Belgili jazýshy «Qurmet» ordeniniń, sondaı-aq «Eńbektegi erligi úshin» medaliniń ıegeri Medeý Sárseke 88 jasynda dúnıeden ótti. Jazýshynyń qazasy jaıly aqyn Dáýletkereı Kápuly áleýmettik jelidegi paraqshasynda jazdy, dep habarlaıdy “Adyrna” ulttyq portaly.
«Medeý Sárseke aǵamyz da myna jaryq jalǵannan kóshken eken. Aldynan jarylqasyn», - dep jazdy Dáýletkereı Kápuly.
Medeý Sárseke Semeı oblysy, burynǵy Abyraly aýdanyna qarasty Qaınar aýylynda 1936 jyly 2 qańtarda dúnıege kelgen.
Eńbek jolyn «Lenınshil jas» gazetinen bastaǵan. Ol munda 1958-59 jyldarda ádebı qyzmetker, bólim meńgerýshisi bolyp eńbek etken.
Injener qalamger tól ádebıette óndiris taqyrybynyń jańa beleske kóterilýine de aıryqsha úles qosty.
«Ǵajaıyp sáýle» (1959), «Kórinbestiń kóleńkesi» (1960), «Jetinshi tolqyn» (1964), «Ot jáne atom» (1965) povesteri jas jetkinshekterge arnalǵan. Óndiris adamdary jaıly «Jeti jyldyqtyń jigitteri» ocherkter kitaby (1961), «Qaz qaıtqanda» (1968), «Aıshyqty mezet» (1969) derekti povesteri jarııalandy.
«Sátbaev», «Ebineı Bóketov» (2005) atty derekti ǵumyrnamalaryn (1980, 1989), «Shyǵys hıkaıasy» pesasyn (1971), «Jańǵyryq» (1979), «Kómbe» (1985) romandaryn jazdy. A.Belıaevtiń «Qos mekendi adam» romanyn qazaq tiline aýdarǵan.
Memleket basshysy jazýshynyń otbasy men jaqyn týystaryna kóńil aıtý jedelhatyn joldady.
“Medeý Sapauly kemeńger jazýshy retinde talǵamy joǵary oqyrmannyń yqylasyna bólendi. Qazaq ádebıetindegi fantastıka janrynyń súrleýin salǵan qalamger ǵylymnyń múmkindigin órnekti sózben kestelep jetkize bildi. Sońyna baı rýhanı jáne ádebı mura qaldyrǵan Medeý Sapaulynyń jarqyn beınesi umytylmaıdy. Marqumnyń ımany salamat, jany jánnatta bolsyn”, – dep jazylǵan Qasym-Jomart Kemelulynyń jedelhatynda.
