Shýaqty kóktemniń alǵashqy kúni taǵy bir merekemen tolysty. Tuńǵysh ret atalyp otyrǵan «Alǵys aıtý kúnine» oraı seriktestigimizdiń jastarǵa arnalǵan josparly sharasy jalǵasyn tapty. «Ulas-elektron» JShS-niń ult murasyn urpaqqa nasıhattaýǵa arnalǵan «Máńgilik eldiń máńgilik qundylyqtary» taqyrybyndaǵy arnaıy jobasy aıasynda kezekti taǵylymy tereń is-shara ótti. Almaty tehnologııalyq ýnıversıtetiniń qoldaýymen ótken merekelik keshte Qurmanǵazy atyndaǵy qazaq ulttyq konservatorııasynyń oqytýshysy, QR eńbek sińirgen qaıratkeri Erkin Shúkiman asqaqtata án saldy, tyńdaýshylar qoshemettep tamsandy. QR eńbek sińirgen qaıratkeri, kúıshi, ustaz Murat Ábýǵazy kúmbirlete kúı tógip, jastardyń júrek qylyn terbedi. Qazaq memlekettik qyzdar pedagogıkalyq ýnıversıteti baspasynyń dırektory, QR mádenıet qaıratkeri, aqyn Serik Qalıev jyrdan shashý shashyp, jıylǵan jurtty jelpindirdi. Arnaıy qonaq retinde belgili qoǵam qaıratkeri Asyly Osman, Almaty qalasyndaǵy etnomádenı ortalyq qyzmetkerleri shaqyryldy. Oqý ornynyń stýdentteri dástúrli ónerdiń tunyǵynan sýsyndap, babalar murasyna, kıeli ónerdiń búgingi nasıhatshylaryna rızashylyq bildirdi.
Aıshat OMAROVA,
Almaty tehnologııalyq ýnıversıteti Jastar keńesiniń tóraıymy:
– «Ulas-Elektron» JShS-niń búgingi tańda qazaqtyń dástúrli ónerin nasıhattap, áýezdi áni men kúıin úndestire otyryp, kezdesý ótkizýi quptarlyq is, ásirese, biz sııaqty tehnıkalyq mamandar daıyndaıtyn joǵary oqý oryndarynda keleli is-sharalar ótkizip, jastardyń ulttyq rýhyn oıatyp, jigerlendirip, ultjandylyqqa baýlyp júrgeni kóńil qýantarlyq. Al, búgin bizdiń bilim ordamyzda «Alǵys aıtý» kúnine oraı keremet kezdesý uıymdastyryldy. Stýdentterimiz rýhanı azyq alyp, qazaqtyń ejelden kele jatqan dástúrli án-kúı ónerimen jandúnıesin baıytyp, patrıottyq sezimderin oıatty. Sol sebepti de «Ulas-Elektron» kompanııasy ujymyna stýdentter atynan alǵysymdy bildiremin! – dedi.
Ózge dıaspora ókilderiniń stýdentteri qazaq halqyna alǵysyn bildirip, júrek sózderin aıtty.
Baqytjamal RAQYMJANOVA,
Almaty tehnologııalyq ýnıversıtetiniń stýdenti (tatar ultynyń ókili):
– Búgingi 1 naýryz – Alǵys aıtý kúnimen barshańyzdy quttyqtaımyn! Ózge ult ókilderi qazaqtyń shańyraǵy astynda tatý-tátti turyp jatqanyna, árıne, qýanyshtymyz. Myna bizderdi jatsynbaı, bólip-jarmaı, baýyryna basyp otyrǵan qazaq baýyrlarymyzǵa myń da bir alǵys!
Dıana ROLOVA,
Almaty tehnologııalyq ýnıversıtetiniń stýdenti (orys ultynyń ókili):
– Elimizde alǵash toılanyp jatqan merekemen qazaq halqyn quttyqtaımyn! 130-dan astam ózge ult urpaqtary meken etken Qazaqstan memleketine dál osyndaı mereke qajet dep oılaımyn. Bul – bizdi búginge deıin óz balasyndaı kórip, qolda baryn aıamaǵan qazaq jurtshylyǵyna ystyq yqylasymyzdy bildirýge taptyrmas múmkindik desem da artyq emes… – dep, aǵynan jaryldy.
Baǵzydan kele jatqan ulttyq mýzykalyq qazynamyzǵa syzat túsirmeı, shashaýyn shyǵarmaı saqtaý, ony álemge pash etý – ulttyq mádenıetti zamana kóshinen qaldyrmaýdyń qamy. Sondyqtan da jyrshy, dástúrli ánshiler men kúıshilerimiz kóneden kele atqan án men termeni, qudyretti kúı sazyn jas býynǵa nasıhattaýdan jalyqqan emes. Halyqtyq ónerdiń ókilderin jastarmen jıi qaýyshýǵa dánekerlik jasap júrgen seriktestiktiń basty maqsaty – uly muralardy urpaq sanasynda jańǵyrtyp, jandandyryp, tereń tanym qalyptastyrýǵa yqpal etý. Tól ónerimizdi tynbaı nasıhattap kele jatqan seriktestigimizdiń nátıjeli jumysy aldaǵy ýaqytta da jalǵasa bermek.
Juldyzaı ÁBDIMANAPQYZY, "Almaty aqshamy".
