Qazaqstandyq tanymal jazýshy, dramatýrg, senarıst Ákim Tarazı 92 jasqa qaraǵan shaǵynda ómirden ótti. Qaraly habardy aqyn Baýyrjan Qaraǵyzuly áleýmettik jelide jazdy,dep habarlaıdy “Adyrna” ulttyq portaly.
Ákim Úrtaıuly Áshimov (Ákim Tarazı) 1933 jyly 9 qyrkúıekte Almaty qalasynda dúnıege kelgen.
Ákim Tarazıdiń «Tasjarǵan», «Qorqaý juldyz», «Sher», «Qııanat», «Mustafa Shoqaı», «Moskva – Balasaz» romandary, «Aýyl shetindegi úı», «Táj», «Mahabbat jyry», «Kók aspanda qyraǵy kóz bar», t.b. áńgime-esseleri men povesteri, «Joly bolǵysh jigit» pesalar jınaǵy jaryq kórgen. Sondaı-aq 2023 jyly mamyr aıynda qalamgerdiń 12 tomdyq jınaǵynyń tusaýkeser rásimi ótken bolatyn.
Ákim Tarazıdiń senarııleri boıynsha túsirilgen «Tulpardyń izi», «Arman – ataman», «Qarash-Qarash oqıǵasy», «Mustafa Shoqaı», «Qyzjylaǵan» fılmderi qazaq kınosynyń «altyn qoryna» endi.
«Kúlmeıtin komedııa», «Jaqsy kisi», «Joly bolǵysh jigit», «Aqyn, perishte, mahabbat», «Indet», «Mahambet», «Laıner», «Úkili juldyz», «Qyz mahabbaty» jáne ózge de dramatýrgııalyq shyǵarmalary elimizdiń teatr sahnalarynda qoıyldy. Jazýshynyń kóptegen týyndylary orys, qytaı, polıak, bolgar jáne aǵylshyn tilderine aýdarylǵan.
Ákim Tarazı N.Ia. Bıchýrınniń «Ejelgi ýaqytta Orta Azııada ómir súrgen halyqtar týraly málimetter jınaǵy» («Sobranıe svedenıı o narodah, obıtavshıh v Sredneı Azıı v drevnıe vremena») jáne «Shyńǵys áýletinen shyqqan alǵashqy tórt hannyń tarıhy» («Istorııa pervyh chetyreh hanov ız doma Chıngızova») atty tarıhı ǵylymı-zertteý eńbekterin, sondaı-aq, F. Rableniń «Gargantıýa jáne Pantagrıýel» romanyn qazaq tiline tárjimalaǵan.
1994 jyly «Qurmet» ordenimen marapattaldy, 1997 jyly «Qazaqstannyń eńbek sińirgen qaıratkeri» ataǵyn aldy, 2002 jyly Qazaqstan Memlekettik syılyǵynyń laýreaty atandy. 2011 jyly Praga qalasynda Fran Kafka atyndaǵy halyqaralyq ádebı syılyǵymen marapattaldy. Sol jyly Anglııada Á. Tarazıdiń «Qorqaý juldyz» romany aǵylshyn tilinde jaryq kórdi. 2015 jyly «Otan» ordenimen marapattalǵan. 2021 jyly óner jáne ádebıet salasyndaǵy jetistikteri úshin Qazaqstan Respýblıkasynyń joǵary dárejeli úzdik nagradasy – «Qazaqstannyń Eńbek Eri» ataǵynyń ıegeri atandy.
