Almatyda 26 mamyrda Qazaq taǵamtaný akademııasynyń prezıdenti, Eńbek Eri, akademık Tóregeldi Sharmanovty aqtyq saparǵa shyǵaryp saldy. Akademık aqsaqal 25 mamyrda qaıtys bolǵan edi. Marqummen qoshtasý rásimi Almaty qalasynda S. Asfendııarov atyndaǵy Qazaq ulttyq medıına ýnıversıtetinde ótti. Ol Feısbýk jelisindegi sońǵy jazbasynda ómirdiń ótkinshi ekenin eske alyp, adamzat balasynyń máńgilik sapar ústinde ekenin aıtady.
94 jasqa qaraǵan shaǵynda baqıǵa kóshken Tóregeldi aqsaqal áleýmettik jelide de belsendi bolatyn. Onyń, ásirese, koronavırýs pandemııasy kezinde jeli arqyly aıtqan aqyl-keńesterin kópshilik umytpaǵan bolar. Keıin de óziniń túıgen oı-paıymdaryn ortaǵa salyp júretin. Feısbýk betindegi paraqshasynda aqsaqaldyń sońǵy jazbasy 28 aqpanda tirkelipti. Sol jazbany oqyp otyryp qaıran qalasyń. Aqsaqal ómir týraly tolǵanyp, baqıdy eske alady. «Adam balasynyń ózine belgilengen ýaqyt – ómiri» jaıynda, «aspandaǵy kóp juldyzǵa aınalýy» týraly aıtady. Sońynda máńgilik saparmen túıindeıdi. Osy birer aýyz jazbasynyń ózinde ómirdiń mánin beınelep bere salǵandaı áser qaldyrady. Tómende sol jazbany usynyp otyrmyz.
Ár adamnyń ómiri bir salynǵan samal áýendeı, aıtylǵan adýyn jyrdaı, kúmbirlegen kúmis kúıdeı, syzdyqtap bastalyp, tolqyndaı ıirimdenip, býyrqanyp, qyran qustaı qalyqtap, ashyq aspan astynda kún men aıdyń nuryna shomylyp, álemge únin estirtip, Táńirdiń peshenege jazýymen taıtalas-tartys jeteginde júrgende synaptaı syrǵyp ótetin, eshkimniń ýysynda máńgi qalmaıtyn, ár kóńilde arman bolyp uıalap, baqıǵa attanatyn bir tylsym dúnıe. Adam Ata men Haýa Ana zamanynan beri qanshama dáýir dúbirlep ótkenimen, adam janynyń qupııasy jumbaq kúıinde qala bermek.
Adam balasy ózine belgilengen ýaqyt - ómirin súrip, ónerin kórsetip, qaıtadan aspandaǵy kóp juldyzǵa aınalatyndaı, aınalmaly tylsym dúnıedegi bir qonaq tárizdi. Eshbir janǵa ómirge kelýiniń syry jaıly túsinik berilmegen, boıyna bitken kúsh-qýaty, jiger-daryny, qany men qasıetine saı jer betindegi ózine daıyndalǵan rólin somdap, tek ózine arnalǵan syı-syıapatyn, qýanysh-baqytyn ıemdenip, taýqymeti men qııametin arqalap, toqtaýdy bilmeıtin ýaqyt dıirmenine túsip kete baratyn jalpy adamzat balasynyń ǵumyry máńgilik sapar ústinde dese bolar.
Toregeldy Sharmanov
