Sonaý 1994 jyldyń 6 shilde kúni Qazaqstan Respýblıkasynyń Prezıdenti Nursultan Nazarbaev Joǵarǵy Keńestiń sessııasynda memleket astanasyn Arqa tósine, atap aıtqanda, Aqmola qalasyna kóshirý týraly usynysyn ortaǵa saldy. Bul usynystyń tarıhı sheshim bolatynyn dál sol kezde kópshilik tereńinen uǵyna qoımaǵany sózsiz.
Degenmen, Elbasynyń kóregendigi men
tabandylyǵy el múddesimen úndesip jatqanyn túısingender qatary kóp keshikpeı kóbeıe berdi. Sóıtip 1997 jyldyń 10 jeltoqsany kúni aq túıeniń qarny jarylǵandaı oqıǵaǵa kýá boldyq. Sol kezdegi memleket basshysy Nursultan Nazarbaevtyń eldiktiń keleshegine jasaǵan tarıhı sheshimi, ıaǵnı, memlekettiń astanasyn kóshirý týraly bastamasy dál osy kúnnen bastap resmı jaǵdaıda júzege asa bastady.
Saryarqanyń saryshunaq aıazy býyp turǵan sátte Memlekettik tý, Eltańba etalondary, Prezıdent shtandarty jańa astanaǵa ákelindi. Nursultan Nazarbaev osy bir tarıhı sáttiń ústinde eljirep, tolqyp sóıledi. Osy sátten bastap táýelsiz Qazaqstannyń astanasy resmı túrde Aqmola qalasy bolatynyn jarııa etti.
Osylaısha qala turǵyndary úshin ǵana emes, barsha qazaqstandyqtar úshin tarıhtyń jańa beti ashyldy. Ult rýhyn silkindirgen uly kósh bastaldy.
Taǵy bir aıtarymyz, eki ǵasyrdyń toǵysynda oryn alǵan qıyndyqtarǵa qaramastan memlekettiń jańa astanasyn aıqyndaǵan Qazaqstanǵa sol kezde búkil álem qaýymdastyǵy túrli qózqaraspen qaraǵany da jasyryn emes. Biraq jas memlekettiń kemel keleshegi, ulttyń baıandy bolashaǵy úshin osyndaı qadam jasaýǵa bekingen Nursultan Nazarbaev alǵan baǵytynan aınymady. Táýekelge bel býyp, jańa astanany, jas qalany salýǵa kirisip ketti.
Allaǵa shúkir, kezinde bireýge jalǵan bolǵan, bireýge arman bolǵan Nur-Sultan qalasy búgingi tańda halyqaralyq qaýymdastyq tanyǵan, moıyndaǵan qalaǵa aınaldy.
Elbasymyzdyń asqaq maqsaty oryndaldy. Astanamyz jyl ótken saıyn sáýleti men dáýleti órkendep, barsha qazaqstandyqtardyń bas ordasyna aınaldy.
Osylaısha, Qazaqstannyń damýyna serpin bergen jańa elordamyzdyń avtoryna rızashylyq sezimmen «Elorda – elimizdiń birligi, Elbasynyń erligi» dep bilemin.
Olaı bolsa, elimizdiń júregine aınalǵan elordamyzdyń mereıi árqashan ústem bola bergeı!
Ábilqasym Dosbolov,
Shymkent qalasynyń qurmetti azamaty
