ەكى ايعا جاريالانعان تج مەن قاتاڭ تۇردە ساقتالعان كارانتينگە قاراماستان، ەلىمىزدە COVID-19 ۆيرۋسىن جۇقتىرعاندار سانى ارتىپ، ىندەت ءورشىپ بارادى. ءدارىحانالاردا ءدارى-دارمەكتىڭ ازدىعى مەن اۋرۋحانالاردا ورىننىڭ شەكتەۋلىگى سالدارىنان تالاي ادامنىڭ ءومىرى قيىلدى. سوڭعى ۋاقىتتا ىندەتكە قارسى ۇيىمداستىرىلعان شارالاردىڭ كەمشىلىگى ايقىن كورىنۋدە. وسى تۇستا قاراپايىم حالىق ناۋقاستاردىڭ جانىن امان الىپ قالۋ ءۇشىن جۇدىرىقتاي جۇمىلىپ، ارەكەت ەتۋدە. «ايدىڭ نۇرى»، «داۋلەتتەن» سىندى قورلاردىڭ مۇرىندىق بولۋىمەن تۇركيادان ارنايى مەدەتسينالىق قۇرال-جابدىقتاردىڭ العاشقى لەگى كەلىپ، ءوڭىر-وڭىرگە تاراتىلۋدا. بۇل ءىستى قايرات جولدىبايۇلى، سىرىمبەك تاۋ، قۋانىش شونباي، قىران تالاپبەك، بەيبىت الىبەكوۆ سىندى ازاماتتار جالعاستىرۋدا.
ءدارى-دارمەك پەن مەديتسينالىق اپپاراتتاردان بولەك اۋرۋى ورتاشا جانە جەڭىل دەڭگەيدەگى ناۋقاستاردى ەمدەيتىن ارنايى ستاتسيونارلىق بولىمشەلەر اشۋدى كاسىپكەر ەرلان نۇرپەيىسوۆ قولعا الىپ، «كۇندىزگى ستاتسيونار» جوباسىن جۇزەگە اسىرۋدى باستادى.
وسى ورايدا «ادىرنا» ۇلتتىق پورتالى جوبانىڭ باسى-قاسىندا جۇرگەن ازامات نۇراددين سادىقوۆپەن سۇحباتتاسىپ، ۇيىمداستىرۋ شارالارىمەن تانىستى.
– نۇراددين مىرزا، كاسىپكەر ەرلان نۇرپەيىسوۆتىڭ باستاماسىن قوستاپ، كۇندىزگى ستاتسيونار جوباسىن جۇزەگە اسىرۋدى قولعا العان ەكەنسىزدەر. الەۋمەتتىك جەلىدە بۇل باستامالارىڭىزدى قاراپايىم حالىق قولداپ، كومەك بەرۋگە ءازىر ەكەندىگىن ءبىلدىرىپ جاتىر. ال دەنساۋلىق ساقتاۋ مينيسترلىگىنىڭ تاراپىنان جاۋاپ بولدى ما؟ قولداۋ كورسەتەدى مە؟ ەرلان مىرزا Facebook پاراقشاسىندا مينيستر ا. تسويعا ۇسىنىسىن ايتقان دا ەكەن.
– مينيسترلىك تاراپىنان ناقتى قولداۋ بار-جوعىن بىلمەيمىن. مينيسترلىكپەن دە، اكىمدىكپەن دە ەرلان اعامىز ءوزى بايلانىىس جاساپ وتىر. ەڭ باستىسى، وزدەرىنىڭ كەدەرگىسىن كەلتىرمەسە، ءبۇز ءۇشىن ۇلكەن كومەك. ءتۇرلى بيۋروكراتيالىق ارەكەتتەرىمەن اياقتان شالماسا بولعانى. ارينە، عيمارات پەن ءدارى-دارمەكپەن قامتۋ جاعىنان كومەگىن بەرسە قۇبا-قۇپ بولار ەدى.
– كۇندىزگى ستاتسيوناردى قاي ايماقتا ۇيىمداستىرۋدى كوزدەپ وتىرسىزدار؟ ارىقاراي جاعدايى مۇشكىل، كومەككە ءزارۋ باسقا ايماقتاردا دا جالعاسىن تابا ما؟
– ەڭ ءبىرىنشى الماتى قالاسىندا ۇيىمداستىرۋدى كوزدەپ وتىرمىز. ودان كەيىن جۇيەلى الگوريتمىن جاساپ، وزگە وبلىستار مەن ۇلكەن قالالارعا ۇسىنساق دەگەن ويىمىز بار. وزگە قالالاردا دا ۇيىمداستىراتىن جاندار تابىلسا، جەكە ءوزىم كەڭەس بەرىپ، باقىلاۋعا الۋعا دايارمىن. تەك جەرگىلىكتى ازاماتتار مەن كاسىپكەرلەر بەلسەندى بولسا ەكەن. سەبەبى، ءبىزدىڭ ءوزىمىز بىرنەشە كۇننەن بەرى تالاپقا ساي كەلەتىن عيمارات تابا الماي قينالۋدامىز. بىرىندە جەلدەتكىش بولعانمەن، كىرىپ-شىعاتىن قوسىمشا ەسىك جوق. ال ەندى بىرىندە كەرىسىنشە، جەلدەتكىش جوق. ونىڭ ۇستىنە ءبىزدىڭ قالتامىز كوتەرمەيتىندەي وتە قىمبات. ءوز عيماراتتارىن تەگىن ۇسىنىپ جاتقان ازاماتتار دا بار، بىراق ول عيماراتتار تالاپقا ساي كەلمەيدى.
سوندىقتان وزگە ايماقتاردا ۇيىمداستىرعان جاعدايدا ازاماتتاردىڭ قاجىرلىعى كەرەك بولادى. ءبىز ناقتى ءىس-شارالار الگوريتمىمەن قامتاماسىز ەتىپ وتىرۋعا، كومەكتەسۋگە، ءتىپتى، قاجەت بولعان جاعدايدا بارۋعا دا دايارمىز.
– بۇل «كۇندىزگى ستاتسيونار» كونتسەپتسياسىنىڭ جاريالانعانىنا ەكى كۇن بولعان ەكەن. قاراجات قانشالىقتى دەڭگەيدە جينالىپ جاتىر، كومەك قولىن سوزىپ جاتقان اتقامىنەر بەلدى ازاماتتار بار ما؟
– ەرلان اعامىزدىڭ ءوزى بەلگىلى كومپانيالارمەن كەلىسسوز جۇرگىزدى. قازىرگى كەزدە ولار قاراجاتتىڭ ءبىر بولىگىنە قولداۋ كورسەتپەك. سول قاراجاتپەن ىسكە كىرىسىپ كەتتىك جانە جان-جاقتان جينالعان قاراجاتتى دا قوسىپ، ارىقاراي ارەكەتىمىزدى جالعاستىرا بەرمەكپىز.
– ىندەت ۋشىعىپ، ابدەن دەندەگەن ساتىندە حالىقتىڭ ءتيىستى ورىندارعا اشىنىپ، نارازىلىعىن ءبىلدىرىپ جاتقانى بەلگىلى. ال جۇمىلا كوتەرىلىپ، دەر كەزىندە كومەك ۇيىمداستىرىپ جۇرگەن قاراپايىم ازاماتتارعا العىسىن جاۋدىرۋدا. جاۋاپتىلار وسى جايدان كەيىن دە جاۋاپكەرشىلىكتى سەزىنىپ، ىندەتتى اۋىزدىقتاۋعا بار كۇشىن سالاتىنىنا كۇمان ءالى دە بار ما؟
– جاۋاپتى ازاماتتاردىڭ جاۋاپكەرشىلىگى وياناتىن-ويانبايتىنى اۋەلى ءبىر اللاعا، سوسىن سول ازاماتتاردىڭ ارىنا سىن، سولارعا ءمالىم دۇنيە. جاسىراتىنى جوق، الداعى ۋاقىتتا جاعدايدىڭ وڭالىپ، وزگەرىپ كەتەرىنە ءۇمىتىمىز دە جوق. ءبىز ءوز بەتىمىزشە شامامىز كەلگەنشە ارەكەتىمىزدى جاساي بەرمەك نيەتتەمىز. تىم بولماعاندا 50-100 ادامعا ارنالعان ستاتسيوناردى اشۋدى كوزدەپ وتىرمىز. بىزدەن بولەك الماتى قالاسىنىڭ وزگە اۋداندارى مەن قازاقستاننىڭ وزگە ايماقتارىنان دا وسىنداي ستاتسيونارلار اشۋعا ىنتالى ازاماتتار شىعىپ، ءىستى ارىقاراي جالعاستىرسا، كوپ كومەك بولۋشى ەدى. قازاقشا ايتقاندا، ءوز اربامىزدى ءوزىمىز سۇيرەۋگە تىرىسۋىمىز كەرەك. ويتكەنى، ەرتەڭ ىندەتتىڭ ەكىنشى تولقىنى كەلگەندە، اح ۇرىپ، قانشاما قازاق شىبىنداي قىرىلىپ كەتپەۋى ءتيىس.
– كومەك بەرەم دەگەن نيەتتەگى ازاماتتارعا، حالىققا ايتارىڭىز...
راسىندا، ءبىزدىڭ دە ۋاقىتىمىز جوق، ۋاقىتىمىزدى ولتىرە الماي جۇرگەن ادامدار قاتارىنان ەمەسپىز. مىناداي ەپيدەميالىق جاعدايدا وندايعا ەش مۇمكىندىگىمىز دە جوق. بىراق وسىنداي شارۋانى بىرەۋ باستاپ، ىستەۋى كەرەك قوي، سوندىقتان تاۋەكەلگە بەل بۋىپ كوردىك. شامامىز كەلگەنشە سوڭىنا جەتكىزۋگە تىرىسامىز. ونىڭ بارلىعى كوپشىلىكتىڭ قولداۋىنا بايلانىستى. بىزدە الگىندەي «حايپ قۋ» نەمەسە وزگە دە «ترەندتە» بولۋ نيەتى جوق. ايتەۋىر ءبىر قازاقتى امان الىپ قالساق تا، جۇمىسىمىزدىڭ ناتيجەلى بولعانى دەپ بىلەمىز. سوندىقتان بارلىق ازاماتتاردى وسى ىسكە اتسالىسۋعا شاقىرامىز. قانداي كومەك كەرەك ەكەندىگىن Facebook, Instagram پاراقشالارىمدا كورسەتتىم. ەڭ باستىلارى: قارجىلاي كومەك، ەرىكتىلەر مەن مەديتسينالىق قىزمەت كورسەتۋشىلەرگە ءوز وتباسىلارىنان وقشاۋلاۋ ءۇشىن قوناق ءۇي، تاماقتاندىرۋعا قاتىستى كومەكتەر كەرەك. بىزگە ازىرگە «Lanzhou» رەستوراندار جەلىسىنىڭ باسشىسى گۇلبانۋ حانىم ءبىر ستاتسيونار قىزمەتكەرلەرىن تاماقپەن قامتۋعا كومەك بەرەتىن بولدى. الداعى ۋاقىتتا مۇنداي ستاتسيونارلار كوبەيىپ جاتسا، مۇنداي كومەكتەر كوپتەپ كەرەك بولادى. سۋ، ءتۇرلى مەديتسينالىق كيىمدەر، جەكە قورعانىس قۇرالدارىمەن دە قامتۋىمىز قاجەت. سونىمەن قاتار ناۋقاستاردى تەگىن ءدارى-دارمەكپەن قامتاماسىز ەتسەك دەگەن ويىمىز بار، مۇنى دا ازاماتتار ەسكەرسە دەيمىز. بۇل ىستە بىزگە قول ۇشىن سوزار ەرىكتىلەر، مۇقتاج جانداردى ستاتسيونارعا تاسيتىن ارنايى اۆتوكولىكتەر دە كەرەك. ءبىز بارلىق قاۋىپسىزدىك شارالارىن قاتاڭ ساقتاي وتىرىپ، ارەكەت ەتۋگە تىرىسامىز.
وسىلاي ءبىر-ءبىرىمىزدى دەمەپ، ۇيىمداسىپ كومەك بەرمەسەك، جاعداي ۋشىعىپ بارا جاتقانىن كوز كورىپ وتىر. كورشىلەس قىرعىز باۋىرلارىمىزدىڭ ءوزى ءدال وسىلاي جۇمىلا ارەكەت ەتىپ، ىندەتتى ءبىرشاما اۋىزدىقتاي الدى. راسىن ايتقاندا، ولاردىڭ بۇل ۇيىمشىلدىعى ءبىزدى قامشىلاي ءتۇستى. ءبىز دە ولاردان كەم تۇسپەي، جۇمىلا جاردەم بەرىپ، بىرلىگىمىزدى كورسەتە الامىز دەپ ويلايمىن.
كومەك كورسەتەم دەگەن ازاماتتار ءۇشىن:
«كراسيۆىە دەتي كازاحستانا» قورى
بسن 080 740 007 650
زاڭدى مەكەن-جايى: الماتى قالاسى، مەدەۋ اۋدانى، سامال-3 شاعىن اۋدانى، 1 ءۇي
پرەزيدەنت: نۇرپەيىسوۆا گۇلشات ايتبايقىزى
بانك دەرەكتەرى:
بيك: IRTYKZKA
يك: KZ7796502F0008690340
Kبe 17
قورعا تۇسكەن بارلىق قاراجات تۋرالى جوبا ۇيىمداستىرۋشىلارى ەسەپ بەرەدى
اڭگىمەلەسكەن ايجان قۇرمانباي،
"ادىرنا" ۇلتتىق پورتالى
