Respublika künıne arnalǧan Prezident Qasym-Jomart Toqaevtyŋ baiandamasy – el damuynyŋ baǧyt-baǧdaryn aiqyndaityn, egemendık ideiasynyŋ ömırşeŋdıgın däleldeitın maŋyzdy ündeu boldy.
Särsen Amanjolov atyndaǧy Şyǧys Qazaqstan universitetınıŋ rektory Mūhtar Tölegen Memleket basşysynyŋ sözınde köterılgen basty qaǧidattarǧa toqtalyp, elımızdıŋ ūlttyq jaŋǧyru jolyndaǧy saiasaty men jaŋa qūndylyqtar turaly öz közqarasyn ortaǧa saldy.
Prezident elımızdıŋ Memlekettık egemendıgı turaly Deklarasiia qabyldanǧanyna 35 jyl tolǧanyn eske saldy. «Däl osy künı ǧasyrlar boiǧy memleketımızdıŋ dästürı qaita jaŋǧyryp, Täuelsızdıgımızdıŋ tuy biıkke köterıldı. Tarihi ädılettılık ornap, ūlttyq ruhymyz nyǧaia tüstı», – dep tüiındedı Qasym-Jomart Toqaev.
- Eldıŋ taŋdaǧan baǧyty turaly Sızdıŋ pıkırıŋızdı bılgımız keledı.
- Prezident Qasym-Jomart Toqaev öz baiandamasynda elımızdıŋ Memlekettık egemendıgı turaly Deklarasiia qabyldanǧanyna 35 jyl tolǧanyn atap ötıp, sol tarihi künnıŋ maŋyzyn airyqşa körsettı. Būl qūjat — Täuelsız Qazaqstannyŋ saiasi jäne ruhani ırgetasyn qalaǧan tarihi şeşım boldy.
Bügıngı taŋda elımız osy baǧytty laiyqty jalǧastyryp keledı. Eldıŋ taŋdaǧan baǧyty – ūlttyq müddege, tūraqty damuǧa jäne ädıl qoǧam ornatuǧa negızdelgen. Būl – saiasi jaŋǧyru men ekonomikalyq serpılıstı, azamattyq jauapkerşılık pen qoǧamdyq kelısımdı qatar örbıtetın sara jol. Memleket basşysynyŋ būl baǧyttaǧy saiasatyn elımızdıŋ bolaşaǧyn aiqyndaityn naqty baǧdar dep esepteimın.
- Sızdıŋ oiyŋyzşa, Memlekettık egemendık turaly Deklarasiiada aiqyndalǧan qūndylyqtar men baǧdarlar Ädılettı Qazaqstandy qūruǧa baǧyttalǧan Prezident Toqaevtyŋ saiasaty arqyly qanşalyqty jüzege asyp jatyr dep oilaisyz?
- 1990 jyly qabyldanǧan Memlekettık egemendık turaly Deklarasiiada ädıldık, täuelsızdık, halyq bilıgı jäne bırlık sekıldı qūndylyqtar aiqyndalǧan bolatyn. Prezident Qasym-Jomart Toqaev bastaǧan qazırgı saiasat – sol ruhani-ideialyq ırgetastyŋ zamanaui jalǧasy.
Bügınde “Ädılettı Qazaqstan” tūjyrymdamasy osy qūndylyqtardy ömırdıŋ barlyq salasynda jüzege asyruǧa baǧyttalǧan. Ädıldık qaǧidaty memlekettık basqaru jüiesın jaŋǧyrtuda, azamattardyŋ äleumettık qūqyqtaryn qorǧauda jäne jastarǧa teŋ mümkındık berude körınıs tabuda. Būl – Deklarasiiada bekıtılgen ūlt müddesınıŋ bügıngı kün talabyna sai jüzege asuynyŋ aiqyn dälelı.
- Tört jyl būryn Qasym-Jomart Toqaev Respublika künıne ūlttyq mereke märtebesın qaitaryp berdı. Būl kün nenı bıldıredı? Onyŋ qazaqstandyq qoǧam üşın maŋyzy nede dep sanaisyz?
- Prezidenttıŋ bastamasymen üş jyl būryn, iaǧni 2022 jyly Respublika künıne ūlttyq mereke märtebesınıŋ qaitaryluy – tarihi ädılettılıktıŋ ornauy dep bılemız. Būl kün – täuelsızdıktıŋ bastauy, memlekettılıktıŋ qaita tüleuı jäne ūlttyq ruhtyŋ jaŋǧyru simvoly.
Qazırgı qoǧam üşın Respublika künı – eldık bırlıktıŋ, memleketke degen qūrmettıŋ jäne otansüigıştıktıŋ merekesı. Äsırese jastar üşın būl kün – öz elınıŋ tarihyn tereŋ tüsınuge, azamattyq jauapkerşılıktı sezınuge jäne el damuyna üles qosuǧa ündeitın erekşe ruhani sät.
- Prezident atap ötkendei: «Bızdıŋ elımızde eren eŋbegımen el qūrmetıne bölengen azamattar az emes». Respublika künıne orai bırqatar qazaqstandyqtar memlekettık nagradalarmen marapattaldy. Biylǧy jyly eŋbek adamdaryna, jūmysşy mamandyqtarynyŋ ökılderıne alǧys bıldıruge erekşe män berıldı deuge bola ma?
- Prezident öz sözınde el damuyna üles qosqan eŋbek adamdary men jūmysşy mamandyqtarynyŋ ökılderın airyqşa atap öttı. Biyl marapattalǧan azamattardyŋ qatarynda öndırıs, bılım beru, densaulyq saqtau, mädeniet jäne auyl şaruaşylyǧy salalarynda eŋbek etıp jürgen myŋdaǧan otandastarymyz bar.
Būl – qoǧamda eŋbek adamynyŋ märtebesın arttyruǧa baǧyttalǧan maŋyzdy qadam. Memleket tarapynan mūndai qūrmet körsetu – jastardy adal eŋbekke, käsıbi şeberlıkke jäne elge qyzmet etuge yntalandyrady. Universitetımızdıŋ de basty missiiasy – däl osyndai eŋbekqor, jauapty, bäsekege qabılettı tūlǧalardy tärbieleu.
- «Jaŋa elita» şynymen de eldıŋ jaŋǧyruyna, ekonomikalyq jäne basqaruşylyq jüienıŋ jaŋaruyna qozǧauşy küş bola ala ma?
- Prezident atap ötken «jaŋa elita» ūǧymy – tek bilık nemese biznes salasynyŋ ökılderı ǧana emes, eldıŋ är salasynda käsıbi jäne moraldyq tūrǧyda ülgı bola alatyn jaŋa buyn mamandar qauymyn bıldıredı.
Jaŋa elita – jaŋaşyl oilaityn, qoǧamǧa qyzmet etudı basty maqsat sanaityn, bılımı men bäsekege qabılettılıgı arqyly el damuyna üles qosatyn tūlǧalar. Mūndai ūrpaqty qalyptastyruda universitetterdıŋ rölı erekşe. Sondyqtan bız jastarǧa tek bılım ǧana emes, jauapkerşılık pen otansüigıştık ruhyn da darytuǧa küş salamyz.
- Toqaev öz sözınde bırlık, tūraqtylyq jäne jauapkerşılıgı joǧary jas ūrpaq tärbieleudıŋ maŋyzyn atap öttı. Sızdıŋşe, «ekonomikalyq patriotizm» ūǧymy Qazaqstan üşın nenı bıldıredı?
- Prezidenttıŋ pıkırınşe, qazırgı zamanda elge degen süiıspenşılıktı tek sözben emes, naqty ıspen – eŋbek, önımdılık jäne innovasiia arqyly körsetu qajet. Mıne, osy ūǧymnyŋ özegı – ekonomikalyq patriotizm.
Ekonomikalyq patriotizm – būl öz elınıŋ igılıgı üşın eŋbek etu, otandyq önımdı qoldau, jergılıktı käsıporyndardyŋ damuyna üles qosu, ūlttyq ekonomikany nyǧaituǧa müddelı bolu. Būl – är azamattyŋ öz elınıŋ bolaşaǧyna jauapkerşılıkpen qarauynyŋ jaŋa mädenietı.
Bılım men ǧylym salasynda da ekonomikalyq patriotizm – elımızdıŋ kadrlyq, ǧylymi jäne innovasiialyq äleuetın arttyru arqyly körınıs tabady.
Prezident Qasym-Jomart Toqaevtyŋ merekelık baiandamasy – eldıŋ damu baǧytyn aiqyndaityn, ruhty köteretın jäne qoǧamdy bırlıkke şaqyratyn maŋyzdy ündeu. Būl – egemen elımızdıŋ jaŋa belesterge qadam basuynyŋ aiqyn belgısı.
