«Adyrnada» Ekibastuz qalasyna qatysty materıaldar legi shyǵa bastaǵaly bizge kendi qaladan habarlasýshylar kóbeıip tur. Solardyń bir toby – muǵalimder.
Biri «zeınetaqy aýdarymdarymyz túspeı jatyr», endi biri «otpýsknoıymyzdy ala almaı otyrmyz» dep habarlasady. Bul jaıttar tereńirek anyqtaýdy qajet etetindikten, birden jarııalaı almadyq. Degenmen birqatar ata-ananyń janaıqaıyn jasyrǵan jón bolmas dep sheshtik.
- Taıaý arada qalamyzǵa Pavlodar oblysynyń ákimi Ábilqaıyr Sqaqov jumys saparymen kelip ketti. Ákimniń aldynda Natalıa Nefedova jobasyn qorǵap, «Qaınar» shyǵarmashylyq ortalyǵyna jańa ǵımarat suraǵan kórinedi. Kezinde bıliktegiler qalamyzdaǵy tuńǵysh qazaq mektebinen sol ǵımaratty tartyp alǵandaı etip alyp, «Qaınarǵa» berip edi. Bulaı ǵımarat izdeıtin bolsa, tarıhı mektepti ornynda qaldyrýy kerek edi edi? Baıqaımyz, Nefedova ózine jaqqan adamdardy, ózimen jaqyn qatynastaǵy adamdar basqaratyn mekemelerdi ǵana kótermeleıdi eken. Ózimen jaqsy aralasatyn Tatıana Shmıdtke Altynsarın medalin áperýge yqpal etti. Ekibastuzda Shmıdt hanymnyń aldyn júz oraıtyn ult ustazdary jeterlik. Olardy nege baıqamaıdy?! Qyzdar gımnazııasynyń qyz balalary ózge mekteptiń bosaǵasynda kózderi jáýteńdep otyr. Olardy kózge ilmeı, «Qaınarǵa» ǵımarat suraǵanyn qalaı túsinemiz?
Sonymen qatar, Ekibastuzǵa talaı júlde ákelgen kórkemsýret mektebi eski úıdiń óńi qashqan ǵımaratynda, bylaısha aıtsań, podval tektes bir eleýsiz orynda otyr. Estetıkany qoldan jasaıtyn jas sheberlerdiń osyndaı byt-shyt jerde otyrǵanyn basshylar nege kórmeıdi? – deıdi ata-analar.
Biz anyqtaǵan taǵy bir jaıt, Áshimbetov myrza ákim bolǵan tusta Ekibastuz basshylary kórkemsýret mektebiniń muǵalimderin qulsha jegip, Ekibastuzǵa kire beristegi kórneki jerlerdi, qalanyń aıaldamalaryn syrlatypty. Klassıkalyq óner sheberlerin eden jýýshy dárejesine túsirgen ǵoı, qarapaıym tilmen aıtqanda. Biraq sýretshi-muǵalimder áli kúnge deıin sol eńbegi úshin aqshasyn ala almaı júr eken. Qatty daýystap talap eteıin dese, bilim bóliminiń basshysy Jazıra Hamzabaeva sońdaryna túsip ala ma dep qorqatyn sııaqty.
Osy jarııalanym has óner ıeleriniń adal eńbeginiń aqysyn alýǵa septigin tıgizse, nur ústine nur bolar deımiz.
Asýan Taıjan,
Pavlodar oblysy
