Kúni keshe orys qyzy Qazaqstanda turatyn óz ultynyń ókilderine arnap, "Qazaqstan - meniń Jeruıyǵym" atty fleshmobty bastaǵan bolatyn. Búginde jan-jaqtan qoldaý taýyp, ulty orys qazaqstandyqtar paraqshalaryna beıneúndeýlerin jarııalap jatyr.
Búgin Jastar assambleıasynyń múshesi, «Obereg» ýkraındar qoǵamy jastar qanaty tóraǵasynyń orynbasary Iýlııa Lýgatkına Facebook paraqshasyna qazaq tilinde beınejazbasyn jarııalady.
“Sálemetsizder me?! Meniń esimim-Iýlııa Lagýtkına. Táýelsiz Qazaqstannyń jas azamatshasymyn. Ultym orys bolsa da, qazaq tili, qazaq halqynyń salt-dástúrleri, mádenıeti jáne tarıhy júregimde erekshe oryn alady. Biz Qazaqstan Respýblıkasynyń birtutas halqymyz. Sondyqtan elimizde eshqandaı etnosaralyq jáne ultaralyq alaýyzdyqqa jol bermeımiz. Biz birgemiz!”, -dedi beınejazbada.
Sondaı-aq, jazbasy arqyly kópti súısindirip, jeli qoldanýshylarynyń yqylasyna bólenýde.
“Ulty, dini, dástúri aıyrmashylyǵyna qaramastan, bárimizdi bir Qazaqstan halqy ekenimiz biriktiredi! Mine, 30 jyldan beri orystar, qazaqtar, belorýstar, ýkraındar, nemister, tatarlar jáne basqa da ulttar bir shańyraq astynda tatý-tátti ómir súrip jatyrmyz. Barsha qazaqstandyqtardy arandatýshylyqqa mán bermeýge shaqyramyn. Biz ulttyq jáne ultaralyq alaýyzdyqqa jol bermeımiz, óıtkeni basty baılyǵymyz – birlik, kúshimiz – san alýandyq!” ,-dedi Iýlııa jazbasynda.
“Adyrna” ulttyq portaly
