شۋاقتى كوكتەمنىڭ العاشقى كۇنى تاعى ءبىر مەرەكەمەن تولىستى. تۇڭعىش رەت اتالىپ وتىرعان «العىس ايتۋ كۇنىنە» وراي سەرىكتەستىگىمىزدىڭ جاستارعا ارنالعان جوسپارلى شاراسى جالعاسىن تاپتى. «ۇلاس-ەلەكترون» جشس-ءنىڭ ۇلت مۇراسىن ۇرپاققا ناسيحاتتاۋعا ارنالعان «ماڭگىلىك ەلدىڭ ماڭگىلىك قۇندىلىقتارى» تاقىرىبىنداعى ارنايى جوباسى اياسىندا كەزەكتى تاعىلىمى تەرەڭ ءىس-شارا ءوتتى. الماتى تەحنولوگيالىق ۋنيۆەرسيتەتىنىڭ قولداۋىمەن وتكەن مەرەكەلىك كەشتە قۇرمانعازى اتىنداعى قازاق ۇلتتىق كونسەرۆاتورياسىنىڭ وقىتۋشىسى، قر ەڭبەك سىڭىرگەن قايراتكەرى ەركىن شۇكىمان اسقاقتاتا ءان سالدى، تىڭداۋشىلار قوشەمەتتەپ تامساندى. قر ەڭبەك سىڭىرگەن قايراتكەرى، كۇيشى، ۇستاز مۇرات ابۋعازى كۇمبىرلەتە كۇي توگىپ، جاستاردىڭ جۇرەك قىلىن تەربەدى. قازاق مەملەكەتتىك قىزدار پەداگوگيكالىق ۋنيۆەرسيتەتى باسپاسىنىڭ ديرەكتورى، قر مادەنيەت قايراتكەرى، اقىن سەرىك قاليەۆ جىردان شاشۋ شاشىپ، جيىلعان جۇرتتى جەلپىندىردى. ارنايى قوناق رەتىندە بەلگىلى قوعام قايراتكەرى اسىلى وسمان، الماتى قالاسىنداعى ەتنومادەني ورتالىق قىزمەتكەرلەرى شاقىرىلدى. وقۋ ورنىنىڭ ستۋدەنتتەرى ءداستۇرلى ونەردىڭ تۇنىعىنان سۋسىنداپ، بابالار مۇراسىنا، كيەلى ونەردىڭ بۇگىنگى ناسيحاتشىلارىنا ريزاشىلىق ءبىلدىردى.
ايشات وماروۆا،
الماتى تەحنولوگيالىق ۋنيۆەرسيتەتى جاستار كەڭەسىنىڭ ءتورايىمى:
– «ۇلاس-ەلەكترون» جشس-ءنىڭ بۇگىنگى تاڭدا قازاقتىڭ ءداستۇرلى ونەرىن ناسيحاتتاپ، اۋەزدى ءانى مەن كۇيىن ۇندەستىرە وتىرىپ، كەزدەسۋ وتكىزۋى قۇپتارلىق ءىس، اسىرەسە، ءبىز سياقتى تەحنيكالىق ماماندار دايىندايتىن جوعارى وقۋ ورىندارىندا كەلەلى ءىس-شارالار وتكىزىپ، جاستاردىڭ ۇلتتىق رۋحىن وياتىپ، جىگەرلەندىرىپ، ۇلتجاندىلىققا باۋلىپ جۇرگەنى كوڭىل قۋانتارلىق. ال، بۇگىن ءبىزدىڭ ءبىلىم وردامىزدا «العىس ايتۋ» كۇنىنە وراي كەرەمەت كەزدەسۋ ۇيىمداستىرىلدى. ستۋدەنتتەرىمىز رۋحاني ازىق الىپ، قازاقتىڭ ەجەلدەن كەلە جاتقان ءداستۇرلى ءان-كۇي ونەرىمەن جاندۇنيەسىن بايىتىپ، پاتريوتتىق سەزىمدەرىن وياتتى. سول سەبەپتى دە «ۇلاس-ەلەكترون» كومپانياسى ۇجىمىنا ستۋدەنتتەر اتىنان العىسىمدى بىلدىرەمىن! – دەدى.
وزگە دياسپورا وكىلدەرىنىڭ ستۋدەنتتەرى قازاق حالقىنا العىسىن ءبىلدىرىپ، جۇرەك سوزدەرىن ايتتى.
باقىتجامال راقىمجانوۆا،
الماتى تەحنولوگيالىق ۋنيۆەرسيتەتىنىڭ ستۋدەنتى (تاتار ۇلتىنىڭ وكىلى):
– بۇگىنگى 1 ناۋرىز – العىس ايتۋ كۇنىمەن بارشاڭىزدى قۇتتىقتايمىن! وزگە ۇلت وكىلدەرى قازاقتىڭ شاڭىراعى استىندا تاتۋ-ءتاتتى تۇرىپ جاتقانىنا، ارينە، قۋانىشتىمىز. مىنا بىزدەردى جاتسىنباي، ءبولىپ-جارماي، باۋىرىنا باسىپ وتىرعان قازاق باۋىرلارىمىزعا مىڭ دا ءبىر العىس!
ديانا رولوۆا،
الماتى تەحنولوگيالىق ۋنيۆەرسيتەتىنىڭ ستۋدەنتى (ورىس ۇلتىنىڭ وكىلى):
– ەلىمىزدە العاش تويلانىپ جاتقان مەرەكەمەن قازاق حالقىن قۇتتىقتايمىن! 130-دان استام وزگە ۇلت ۇرپاقتارى مەكەن ەتكەن قازاقستان مەملەكەتىنە ءدال وسىنداي مەرەكە قاجەت دەپ ويلايمىن. بۇل – ءبىزدى بۇگىنگە دەيىن ءوز بالاسىنداي كورىپ، قولدا بارىن اياماعان قازاق جۇرتشىلىعىنا ىستىق ىقىلاسىمىزدى بىلدىرۋگە تاپتىرماس مۇمكىندىك دەسەم دا ارتىق ەمەس… – دەپ، اعىنان جارىلدى.
باعزىدان كەلە جاتقان ۇلتتىق مۋزىكالىق قازىنامىزعا سىزات تۇسىرمەي، شاشاۋىن شىعارماي ساقتاۋ، ونى الەمگە پاش ەتۋ – ۇلتتىق مادەنيەتتى زامانا كوشىنەن قالدىرماۋدىڭ قامى. سوندىقتان دا جىرشى، ءداستۇرلى انشىلەر مەن كۇيشىلەرىمىز كونەدەن كەلە اتقان ءان مەن تەرمەنى، قۇدىرەتتى كۇي سازىن جاس بۋىنعا ناسيحاتتاۋدان جالىققان ەمەس. حالىقتىق ونەردىڭ وكىلدەرىن جاستارمەن ءجيى قاۋىشۋعا دانەكەرلىك جاساپ جۇرگەن سەرىكتەستىكتىڭ باستى ماقساتى – ۇلى مۇرالاردى ۇرپاق ساناسىندا جاڭعىرتىپ، جانداندىرىپ، تەرەڭ تانىم قالىپتاستىرۋعا ىقپال ەتۋ. ءتول ونەرىمىزدى تىنباي ناسيحاتتاپ كەلە جاتقان سەرىكتەستىگىمىزدىڭ ناتيجەلى جۇمىسى الداعى ۋاقىتتا دا جالعاسا بەرمەك.
جۇلدىزاي ابدىماناپقىزى، "الماتى اقشامى".
