جاس جازۋشى ءاليحان جاقسىلىق ادەبي ۇيىمداردان تۇبەگەيلى كەتەتىنىن مالىمدەدى. بۇل تۋرالى ول Facebook پاراقشاسىندا جازدى, دەپ حابارلايدى “ادىرنا”.
جازۋشىنىڭ ايتۋىنشا، ول ەندى بايگەلەر مەن ماراپاتتارعا ءۇمىت ارتپايدى، تەك جازۋ جانە نارىقپەن اينالىسۋدى ماقسات تۇتادى.
“كۇرت بۇرىلىس جاسايتىن ۋاقىتىم كەلىپتى. سەزدىم… كوپتەگەن ادەبي توپقا، ادەبي ۇيىمدارعا، كلۋبتارعا مۇشە ەدىم. سان مارتە كەشىرىم سۇراي وتىرىپ مەن سىزدەرمەن قوشتاساتىنىمدى ايتقىم كەلەدى.
مەن ءۇشىن كەرەمەت تاجىريبە بولدى، ەرەكشە قولداۋعا يە بولدىم. بىراق وزىمە سىرت كوزبەن قاراسام اعا بۋىننىڭ، ۇلكەن بۋىننىڭ ىزىمەن كەتىپ بارا جاتىر ەكەنمىن. نە ىستەۋ كەرەك؟ ەندىگى شارۋام، ەندىگى جۇمىسىم تەك جازۋ جانە نارىقپەن ىستەس بولۋ. وقىرمان قاۋىممەن جۇمىس جاساۋ. ادەبي ورتالاردىڭ ماقساتى سىيلىققا، ماراپاتقا، وردەنگە ۇسىنۋعا ارنالعانداي. مەن ەندى بايگەلەر مەن كونكۋرستاردى، ستيپەنديالار مەن گرانتتاردى اڭدىمايمىن دەپ شەشتىم. تاعى دا مىڭ مارتە كەشىرىم سۇرايمىن”، دەپ جازدى ءجازۋشى.
سونداي-اق، ول ەندى تەك جازۋشى جانە وقىرمان دەگەن ۇستانىممەن ءومىر سۇرەتىنىن ايتتى.
“جازۋشىلار وداعىنان، سونداي-اق بارلىق ادەبيەتكە قاتىستى، مينيسترلىك تاراپىنان قۇرىلعان ۇيىمدار مەن كلۋبتاردىڭ بارىنەن كەتەتىنىمدى، شىعاتىنىمدى راستايمىن. تاعى دا مىڭ مارتە كەشىرىم سۇرايمىن.
تۇسىنىستىكپەن قاراڭىزدار، ماعان جۇمىس جاساۋ كەرەك، مەن ەندى ەشكىمگە جالتاقتاماي تەك وقىرمانعا كىتابىمدى ساتىپ، جازۋىمدى دامىتقىم كەلەدى.
سونداي-اق ادەبي جينالىستار، شارالار، ادەبي مازمۇنداعى كەشتەر، رەسپۋبليكالىق وتىرىستار، تاعى دا باسقا باس قوسۋلاردىڭ بارىندە ەندى بولمايمىن.
بارشاڭىزعا العىس! مەنى قولداعان بارشا ادەبي ورتالارعا، كلۋبتارعا مىڭ العىس ايتا وتىرا سىزدەرمەن ماڭگىگە قوشتاسامىن!
ەندى ەشقايدا مۇشە ەمەسپىن، ەشكىم ەمەسپىن، قاراپايىم جازۋشىمىن، ساۋداگەرمىن! وقىرمان جۇرەگىندە بولسام جەتەدى…” دەدى ءاليحان جاقسىلىق.
ايتا كەتسەك، ءاليحان جاقسىلىق قازاق ادەبيەتىنە جاڭالىق بولىپ كەلگەن جاس جازۋشى. “نوتر-دامدا قۇلشىلىق ەتۋ كەرەك پە؟”، “افريكادان الياسكاعا”، “ەسكى ۆوكزالدىڭ جولاۋشىلارى” روماندارىنىڭ، “التى قۇرلىق”، ء“تورت مۇحيت” حيكاياتتار جيناعىنىڭ اۆتورى. ۇلىبريتانيانىڭ “التى بۇعى” ادەبي سىيلىعىن جەڭىپ العان. “دارىن” مەملەكەتتىك جاستار سىيلىعىنىڭ لاۋرەاتى. شىعارمالارى اعىلشىن، تۇرىك تىلدەرىنە اۋدارىلىپ باسىپ شىعارىلعان.
ەسكە سالايىق، بۇعان دەيىن ءاليحان جاقسىلىق بەلگىلى اقىن، ايتىس جۇرگىزۋشىسى ءجۇرسىن ەرمانعا نازىن الەۋمەتتىك جەلىدە جەتكىزگەن ەدى.
ءجۇرسىن ەرمان اقىن مۇحتار نيازوۆقا بەرگەن سۇحباتىندا ءبىر كەزدەرى ايتىس ساحناسىندا ونەر كورسەتكەن كەيىن پروزاعا بەت بۇرعان ءاليحان جاقسىلىقتى تىلگە تيەك ەتكەن.
“قازىرگى جاستار تايىز سۋدا جۇرگەن قايىق سياقتى. كوڭىل كونشىتپەيدى. قولدان جاساعان قايعى قاسىرەتتەرى بار. سونى ايتادى. جىن-شايتان سونى جازادى. ءاليحان جاقسىلىق دەگەن جىگىت بولدى عوي بىزدە. سونى اۋەلدە الپەشتەپ ەدىك. سونىڭ جولىنا ءتۇسىپ كەتتى. وسىنداي جاستار كوبەيىپ كەتتى. بىرەۋدىڭ جولىن كەسەيىن دەگەنىم جوق.ءومىردىڭ اقيقاتىن جازۋ كەرەك. جىن-شايتان ءىنجىلدى جازعاندار تولىپ جاتىر. ىشىمىزگە تۇسپەيدى”، – دەگەن ەدى ءجۇرسىن ەرمان.
وسىدان كەيىن ءاليحان جاقسىلىق ءجۇرسىن ەرمانعا رەنىشىن جاسىرماي، الەۋمەتتىك جەلىدەگى پاراقشاسىندا اعىنان جارىلدى.
"قولدان جاسالعان قايعى قاسىرەتتەر جازادى" دەگەن ءسوزىن تۇسىنبەدىم. مەن شىعارمادا ەشقاشان ءوزىم جايلى، ءوزىمنىڭ جەكە باسىم تۋرالى جازىپ كورمەپپىن. ءجۇرسىن ەرمان اتامىزدىڭ نەنى مەڭزەپ، قاي شىعارمام جايلى ايتىپ وتىرعانىن بىلمەدىم… اتا! مەن بازبىرەۋلەر قۇساپ ەڭىرەپ جىلاپ، قولدان تاعدىر جاساپ جۇرگەن جوقپىن. دۇنيەدە بار زاتتى جازىپ، كىتابىمدى ساتىپ جايىما ءجۇرمىن. شايتانعا ەردى دەيتىندەي ءبىر جەردە بىردەڭە ىستەپ وتىرعانىمدى كوردىڭىز بە؟”- دەيدى ءاليحان جاقسىلىق.
