Bügın Şymkentte qalalyq Qazaqstan halqy Assambleiasy janyndaǧy etnomädeni bırlestıkterdıŋ atsalysuymen dästürlı «Qazaq dastarhany» festivalı öttı.
Etnos ökılderın qoǧamdyq bastamalarǧa ūiystyru arqyly memleket qūrauşy qazaq halqynyŋ maŋaiyna toptastyru, ūltymyzdyŋ qonaqjailyq, syilastyq syndy igı dästürın därıpteudı közdegen igı ıs-şaraǧa qalalyq ışkı saiasat jäne jastar ısterı jönındegı basqarmasynyŋ basşysy, qalalyq QHA janyndaǧy Aqsaqaldar keŋesı, Analar keŋesı syndy qoǧamdyq qūrylymdarynyŋ jetekşılerı men müşelerı, ziialy qauym, qalalyq etnomädeni bırlestıkterdıŋ töraǧalary men belsendılerı jäne BAQ ökılderı qatysty.
Ötken jyldary et asudan, qazaqtyŋ ūlttyq taǧamdaryn äzırleuden jäne ūltymyzdyŋ ūmyt bola bastaǧan taǧamdaryn daiyndaudan özara saiysqa tüsken etnos ökılderı biyl qazaq taǧamdarynan dastarhan jaiyp, qalyŋ köpşılıktıŋ nazaryna ūsyndy. Ortaq qazanda et asyp, är üstel basyndaǧy qonaqtarǧa türlı ūlttyq taǧamdar men tabaq tartu arqyly qazaqtyŋ salt-dästürı men dastarhan mädenietın meŋgergenın jūrtşylyqqa paş ettı.
Etnos ökılderın bır arnaǧa ūiystyryp, maŋyzdy qūndylyqtardy därıpteitın festivaldıŋ mazmūnyn tılge tiek etken qalalyq ışkı saiasat jäne jastar ısterı jönındegı basqarmasynyŋ basşysy atalǧan ıs-şaranyŋ jalpyūlttyq qūndylyqtardy öskeleŋ ūrpaq jadynda jaŋǧyrtuǧa septesetının aitty.
– Ötkenımız ben bügınımızdı salystyrǧan janǧa bügıngı ıs-şaranyŋ mänın ūǧu asa qiyn emes. Keŋestık däuırde qazaq elıne jer audarylǧandar aldyŋǧy buynnyŋ keŋ peiılı men darhan dastarhanynyŋ arqasynda osy künge aman-esen jettı.
Syilastyq, dostyq, qonaqjailyq – būl ūǧymdar barşa otandastarymyzdyŋ dünietanymy men ömır saltynyŋ negızınde jatyr. Osyndai qūndylyqtardyŋ arqasynda bızdıŋ ortaq üiımız – Qazaqstanda beibıtşılık pen qoǧamdyq kelısım saqtalyp otyr, dedı Aigerım Jūmaǧūlova.
Dastarhan basynda bata bergen qalalyq QHA janyndaǧy Aqsaqaldar keŋesınıŋ töraǧasy Orynbai Rahmanberdiev «Qazaq dastarhany» festivalınıŋ maqsaty – as ışıp, ydys bosatu emes. Bügınde barşamyzdyŋ Qazaqstan dep atalatyn memlekette tatu-tättı ǧūmyr keşıp jatqanymyzdy jūrtşylyqqa jetkızu. Bır qazannan as ışıp, bır dastarhan basynda basqosyp, özara syilastyqpen, tatulyqpen tūryp jatqanymyzdy körsetudı közdeitının basa aitty.
Festival barysynda qalalyq «Salt-dästür jäne ädet-ǧūryp ortalyǧynyŋ» mamandary ūlttyq qazaqtyŋ salt-dästürı men ūlttyq taǧamdary turaly jan-jaqty maǧlūmat berdı.
Biyl atalǧan ıs-şaraǧa alǧaş ret qatysqan qalalyq «Assambleia jastary» ūiymynyŋ ökılı Nurali Guseinov «Qazaq dastarhany» festivalı köŋılınen şyqqanyn aitty.
– Ülken atam bızge qazaq halqyna qūrmet körsetu turaly jiı aitatyn. Jer audarylyp, Qazaqstanǧa kelgende qazaqtardyŋ bauyryna tartyp, dastarhanyndaǧy nanymen, qūrtymen bölıskenımen köp eske alatyn. Işıp-jeuden qinalǧanda qazaqtardyŋ üiıne şaqyryp, mata dastarhanyn aşqanda ärqaisymyzǧa bır-bır qūrttan nemese bır üzım nannan tiıp baqyttan basymyz ainalatyn deitın.
Qazaq dastarhany – bereke bastauy. Sebebı, qanşama ūlt pen ūlysty demep, qolyndaǧy barymen bölısu kez kelgen halyqtyŋ qolynan kele bermeidı. Öz basym qazaq elıne, qazaq halqyna, qazaq dastarhanyna jäne qazaqtyŋ keŋ peiılıne aitar alǧysym şeksız, deidı Nurali Ahmadūly.
Aita keteiık, Qazaqstan halqy Assambleiasynyŋ «Qazaqtanu» jobasy aiasynda qolǧa alynǧan «Qazaq dastarhany» festivalı alǧaş ret 2015 jyly Şymkentte qalasynda bastau alǧan bolatyn. Jyl saiyn türlı formatta ötetın festival qalalyq assambleianyŋ ūiytqy boluymen biyl toǧyzynşy ret ūiymdastyryldy.
