«ادىرنادا» ەكىباستۇز قالاسىنا قاتىستى ماتەريالدار لەگى شىعا باستاعالى بىزگە كەندى قالادان حابارلاسۋشىلار كوبەيىپ تۇر. سولاردىڭ ءبىر توبى – مۇعالىمدەر.
ءبىرى «زەينەتاقى اۋدارىمدارىمىز تۇسپەي جاتىر»، ەندى ءبىرى «وتپۋسكنويىمىزدى الا الماي وتىرمىز» دەپ حابارلاسادى. بۇل جايتتار تەرەڭىرەك انىقتاۋدى قاجەت ەتەتىندىكتەن، بىردەن جاريالاي المادىق. دەگەنمەن بىرقاتار اتا-انانىڭ جانايقايىن جاسىرعان ءجون بولماس دەپ شەشتىك.
- تاياۋ ارادا قالامىزعا پاۆلودار وبلىسىنىڭ اكىمى ابىلقايىر سقاقوۆ جۇمىس ساپارىمەن كەلىپ كەتتى. اكىمنىڭ الدىندا ناتاليا نەفەدوۆا جوباسىن قورعاپ، «قاينار» شىعارماشىلىق ورتالىعىنا جاڭا عيمارات سۇراعان كورىنەدى. كەزىندە بيلىكتەگىلەر قالامىزداعى تۇڭعىش قازاق مەكتەبىنەن سول عيماراتتى تارتىپ العانداي ەتىپ الىپ، «قاينارعا» بەرىپ ەدى. بۇلاي عيمارات ىزدەيتىن بولسا، تاريحي مەكتەپتى ورنىندا قالدىرۋى كەرەك ەدى ەدى؟ بايقايمىز، نەفەدوۆا وزىنە جاققان ادامداردى، وزىمەن جاقىن قاتىناستاعى ادامدار باسقاراتىن مەكەمەلەردى عانا كوتەرمەلەيدى ەكەن. وزىمەن جاقسى ارالاساتىن تاتيانا شميدتكە التىنسارين مەدالىن اپەرۋگە ىقپال ەتتى. ەكىباستۇزدا شميدت حانىمنىڭ الدىن ءجۇز ورايتىن ۇلت ۇستازدارى جەتەرلىك. ولاردى نەگە بايقامايدى؟! قىزدار گيمنازياسىنىڭ قىز بالالارى وزگە مەكتەپتىڭ بوساعاسىندا كوزدەرى جاۋتەڭدەپ وتىر. ولاردى كوزگە ىلمەي، «قاينارعا» عيمارات سۇراعانىن قالاي تۇسىنەمىز؟
سونىمەن قاتار، ەكىباستۇزعا تالاي جۇلدە اكەلگەن كوركەمسۋرەت مەكتەبى ەسكى ءۇيدىڭ ءوڭى قاشقان عيماراتىندا، بىلايشا ايتساڭ، پودۆال تەكتەس ءبىر ەلەۋسىز ورىندا وتىر. ەستەتيكانى قولدان جاسايتىن جاس شەبەرلەردىڭ وسىنداي بىت-شىت جەردە وتىرعانىن باسشىلار نەگە كورمەيدى؟ – دەيدى اتا-انالار.
ءبىز انىقتاعان تاعى ءبىر جايت، اشىمبەتوۆ مىرزا اكىم بولعان تۇستا ەكىباستۇز باسشىلارى كوركەمسۋرەت مەكتەبىنىڭ مۇعالىمدەرىن قۇلشا جەگىپ، ەكىباستۇزعا كىرە بەرىستەگى كورنەكى جەرلەردى، قالانىڭ ايالدامالارىن سىرلاتىپتى. كلاسسيكالىق ونەر شەبەرلەرىن ەدەن جۋشى دارەجەسىنە تۇسىرگەن عوي، قاراپايىم تىلمەن ايتقاندا. بىراق سۋرەتشى-مۇعالىمدەر ءالى كۇنگە دەيىن سول ەڭبەگى ءۇشىن اقشاسىن الا الماي ءجۇر ەكەن. قاتتى داۋىستاپ تالاپ ەتەيىن دەسە، ءبىلىم ءبولىمىنىڭ باسشىسى جازيرا حامزاباەۆا سوڭدارىنا ءتۇسىپ الا ما دەپ قورقاتىن سياقتى.
وسى جاريالانىم حاس ونەر يەلەرىنىڭ ادال ەڭبەگىنىڭ اقىسىن الۋعا سەپتىگىن تيگىزسە، نۇر ۇستىنە نۇر بولار دەيمىز.
اسۋان تايجان،
پاۆلودار وبلىسى
