بۇگىن تاڭنان قازىنالى قاريامىز، اكادەميك Tورەگەلدى شارمانوۆ اتامىزدىڭ ومىردەن وزعانىن ەستىپ، قاتتى كوڭىل-كۇيىمىز ءتۇسىپ قالدى. ءبىزدىڭ “ادىرنا” ۇلتتىق پورتالىنىڭ شىنايى تىلەكتەسى، جاناشىرى ەدى. اقساقال ۇنەمى جاقسى ءسوزىن ايتىپ، قولداپ وتىراتىن. ءدىني اعىمدارعا قاتىستى پرەزيدەنتكە ارنالعان اشىق حاتىمىزدى وقىپ، ءوزى قول قويىپ قانا قويماي، يۋتۋب ارنامىزعا الگى حاتتى قولداپ سۇحبات بەرىپ ەدى. مۇنداي باتىل سۇحبات بەرۋ ءۇشىن دە جۇرەك كەرەك.
اقساقالدىڭ وسىدان-اق ەلگە دەگەن جاناشىرلىعىن سەزۋگە بولادى. تاعامتانۋ اكادەمياسىن قۇرىپ، ونى ۇزاق جىلدار بويى باسقارىپ كەلگەن اتامىزدان تالاي سۇحبات جاسادىق. قازاقتا ول كىسىدەي دۇرىس تاماقتانۋدى جۇيەلى ناسيحاتتاعان ەشكىم جوق بولار. فاست-فۋدتار قازىر جاستاردىڭ، بالالاردىڭ قالىپتى ومىرىنە اينالىپ بارادى. ال ول كىسى بولسا، تابيعي ۇلتتىق تاعامداردى جاتپاي-تۇرماي دارىپتەيتىن ەدى.
جاقىندا گاۋھار قونىسباەۆا ەسىمدى بيولوگپەن سۇحباتتاسقان ەدىم. سونىڭ ايتۋىنشا، ۇلتتىق تاعامداردى ءبىزدىڭ اسقازان ەش قيىندىقسىز قورىتادى ەكەن. ويتكەنى اتا-بابالارىمىزدان كەلە جاتقان گەندىك اقپارات سوعان مۇمكىندىك بەرەدى. ال جاڭا تاعامداردى، اسىرەسە فاست-فۋد ءتارىزدى حيميالىق قوسپالارى مول استى قورىتۋعا اسقازانىمىز ۇلكەن ەنەرگيا جۇمسايدى ەكەن. بۇل دەگەنىمىز - بويىندا جەتكىلىكتى قۋاتى جوق، ءالجۋاز، دەنساۋلىعى ناشار ۇرپاق قالىپتاسادى دەگەن ءسوز.
وسىدان شامامەن 15 جىلداي بۇرىن قىمىزتانۋشى زۇلقارناي سەيىتوۆتى، تاعامتانۋشى تورەگەلدى شارمانوۆتى، ەتنوگراف قاجىتاي ءىلياستى ۇزىناعاشتا ءوزىم ۇيىمداستىرعان قىمىزمۇرىندىققا الىپ باردىم. كيىز ۇيلەر تىگىلگەن، دومبىرامەن ءان ايتىلعان، ۇلتتىق تاعامدار داستارحانعا جايىلعان كەرەمەت شارا ءوتتى. قىز قۋ ويناپ، التىباقان تەپكەن جاستار دا قىمىزمۇرىندىقتىڭ كوركى بولدى. ءىس-شاراعا ابدەن ريزا بولعان كاسىپكەر، ەتنوگراف وتەمىس ماحانوۆ ماعان ءدۇيىم ەلدىڭ كوزىنشە جىلقى اتادى.
سول شارادا نەبىر عاجاپ كىسىلەرمەن داستارحانداس بولعان ەكەنبىز. سولاردىڭ ىشىندە الگى جوعارىدا اتى اتالعان ءۇش كىسىنىڭ ورنى ءتىپتى ەرەكشە ەدى. بىراق سول كىسىلەردى كوبىرەك فوتوعا ءتۇسىرىپ، اڭگىمەلەرىن جازىپ الۋ ويىمىزعا كەلمەپتى. بالالىق، شالالىق قوي. ءبىر كەم دۇنيە…
باقۇل بولىڭىز، تورە اتا! ءسىزدىڭ بولاشاق ۇرپاق ءۇشىن جاساعان ەڭبەكتەرىڭىز ەشقاشان ۇمىتىلمايدى!
ارمان اۋباكىر،
"ادىرنا" ۇلتتىق پورتالىنىڭ نەگىزىن قالاۋشى
