سوناۋ 1994 جىلدىڭ 6 شىلدە كۇنى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ جوعارعى كەڭەستىڭ سەسسياسىندا مەملەكەت استاناسىن ارقا توسىنە، اتاپ ايتقاندا، اقمولا قالاسىنا كوشىرۋ تۋرالى ۇسىنىسىن ورتاعا سالدى. بۇل ۇسىنىستىڭ تاريحي شەشىم بولاتىنىن ءدال سول كەزدە كوپشىلىك تەرەڭىنەن ۇعىنا قويماعانى ءسوزسىز.
دەگەنمەن، ەلباسىنىڭ كورەگەندىگى مەن
تاباندىلىعى ەل مۇددەسىمەن ۇندەسىپ جاتقانىن تۇيسىنگەندەر قاتارى كوپ كەشىكپەي كوبەيە بەردى. ءسويتىپ 1997 جىلدىڭ 10 جەلتوقسانى كۇنى اق تۇيەنىڭ قارنى جارىلعانداي وقيعاعا كۋا بولدىق. سول كەزدەگى مەملەكەت باسشىسى نۇرسۇلتان نازارباەۆتىڭ ەلدىكتىڭ كەلەشەگىنە جاساعان تاريحي شەشىمى، ياعني، مەملەكەتتىڭ استاناسىن كوشىرۋ تۋرالى باستاماسى ءدال وسى كۇننەن باستاپ رەسمي جاعدايدا جۇزەگە اسا باستادى.
سارىارقانىڭ سارىشۇناق ايازى بۋىپ تۇرعان ساتتە مەملەكەتتىك تۋ، ەلتاڭبا ەتالوندارى، پرەزيدەنت شتاندارتى جاڭا استاناعا اكەلىندى. نۇرسۇلتان نازارباەۆ وسى ءبىر تاريحي ءساتتىڭ ۇستىندە ەلجىرەپ، تولقىپ سويلەدى. وسى ساتتەن باستاپ تاۋەلسىز قازاقستاننىڭ استاناسى رەسمي تۇردە اقمولا قالاسى بولاتىنىن جاريا ەتتى.
وسىلايشا قالا تۇرعىندارى ءۇشىن عانا ەمەس، بارشا قازاقستاندىقتار ءۇشىن تاريحتىڭ جاڭا بەتى اشىلدى. ۇلت رۋحىن ءسىلكىندىرگەن ۇلى كوش باستالدى.
تاعى ءبىر ايتارىمىز، ەكى عاسىردىڭ توعىسىندا ورىن العان قيىندىقتارعا قاراماستان مەملەكەتتىڭ جاڭا استاناسىن ايقىنداعان قازاقستانعا سول كەزدە بۇكىل الەم قاۋىمداستىعى ءتۇرلى قوزقاراسپەن قاراعانى دا جاسىرىن ەمەس. بىراق جاس مەملەكەتتىڭ كەمەل كەلەشەگى، ۇلتتىڭ باياندى بولاشاعى ءۇشىن وسىنداي قادام جاساۋعا بەكىنگەن نۇرسۇلتان نازارباەۆ العان باعىتىنان اينىمادى. تاۋەكەلگە بەل بۋىپ، جاڭا استانانى، جاس قالانى سالۋعا كىرىسىپ كەتتى.
اللاعا شۇكىر، كەزىندە بىرەۋگە جالعان بولعان، بىرەۋگە ارمان بولعان نۇر-سۇلتان قالاسى بۇگىنگى تاڭدا حالىقارالىق قاۋىمداستىق تانىعان، مويىنداعان قالاعا اينالدى.
ەلباسىمىزدىڭ اسقاق ماقساتى ورىندالدى. استانامىز جىل وتكەن سايىن ساۋلەتى مەن داۋلەتى وركەندەپ، بارشا قازاقستاندىقتاردىڭ باس ورداسىنا اينالدى.
وسىلايشا، قازاقستاننىڭ دامۋىنا سەرپىن بەرگەن جاڭا ەلوردامىزدىڭ اۆتورىنا ريزاشىلىق سەزىممەن «ەلوردا – ەلىمىزدىڭ بىرلىگى، ەلباسىنىڭ ەرلىگى» دەپ بىلەمىن.
ولاي بولسا، ەلىمىزدىڭ جۇرەگىنە اينالعان ەلوردامىزدىڭ مەرەيى ارقاشان ۇستەم بولا بەرگەي!
ابىلقاسىم دوسبولوۆ،
شىمكەنت قالاسىنىڭ قۇرمەتتى ازاماتى
