Bügın taŋnan qazynaly qariiamyz, akademik Töregeldı Şarmanov atamyzdyŋ ömırden ozǧanyn estıp, qatty köŋıl-küiımız tüsıp qaldy. Bızdıŋ “Adyrna” ūlttyq portalynyŋ şynaiy tılektesı, janaşyry edı. Aqsaqal ünemı jaqsy sözın aityp, qoldap otyratyn. Dıni aǧymdarǧa qatysty Prezidentke arnalǧan aşyq hatymyzdy oqyp, özı qol qoiyp qana qoimai, iutub arnamyzǧa älgı hatty qoldap sūhbat berıp edı. Mūndai batyl sūhbat beru üşın de jürek kerek.
Aqsaqaldyŋ osydan-aq elge degen janaşyrlyǧyn sezuge bolady. Taǧamtanu akademiiasyn qūryp, ony ūzaq jyldar boiy basqaryp kelgen atamyzdan talai sūhbat jasadyq. Qazaqta ol kısıdei dūrys tamaqtanudy jüielı nasihattaǧan eşkım joq bolar. Fast-fudtar qazır jastardyŋ, balalardyŋ qalypty ömırıne ainalyp barady. Al ol kısı bolsa, tabiǧi ūlttyq taǧamdardy jatpai-tūrmai därıpteitın edı.
Jaqynda Gauhar Qonysbaeva esımdı biologpen sūhbattasqan edım. Sonyŋ aituynşa, ūlttyq taǧamdardy bızdıŋ asqazan eş qiyndyqsyz qorytady eken. Öitkenı ata-babalarymyzdan kele jatqan gendık aqparat soǧan mümkındık beredı. Al jaŋa taǧamdardy, äsırese fast-fud tärızdı himiialyq qospalary mol asty qorytuǧa asqazanymyz ülken energiia jūmsaidy eken. Būl degenımız - boiynda jetkılıktı quaty joq, äljuaz, densaulyǧy naşar ūrpaq qalyptasady degen söz.
Osydan şamamen 15 jyldai būryn qymyztanuşy Zūlqarnai Seiıtovty, taǧamtanuşy Töregeldı Şarmanovty, etnograf Qajytai Iliiasty Ūzynaǧaşta özım ūiymdastyrǧan qymyzmūryndyqqa alyp bardym. Kiız üiler tıgılgen, dombyramen än aitylǧan, ūlttyq taǧamdar dastarhanǧa jaiylǧan keremet şara öttı. Qyz quu oinap, altybaqan tepken jastar da qymyzmūryndyqtyŋ körkı boldy. Is-şaraǧa äbden riza bolǧan käsıpker, etnograf Ötemıs Mahanov maǧan düiım eldıŋ közınşe jylqy atady.
Sol şarada nebır ǧajap kısılermen dastarhandas bolǧan ekenbız. Solardyŋ ışınde älgı joǧaryda aty atalǧan üş kısınıŋ orny tıptı erekşe edı. Bıraq sol kısılerdı köbırek fotoǧa tüsırıp, äŋgımelerın jazyp alu oiymyzǧa kelmeptı. Balalyq, şalalyq qoi. Bır kem dünie…
Baqūl bolyŋyz, Töre ata! Sızdıŋ bolaşaq ūrpaq üşın jasaǧan eŋbekterıŋız eşqaşan ūmytylmaidy!
Arman Äubäkır,
"Adyrna" ūlttyq portalynyŋ negızın qalauşy
Ūqsas jaŋalyqtar
