Jas jazýshy Álıhan Jaqsylyq ádebı uıymdardan túbegeıli ketetinin málimdedi. Bul týraly ol Facebook paraqshasynda jazdy, dep habarlaıdy “Adyrna”.
Jazýshynyń aıtýynsha, ol endi báıgeler men marapattarǵa úmit artpaıdy, tek jazý jáne naryqpen aınalysýdy maqsat tutady.
“Kúrt burylys jasaıtyn ýaqytym kelipti. Sezdim… Kóptegen ádebı topqa, ádebı uıymdarǵa, klýbtarǵa múshe edim. San márte keshirim suraı otyryp men sizdermen qoshtasatynymdy aıtqym keledi.
Men úshin keremet tájirıbe boldy, erekshe qoldaýǵa ıe boldym. Biraq ózime syrt kózben qarasam aǵa býynnyń, úlken býynnyń izimen ketip bara jatyr ekenmin. Ne isteý kerek? Endigi sharýam, endigi jumysym tek jazý jáne naryqpen istes bolý. Oqyrman qaýymmen jumys jasaý. Ádebı ortalardyń maqsaty syılyqqa, marapatqa, ordenge usynýǵa arnalǵandaı. Men endi báıgeler men konkýrstardy, stıpendııalar men granttardy ańdymaımyn dep sheshtim. Taǵy da myń márte keshirim suraımyn”, dep jazdy jazýshi.
Sondaı-aq, ol endi tek jazýshy jáne oqyrman degen ustanymmen ómir súretinin aıtty.
“Jazýshylar Odaǵynan, sondaı-aq barlyq ádebıetke qatysty, mınıstrlik tarapynan qurylǵan uıymdar men klýbtardyń bárinen ketetinimdi, shyǵatynymdy rastaımyn. Taǵy da myń márte keshirim suraımyn.
Túsinistikpen qarańyzdar, maǵan jumys jasaý kerek, men endi eshkimge jaltaqtamaı tek oqyrmanǵa kitabymdy satyp, jazýymdy damytqym keledi.
Sondaı-aq ádebı jınalystar, sharalar, ádebı mazmundaǵy keshter, Respýblıkalyq otyrystar, taǵy da basqa bas qosýlardyń bárinde endi bolmaımyn.
Barshańyzǵa alǵys! Meni qoldaǵan barsha Ádebı Ortalarǵa, Klýbtarǵa myń alǵys aıta otyra sizdermen máńgige qoshtasamyn!
Endi eshqaıda múshe emespin, eshkim emespin, qarapaıym jazýshymyn, saýdagermin! Oqyrman júreginde bolsam jetedi…” dedi Álıhan Jaqsylyq.
Aıta ketsek, Álıhan Jaqsylyq qazaq ádebıetine jańalyq bolyp kelgen jas jazýshy. “Notr-damda qulshylyq etý kerek pe?”, “Afrıkadan Alıaskaǵa”, “Eski vokzaldyń jolaýshylary” romandarynyń, “Alty qurlyq”, “Tórt muhıt” hıkaıattar jınaǵynyń avtory. Ulybrıtanııanyń “Alty buǵy” ádebı syılyǵyn jeńip alǵan. “Daryn” memlekettik jastar syılyǵynyń laýreaty. Shyǵarmalary aǵylshyn, túrik tilderine aýdarylyp basyp shyǵarylǵan.
Eske salaıyq, buǵan deıin Álıhan Jaqsylyq belgili aqyn, aıtys júrgizýshisi Júrsin Ermanǵa nazyn áleýmettik jelide jetkizgen edi.
Júrsin Erman aqyn Muhtar Nııazovqa bergen suhbatynda bir kezderi aıtys sahnasynda óner kórsetken keıin prozaǵa bet burǵan Álıhan Jaqsylyqty tilge tıek etken.
“Qazirgi jastar taıyz sýda júrgen qaıyq sııaqty. Kóńil kónshitpeıdi. Qoldan jasaǵan qaıǵy qasiretteri bar. Sony aıtady. Jyn-shaıtan sony jazady. Álıhan Jaqsylyq degen jigit boldy ǵoı bizde. Sony áýelde álpeshtep edik. Sonyń jolyna túsip ketti. Osyndaı jastar kóbeıip ketti. Bireýdiń jolyn keseıin degenim joq.Ómirdiń aqıqatyn jazý kerek. Jyn-shaıtan injildi jazǵandar tolyp jatyr. Ishimizge túspeıdi”, – degen edi Júrsin Erman.
Osydan keıin Álıhan Jaqsylyq Júrsin Ermanǵa renishin jasyrmaı, áleýmettik jelidegi paraqshasynda aǵynan jaryldy.
"Qoldan jasalǵan qaıǵy qasiretter jazady" degen sózin túsinbedim. Men shyǵarmada eshqashan ózim jaıly, ózimniń jeke basym týraly jazyp kórmeppin. Júrsin Erman atamyzdyń neni meńzep, qaı shyǵarmam jaıly aıtyp otyrǵanyn bilmedim… Ata! Men bázbireýler qusap eńirep jylap, qoldan taǵdyr jasap júrgen joqpyn. Dúnıede bar zatty jazyp, kitabymdy satyp jaıyma júrmin. Shaıtanǵa erdi deıtindeı bir jerde birdeńe istep otyrǵanymdy kórdińiz be?”- deıdi Álıhan Jaqsylyq.
