Búgin Qazyǵurt hıkmetterin qazaqqa pash etken jazýshy, memleket jáne qoǵam qaıratkeri Qalaýbek Tursynqulovtyń týǵanyna - 90 jyl.
Ol 1934 jyly 25 naýryzda Ońtústik Qazaqstan oblysynyń Qazyǵurt aýdanyndaǵy Sharbulaq aýylynda dúnıege kelgen.
1953–1957 jj. N.V.Gogol atyndaǵy Qyzylorda pedagogıkalyq ınstıtýtynda oqyp, orys tili men ádebıeti mamandyǵyn aldy.
1957–1959 jj. ózi oqyǵan Lenın atyndaǵy orta mektepte muǵalim, oqý isiniń meńgerýshisi qyzmetterin atqardy.
1959–1961 jj. Qazaqstan LKJO Qaratas aýdandyq komıtetiniń birinshi hatshysy, 1961–1963 jj. Ońtústik Qazaqstan ólkelik komsomol komıtetiniń birinshi hatshysy, 1966–1969 jj. Qazaqstan LKJO Ortalyq Komıtetiniń hatshysy qyzmetin atqarady.
1969–1972 jj. Qazaq KSR Baspa, polıgrafııa jáne kitap saýdasy isteri jónindegi memlekettik komıteti tóraǵasynyń orynbasary, 1972 jyldan Qazaqstan Jazýshylar odaǵy basqarmasynyń uıymdastyrý jónindegi hatshysy, 1992–1997 jj. Memlekettik teleradıo kompanııasy tóraǵasynyń orynbasary, Qazaqstan Jazýshylar odaǵy basqarmasy Tóraǵasynyń orynbasary sekildi jaýapty jumystar atqardy.
Alǵashqy shyǵarmalaryn elýinshi jyldardyń ekinshi jartysynda jazdy. «Qalken Sharbolatuly» degen atpen «Kápirzada» pesasy, áńgime, povesteri baspasózde jaryq kórdi. Alǵashqy áńgimeler men povester jınaǵy «Alysqa tartqan jol» 1969 jyly shyqty. «Arman azaby» pesasyn, «Esińde me sol bir kez», «Hal qalaı, joldas hatshy», «Keshikken hat», «Andy-Qaraǵyz» povesterin, «Polıar sheńberiniń mańynda», «Olar oralǵan joq», «Sardana men qyzǵaldaq», «Qazyǵurt: ańyz ben aqıqat» sekildi roman-esseler jazdy.
K.Iashenniń pesalaryn, R.Faızıdiń «Aınalaıyn atyńnan» romanyn, Ǵ.Gýlıamnyń «Tashkenttikter» romanyn, I.S.Týrgenevtiń «Beıbaq», S.Danılovtyń «Mangary» povesterin, L.N.Tolstoıdyń áńgimelerin, jáne basqa da jazýshylardyń shyǵarmalaryn aýdardy. Jekelegen povesteri orys, ýkraın, belorýs, cheh, ózbek, tájik, ıakýt, tatar, bashqurt, armıan, t.b. tilderge aýdarylǵan. Ózbek tilinde 3 kitaby, saha tilinde 3 kitaby, Máskeý baspalarynan 3 kitaby jaryq kórgen.
Eki ret «Qurmet Belgisi» ordenimen, «Eńbektegi erligi úshin» medalimen, eki ret Qazaq KSR Joǵarǵy Keńesiniń Qurmet Gramotasymen marapattalǵan. Saha Respýblıkasynyń eńbek sińirgen qaıratkeri. Saha Respýblıkasy Memlekettik syılyǵy men Erlık Erıstın atyndaǵy ádebı syılyǵynyń, Qazaqstan Jazýshylar odaǵynyń S.Seıfýllın atyndaǵy syılyǵynyń ıegeri.
Qazyǵurtty qaster tutqan jazýshy 2009 jyly dúnıeden ótti.
