa alyp, «Kündızgı stasionar» jobasyn jüzege asyrudy bastady. Osy oraida «Adyrna» ūlttyq portaly jobanyŋ basy-qasynda jürgen azamat Nūraddin Sadyqovpen sūhbattasyp, ūiymdastyru şaralarymen  tanysty. – Nūraddin myrza, käsıpker Erlan Nūrpeiısovtıŋ bastamasyn qostap, Kündızgı stasionar jobasyn jüzege asyrudy qolǧa alǧan ekensızder. Äleumettık jelıde būl bastamalaryŋyzdy qarapaiym halyq qoldap, kömek beruge äzır ekendıgın bıldırıp jatyr. Al Densaulyq saqtau ministrlıgınıŋ tarapynan jauap boldy ma? Qoldau körsetedı me? Erlan myrza Facebook paraqşasynda ministr A. Soiǧa ūsynysyn aitqan da eken. – Ministrlık tarapynan naqty qoldau bar-joǧyn bılmeimın. Ministrlıkpen de, äkımdıkpen de Erlan aǧamyz özı bailanyys jasap otyr. Eŋ bastysy, özderınıŋ kedergısın keltırmese, büz üşın ülken kömek. Türlı biurokratiialyq äreketterımen aiaqtan şalmasa bolǧany. Ärine, ǧimarat pen därı-därmekpen qamtu jaǧynan kömegın berse qūba-qūp bolar edı. – Kündızgı stasionardy qai aimaqta ūiymdastyrudy közdep otyrsyzdar? Ärıqarai jaǧdaiy müşkıl, kömekke zäru basqa aimaqtarda da jalǧasyn taba ma? – Eŋ bırınşı Almaty qalasynda ūiymdastyrudy közdep otyrmyz. Odan keiın jüielı algoritmın jasap, özge oblystar men ülken qalalarǧa ūsynsaq degen oiymyz bar. Özge qalalarda da ūiymdastyratyn jandar tabylsa, jeke özım keŋes berıp, baqylauǧa aluǧa daiarmyn. Tek jergılıktı azamattar men käsıpkerler belsendı bolsa eken. Sebebı, bızdıŋ özımız bırneşe künnen berı talapqa sai keletın ǧimarat taba almai qinaludamyz. Bırınde jeldetkış bolǧanmen, kırıp-şyǧatyn qosymşa esık joq. Al endı bırınde kerısınşe, jeldetkış joq. Onyŋ üstıne bızdıŋ qaltamyz kötermeitındei öte qymbat. Öz ǧimarattaryn  tegın ūsynyp jatqan azamattar da bar, bıraq ol ǧimarattar talapqa sai kelmeidı. Sondyqtan özge aimaqtarda ūiymdastyrǧan jaǧdaida azamattardyŋ qajyrlyǧy kerek bolady. Bız naqty ıs-şaralar algoritmımen qamtamasyz etıp otyruǧa, kömektesuge, tıptı, qajet bolǧan jaǧdaida baruǧa da  daiarmyz.  – Būl «Kündızgı stasionar» konsepsiiasynyŋ jariialanǧanyna ekı kün bolǧan eken. Qarajat qanşalyqty deŋgeide jinalyp jatyr, kömek qolyn sozyp jatqan atqamıner beldı azamattar bar ma? – Erlan aǧamyzdyŋ özı belgılı kompaniialarmen  kelıssöz jürgızdı. Qazırgı kezde olar qarajattyŋ bır bölıgıne qoldau körsetpek. Sol qarajatpen ıske kırısıp kettık jäne jan-jaqtan jinalǧan qarajatty da qosyp, ärıqarai äreketımızdı jalǧastyra bermekpız.  – Indet uşyǧyp, äbden dendegen sätınde halyqtyŋ tiıstı oryndarǧa aşynyp, narazylyǧyn bıldırıp jatqany belgılı. Al jūmyla köterılıp, der kezınde kömek ūiymdastyryp jürgen qarapaiym azamattarǧa alǧysyn jaudyruda. Jauaptylar osy jaidan keiın de jauapkerşılıktı sezınıp, ındettı auyzdyqtauǧa bar küşın salatynyna kümän älı de bar ma? – Jauapty azamattardyŋ jauapkerşılıgı oianatyn-oianbaityny äuelı bır Allaǧa, sosyn sol azamattardyŋ aryna syn, solarǧa mälım dünie. Jasyratyny joq, aldaǧy uaqytta jaǧdaidyŋ oŋalyp, özgerıp keterıne ümıtımız de joq. Bız öz betımızşe şamamyz kelgenşe äreketımızdı jasai bermek niettemız. Tym bolmaǧanda  50-100 adamǧa arnalǧan stasionardy aşudy közdep otyrmyz. Bızden bölek Almaty qalasynyŋ özge audandary men Qazaqstannyŋ özge aimaqtarynan da osyndai stasionarlar aşuǧa yntaly azamattar şyǧyp, ıstı ärıqarai jalǧastyrsa, köp kömek boluşy edı. Qazaqşa aitqanda, öz arbamyzdy özımız süireuge tyrysuymyz kerek. Öitkenı, erteŋ ındettıŋ ekınşı tolqyny kelgende, ah ūryp, qanşama qazaq şybyndai qyrylyp ketpeuı tiıs. – Kömek berem degen niettegı azamattarǧa, halyqqa aitaryŋyz... Rasynda, bızdıŋ de uaqytymyz joq, uaqytymyzdy öltıre almai jürgen adamdar qatarynan emespız. Mynadai epidemiialyq jaǧdaida ondaiǧa eş mümkındıgımız de joq. Bıraq osyndai şaruany bıreu bastap, ısteuı kerek qoi, sondyqtan täuekelge bel buyp kördık. Şamamyz kelgenşe soŋyna jetkızuge tyrysamyz. Onyŋ barlyǧy köpşılıktıŋ qoldauyna bailanysty. Bızde älgındei «haip quu» nemese özge de «trendte» bolu nietı joq. Äiteuır bır qazaqty aman alyp qalsaq ta, jūmysymyzdyŋ nätijelı bolǧany dep bılemız. Sondyqtan barlyq azamattardy osy ıske atsalysuǧa şaqyramyz. Qandai kömek kerek ekendıgın Facebook, Instagram paraqşalarymda körsettım. Eŋ bastylary: qarjylai kömek,  erıktıler men medisinalyq qyzmet körsetuşılerge öz otbasylarynan oqşaulau üşın qonaq üi, tamaqtandyruǧa qatysty kömekter kerek. Bızge äzırge «Lanzhou» restorandar jelısınıŋ basşysy Gülbanu hanym bır stasionar qyzmetkerlerın tamaqpen qamtuǧa kömek beretın boldy. Aldaǧy uaqytta mūndai stasionarlar köbeiıp jatsa, mūndai kömekter köptep kerek bolady. Su, türlı medisinalyq kiımder, jeke qorǧanys qūraldarymen de qamtuymyz qajet. Sonymen qatar nauqastardy tegın därı-därmekpen qamtamasyz etsek degen oiymyz bar, mūny da azamattar eskerse deimız. Būl ıste bızge qol ūşyn sozar erıktıler, mūqtaj jandardy stasionarǧa tasityn arnaiy avtokölıkter de kerek. Bız barlyq qauıpsızdık şaralaryn qataŋ saqtai otyryp, äreket etuge tyrysamyz. Osylai bır-bırımızdı demep, ūiymdasyp kömek bermesek, jaǧdai uşyǧyp bara jatqanyn köz körıp otyr. Körşıles qyrǧyz bauyrlarymyzdyŋ özı däl osylai jūmyla äreket etıp, ındettı bırşama auyzdyqtai aldy. Rasyn aitqanda, olardyŋ būl ūiymşyldyǧy bızdı qamşylai tüstı. Bız de olardan kem tüspei, jūmyla järdem berıp, bırlıgımızdı körsete alamyz dep oilaimyn.   Kömek körsetem degen azamattar üşın:   «KRASİVYE DETİ KAZAHSTANA» qory BSN 080 740 007 650 Zaŋdy meken-jaiy: Almaty qalasy, Medeu audany, Samal-3 şaǧyn audany, 1 üi Prezident: NŪRPEIISOVA Gülşat Aitbaiqyzy Bank derekterı: BİK: IRTYKZKA İİK: KZ7796502F0008690340 KBe 17   Qorǧa tüsken barlyq qarajat turaly joba ūiymdastyruşylary esep beredı

Äŋgımelesken Aijan Qūrmanbai,

"Adyrna" ūlttyq portaly