Astanada narazylyqqa shyqqan Jańaózen munaıshylary ustalǵannan keıin SOBR qyzmetkerleri olarǵa kúsh qoldanyp, dene jaraqatyn salǵanyn aıtty. Bul týraly jelide elordada qalǵan jumysshylardyń "QazMunaıGaz" ulttyq kompanııasynyń ókilderimen kelissózderi kezinde túsirilgen vıdeo paıda boldy, dep habarlaıdy “Adyrna” ulttyq portaly.
Vıdeoǵa jańaózendikter quqyq qorǵaý organdary áriptesterin urdy dep aıtqany túsken.
"Qazir poıyzben qaıtyp bara jatqan jigitterdiń biri qansyrap jatyr. Ekinshisin búırekten tepken, úshinshisi gematomadan kózin asha almaıdy", - dedi jumysshylardyń biri.
Munaıshylar eki jyldan beri ádilettilikke qol jetkize almaı kele jatqandaryn aıtty.
Eske salaıyq, 10 sáýir Jańaózendegi «BerÁli Mańǵystaý Company» mekemesiniń jumystan qysqarǵan 80-ge tarta jumysshysy Astanaǵa kelip, Energetıka mınıstrligi ǵımaratynyń aldyna narazylyq bildirdi. Olardyń bári «Ózenmunaıgaz» kompanııasynan jumys talap etti. Jumyssyz qalǵan jańaózendikter máselemiz sheshilmeı mınıstrlik aldynan ketpeımiz dedi. Olar tańdy sol jerde atyrdy.
Energetıka mınıstri Almasadam Sátqalıev munaıshylardyń talaby áli aıqyn emestigin aıtqan.
Al premer-mınıstrdiń orynbasary Altaı Kólginov jańaózendik jumysshylardyń tenderden utylǵan kompanııanyń qaıtadan utyp shyǵýyn talap etýi durys emestigin málimdedi.
Keıinnen jumysshylar «QazMunaıGaz» UK AQ basshylyǵy usynǵan jumys oryndarynan bas tartqany habarlandy.
11 sáýir kúni keshke pıket uıymdastyrǵan Jańaózen munaıshylaryn qaýipsizdik qyzmetkerleri ustap áketti. Jerlesteriniń ustalǵanyn estigen boıda Jańaózende jergilikti kásiporyndardyń qyzmetkerleri Qasym-Jomart Toqaevqa úndeý jasap, Astanada ustalǵan jumysshylardy bosatýdy talap etti.
Kóp uzamaı Jańaózen qalasynyń ákimi jınalǵandarǵa beıneótinish jasap, máseleni túsindirdi, sabyrlyqqa shaqyrdy.
12 sáýir kúni tańerteń jańaózendik munaıshylar úılerine qaıtyp bara jatqandaryn málimdep, jerlesterine alǵys aıtty.
Bas prokýratýranyń dereginshe, Astanada Jańaózennen kelgen 126 adam ustalǵan. Olardyń beseýi “beıbit jıyn ótkizý tártibin buzý” baby boıynsha eskertý túrinde jaza taǵaıyndalǵan.
