Mäjılıs deputaty Jūldyz Süleimenova oqu jylynyŋ IV toqsanynda jüktemesı ekı ese artqaly otyrǧan mūǧalımderdıŋ eŋbekaqysy turaly deputattyq saual joldady, dep habarlaidy «Adyrna» ūlttyq portaly QazAqparatqa sılteme jasap.
«Qazaqstan Respublikasynyŋ bas memlekettık sanitar därıgerınıŋ qaulysyna säikes, IV toqsanda tömen jäne ortaşa täuekel aimaqtaryndaǧy bala sany 300-den 3000-ǧa deiıngı oquşyny qamtityn qala jäne auyl mektepterı aralas formatta oqytudy josparlauda. Atalǧan mäsele halyq tyǧyz ornalasqan oŋtüstık aimaqtaryna ǧana emes, elordaǧa jaqyn ornalasqan orta mektepterge de qatysy bar. Osy rette, bas sanitar därıgerdıŋ synyptardaǧy balalar sanyn 25 adamnan asyrmai, aralas formatta oqytu jäne «1 synyp-1 kabinet» qaǧidatyn saqtau qaulysyn oryndau müldem mümkın emes ekenın aitqymyz keledı», - dedı deputat.
Onyŋ sözınşe, köpşılık orta bılım mekemelerınde oquşy sany 35-ten asatyn synyptar bar. Būl şara osyndai synyptardy ekıge böluge, säikesınşe mūǧalım jüktemesın ekı ese arttyruǧa alyp keledı. Mäjılıs ökılı oqu jylynyŋ soŋynda mūǧalımnıŋ josparlanbaǧan mūndai jüktemesıne jalaqy qandai qarajattan tölenetının sūrady. «Mektepterge būl oraida qosymşa qarajat bölıne me? Eger bölınbese, mūǧalımnıŋ eŋbegı, maŋdai ter aqysy qaidan tölenbek? Eger synypta oquşy sanyn 25-ten köbeituge şeşım qabyldansa, onda mektep direktorlary öz qaltasynan aiyppūl töleuge mäjbür. Pandemiia kezınde mektep direktorlaryna aiyppūl töletu qanşalyqty qisyndy?»,- dedı Jūldyz Süleimenova.
Saualynyŋ soŋynda mäjılısmen jergılıktı atqaruşy bilık organdary bas sanitar därıgerlermen bırlesıp, offlain negızde synypqa keletın 25 oquşynyŋ naqty kriteriilerın anyqtap, aimaqtaǧy epidemiologiialyq jaǧdaiǧa bailanysty dästürlı formatta bılım beruge köşuge ikemdı şeşım qabyldauy kerek degen ūsynys aitty.
Sız ne deisız?
Ermek ŞONBAI, mūǧalım, Türkıstan oblysy: «Ärine, virustyŋ älegı qai salaǧa bolsyn, ülken zalalyn tigızıp jatqany sözsız. Alaida däl osy kezeŋde därıgerler men mūǧalımderge jüktıŋ eŋ auyr tūsy tüskendei. Bır sabaǧyn bır synypqa ekı qaitalap ötkızu mūǧalımge fiziologiialyq tūrǧydan da auyr. Qazırgı kezde öŋırımız qauıptı aimaqqa enbegendıkten, keibır auyldarda sabaq dästürlı formatta oqytuǧa köşıp jatyr. Bügın 4-şı toqsannyŋ bırınşı künı bızdıŋ mektepte de oqu dästürlı formatta bastaldy. Bıraq būl jaǧdai qaşanǧa deiın sozylatyny belgısız. Öitkenı Nūr-Sūltan, Almaty siiaqty negızgı ırı qalalarda virustyŋ taralu jaǧdaiy naşar bolyp tūr. Olai bolsa, köp ūzamai, bızdı de onlain formatqa köşıruı mümkın dep otyrmyz. Soŋǧy toqsandy qaşyqtyqtan oqytyp, bıtırte salu dūrys edı dep oilaimyn. Mūǧalımnıŋ bır sabaqty ekı ret ötkenı üşın memleketten 2 saǧatqa jalaqy töleuı mümkın dep sanamaimyn. Olai bolsa, mūǧalımderge taǧy da «tegın» jūmys küşıne ainaluyna tura keletın siiaqty ǧoi».
Saparälı QADYRJAN, Almaty oblysynyŋ mūǧalımı: «Äbden sandaltyp, şarşatty mūǧalımdı. Onlain bılım beru oŋai dep oilasa kerek, mektep basşylary mūǧalımderdı būrynǧydan beter qaǧazbasty etıp qoidy. Endı jartylai onlain, jartylai offlain formatty bılım beru tıptı oŋ jambasqa kelmei tūr. Mysaly, men 5 synypqa onlain sabaq berumen qatar, 9-11 synyptar üşın bır sabaǧymdy ekı retten ötuım kerek eken. 9-11 synyptar üşın aptasyna 8 saǧatym bar edı. Endı 16 saǧatqa köbeiedı. Alaida maǧan ailyq 8 saǧatqa ǧana tölenedı. Sonda qalai bolǧany? Būl ädıldık pe?»
Maira QAIRATQYZY, ata-ana: «Äbden basty qatyryp bıttı. 4 toqsan ekı aiǧa jetpeitın eŋ qysqa, ärı qorytyndy toqsan edı. Nege onlain formatta oqytyp, bıtıre salmady? Qazır menıŋ ekı balam mektepke baryp oqidy da, al ekı balam üide, qaşyqtyqtan bılım alady. Bırneşe qalamyz qauıptı aimaqqa ainalyp, karantin talaptary küşeitılıp jatqanda, mektepke baryp oqu degendı kım oilap tapqany qyzyq. Erteŋ balamyz auyrsa, ne bolady? Onsyz da, auyspaly aua-raiynan balalar tūmauratyp auyryp, bır-bırıne jūqtyryp jatyr. Al endı kovid jūqtyrsa, jaǧdai qalai bolmaq?»
Mūqaş MŪRATŪLY,
«Adyrna» ūlttyq portaly.
Ūqsas jaŋalyqtar
