Prezıdent Qasym-Jomart Toqaev Qazaqstannyń halyq jazýshysy, Memlekettik syılyqtyń laýreaty, qazaq ádebıetiniń asa kórnekti ókili, qabyrǵaly qalamger Muhtar Maǵaýındi 80 jasqa tolǵan mereıtoıymen quttyqtap, izgi tilegin arnap, jedelhat joldady.
Bul týraly Prezıdenttiń baspasóz hatshysy Berik Ýálı habarlady.
Siz kórnekti jazýshy ári zerdeli zertteýshi retinde tól ádebıetimizdiń damýyna zor úles qostyńyz. Qalamyńyzdan týǵan ár shyǵarmańyzda ulttyq rýh pen eldik múdde aıqyn kórinis tapty. Handyq dáýirdegi aqyn-jyraýlarymyzdyń mol murasyn jańǵyrtqan "Qobyz saryny" atty ǵylymı eńbegińiz sóz óneriniń tuǵyryn odan ári bıiktete tústi. Áıgili "Alasapyran" romany búginde ádebıetimiz ben tarıhymyzdyń qymbat qazynasyna aınaldy. Tartymdy týyndylaryńyz arqyly qalyń oqyrmannyń ystyq yqylasyna bólenip kelesiz, – dedi Memleket basshysy.
Sonymen qatar, "Ultty uıystyrý jáne táýelsizdigimizdi nyǵaıtý jolyndaǵy eseli eńbegińiz – óskeleń urpaq úshin úlgi-ónege. Árdaıym mereıińiz ústem bolsyn! Sizge zor densaýlyq, otbasyńyzǵa baq-bereke jáne shyǵarmashylyq tabys tileımin!" – delingen jedelhatta.
