Bügın Qazyǧūrt hikmetterın qazaqqa paş etken jazuşy, memleket jäne qoǧam qairatkerı Qalaubek Tūrsynqūlovtyŋ tuǧanyna - 90 jyl.
Ol 1934 jyly 25 nauryzda Oŋtüstık Qazaqstan oblysynyŋ Qazyǧūrt audanyndaǧy Şarbūlaq auylynda düniege kelgen.
1953–1957 jj. N.V.Gogol atyndaǧy Qyzylorda pedagogikalyq institutynda oqyp, orys tılı men ädebietı mamandyǧyn aldy.
1957–1959 jj. özı oqyǧan Lenin atyndaǧy orta mektepte mūǧalım, oqu ısınıŋ meŋgeruşısı qyzmetterın atqardy.
1959–1961 jj. Qazaqstan LKJO Qaratas audandyq komitetınıŋ bırınşı hatşysy, 1961–1963 jj. Oŋtüstık Qazaqstan ölkelık komsomol komitetınıŋ bırınşı hatşysy, 1966–1969 jj. Qazaqstan LKJO Ortalyq Komitetınıŋ hatşysy qyzmetın atqarady.
1969–1972 jj. Qazaq KSR Baspa, poligrafiia jäne kıtap saudasy ısterı jönındegı memlekettık komitetı töraǧasynyŋ orynbasary, 1972 jyldan Qazaqstan Jazuşylar odaǧy basqarmasynyŋ ūiymdastyru jönındegı hatşysy, 1992–1997 jj. Memlekettık teleradio kompaniiasy töraǧasynyŋ orynbasary, Qazaqstan Jazuşylar odaǧy basqarmasy Töraǧasynyŋ orynbasary sekıldı jauapty jūmystar atqardy.
Alǧaşqy şyǧarmalaryn eluınşı jyldardyŋ ekınşı jartysynda jazdy. «Qalken Şarbolatūly» degen atpen «Käpırzada» pesasy, äŋgıme, povesterı baspasözde jaryq kördı. Alǧaşqy äŋgımeler men povester jinaǧy «Alysqa tartqan jol» 1969 jyly şyqty. «Arman azaby» pesasyn, «Esıŋde me sol bır kez», «Hal qalai, joldas hatşy», «Keşıkken hat», «Andy-Qaraǧyz» povesterın, «Poliar şeŋberınıŋ maŋynda», «Olar oralǧan joq», «Sardana men qyzǧaldaq», «Qazyǧūrt: aŋyz ben aqiqat» sekıldı roman-esseler jazdy.
K.Iаşennıŋ pesalaryn, R.Faizidıŋ «Ainalaiyn atyŋnan» romanyn, Ǧ.Guliamnyŋ «Taşkenttıkter» romanyn, İ.S.Turgenevtıŋ «Beibaq», S.Danilovtyŋ «Mangary» povesterın, L.N.Tolstoidyŋ äŋgımelerın, jäne basqa da jazuşylardyŋ şyǧarmalaryn audardy. Jekelegen povesterı orys, ukrain, belorus, cheh, özbek, täjık, iakut, tatar, başqūrt, armian, t.b. tılderge audarylǧan. Özbek tılınde 3 kıtaby, saha tılınde 3 kıtaby, Mäskeu baspalarynan 3 kıtaby jaryq körgen.
Ekı ret «Qūrmet Belgısı» ordenımen, «Eŋbektegı erlıgı üşın» medalımen, ekı ret Qazaq KSR Joǧarǧy Keŋesınıŋ Qūrmet Gramotasymen marapattalǧan. Saha Respublikasynyŋ eŋbek sıŋırgen qairatkerı. Saha Respublikasy Memlekettık syilyǧy men Erlik Eristin atyndaǧy ädebi syilyǧynyŋ, Qazaqstan Jazuşylar odaǧynyŋ S.Seifullin atyndaǧy syilyǧynyŋ iegerı.
Qazyǧūrtty qaster tūtqan jazuşy 2009 jyly dünieden öttı.
