Jas jazuşy Älihan Jaqsylyq ädebi ūiymdardan tübegeilı ketetının mälımdedı. Būl turaly ol Facebook paraqşasynda jazdy, dep habarlaidy “Adyrna”.
Jazuşynyŋ aituynşa, ol endı bäigeler men marapattarǧa ümıt artpaidy, tek jazu jäne naryqpen ainalysudy maqsat tūtady.
“Kürt būrylys jasaityn uaqytym kelıptı. Sezdım… Köptegen ädebi topqa, ädebi ūiymdarǧa, klubtarǧa müşe edım. San märte keşırım sūrai otyryp men sızdermen qoştasatynymdy aitqym keledı.
Men üşın keremet täjıribe boldy, erekşe qoldauǧa ie boldym. Bıraq özıme syrt közben qarasam aǧa buynnyŋ, ülken buynnyŋ ızımen ketıp bara jatyr ekenmın. Ne ısteu kerek? Endıgı şaruam, endıgı jūmysym tek jazu jäne naryqpen ıstes bolu. Oqyrman qauymmen jūmys jasau. Ädebi ortalardyŋ maqsaty syilyqqa, marapatqa, ordenge ūsynuǧa arnalǧandai. Men endı bäigeler men konkurstardy, stipendiialar men granttardy aŋdymaimyn dep şeştım. Taǧy da myŋ märte keşırım sūraimyn”, dep jazdy jazuşı.
Sondai-aq, ol endı tek jazuşy jäne oqyrman degen ūstanymmen ömır süretının aitty.
“Jazuşylar Odaǧynan, sondai-aq barlyq ädebietke qatysty, ministrlık tarapynan qūrylǧan ūiymdar men klubtardyŋ bärınen ketetınımdı, şyǧatynymdy rastaimyn. Taǧy da myŋ märte keşırım sūraimyn.
Tüsınıstıkpen qaraŋyzdar, maǧan jūmys jasau kerek, men endı eşkımge jaltaqtamai tek oqyrmanǧa kıtabymdy satyp, jazuymdy damytqym keledı.
Sondai-aq ädebi jinalystar, şaralar, ädebi mazmūndaǧy keşter, Respublikalyq otyrystar, taǧy da basqa bas qosulardyŋ bärınde endı bolmaimyn.
Barşaŋyzǧa alǧys! Menı qoldaǧan barşa Ädebi Ortalarǧa, Klubtarǧa myŋ alǧys aita otyra sızdermen mäŋgıge qoştasamyn!
Endı eşqaida müşe emespın, eşkım emespın, qarapaiym jazuşymyn, saudagermın! Oqyrman jüregınde bolsam jetedı…” dedı Älihan Jaqsylyq.
Aita ketsek, Älihan Jaqsylyq qazaq ädebietıne jaŋalyq bolyp kelgen jas jazuşy. “Notr-damda qūlşylyq etu kerek pe?”, “Afrikadan Aliaskaǧa”, “Eskı vokzaldyŋ jolauşylary” romandarynyŋ, “Alty qūrlyq”, “Tört mūhit” hikaiattar jinaǧynyŋ avtory. Ūlybritaniianyŋ “Alty būǧy” ädebi syilyǧyn jeŋıp alǧan. “Daryn” memlekettık jastar syilyǧynyŋ laureaty. Şyǧarmalary aǧylşyn, türık tılderıne audarylyp basyp şyǧarylǧan.
Eske salaiyq, būǧan deiın Älihan Jaqsylyq belgılı aqyn, aitys jürgızuşısı Jürsın Ermanǧa nazyn äleumettık jelıde jetkızgen edı.
Jürsın Erman aqyn Mūhtar Niiazovqa bergen sūhbatynda bır kezderı aitys sahnasynda öner körsetken keiın prozaǧa bet būrǧan Älihan Jaqsylyqty tılge tiek etken.
“Qazırgı jastar taiyz suda jürgen qaiyq siiaqty. Köŋıl könşıtpeidı. Qoldan jasaǧan qaiǧy qasıretterı bar. Sony aitady. Jyn-şaitan sony jazady. Älihan Jaqsylyq degen jıgıt boldy ǧoi bızde. Sony äuelde älpeştep edık. Sonyŋ jolyna tüsıp kettı. Osyndai jastar köbeiıp kettı. Bıreudıŋ jolyn keseiın degenım joq.Ömırdıŋ aqiqatyn jazu kerek. Jyn-şaitan ınjıldı jazǧandar tolyp jatyr. Işımızge tüspeidı”, – degen edı Jürsın Erman.
Osydan keiın Älihan Jaqsylyq Jürsın Ermanǧa renışın jasyrmai, äleumettık jelıdegı paraqşasynda aǧynan jaryldy.
"Qoldan jasalǧan qaiǧy qasıretter jazady" degen sözın tüsınbedım. Men şyǧarmada eşqaşan özım jaily, özımnıŋ jeke basym turaly jazyp körmeppın. Jürsın Erman atamyzdyŋ nenı meŋzep, qai şyǧarmam jaily aityp otyrǧanyn bılmedım… Ata! Men bäzbıreuler qūsap eŋırep jylap, qoldan taǧdyr jasap jürgen joqpyn. Düniede bar zatty jazyp, kıtabymdy satyp jaiyma jürmın. Şaitanǧa erdı deitındei bır jerde bırdeŋe ıstep otyrǧanymdy kördıŋız be?”- deidı Älihan Jaqsylyq.
