بەلگىلى جازۋشى «قۇرمەت» وردەنىنىڭ، سونداي-اق «ەڭبەكتەگى ەرلىگى ءۇشىن» مەدالىنىڭ يەگەرى مەدەۋ سارسەكە 88 جاسىندا دۇنيەدەن ءوتتى. جازۋشىنىڭ قازاسى جايلى اقىن داۋلەتكەرەي كاپۇلى الەۋمەتتىك جەلىدەگى پاراقشاسىندا جازدى، دەپ حابارلايدى “ادىرنا” ۇلتتىق پورتالى.
«مەدەۋ سارسەكە اعامىز دا مىنا جارىق جالعاننان كوشكەن ەكەن. الدىنان جارىلقاسىن»، - دەپ جازدى داۋلەتكەرەي كاپۇلى.
مەدەۋ سارسەكە سەمەي وبلىسى، بۇرىنعى ابىرالى اۋدانىنا قاراستى قاينار اۋىلىندا 1936 جىلى 2 قاڭتاردا دۇنيەگە كەلگەن.
ەڭبەك جولىن «لەنينشىل جاس» گازەتىنەن باستاعان. ول مۇندا 1958-59 جىلداردا ادەبي قىزمەتكەر، ءبولىم مەڭگەرۋشىسى بولىپ ەڭبەك ەتكەن.
ينجەنەر قالامگەر ءتول ادەبيەتتە ءوندىرىس تاقىرىبىنىڭ جاڭا بەلەسكە كوتەرىلۋىنە دە ايرىقشا ۇلەس قوستى.
«عاجايىپ ساۋلە» (1959), «كورىنبەستىڭ كولەڭكەسى» (1960), «جەتىنشى تولقىن» (1964), «وت جانە اتوم» (1965) پوۆەستەرى جاس جەتكىنشەكتەرگە ارنالعان. ءوندىرىس ادامدارى جايلى «جەتى جىلدىقتىڭ جىگىتتەرى» وچەركتەر كىتابى (1961), «قاز قايتقاندا» (1968), «ايشىقتى مەزەت» (1969) دەرەكتى پوۆەستەرى جاريالاندى.
«ساتباەۆ»، «ەبىنەي بوكەتوۆ» (2005) اتتى دەرەكتى عۇمىرنامالارىن (1980, 1989), «شىعىس حيكاياسى» پەساسىن (1971), «جاڭعىرىق» (1979), «كومبە» (1985) روماندارىن جازدى. ا.بەلياەۆتىڭ «قوس مەكەندى ادام» رومانىن قازاق تىلىنە اۋدارعان.
مەملەكەت باسشىسى جازۋشىنىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى.
“مەدەۋ ساپاۇلى كەمەڭگەر جازۋشى رەتىندە تالعامى جوعارى وقىرماننىڭ ىقىلاسىنا بولەندى. قازاق ادەبيەتىندەگى فانتاستيكا جانرىنىڭ سۇرلەۋىن سالعان قالامگەر عىلىمنىڭ مۇمكىندىگىن ورنەكتى سوزبەن كەستەلەپ جەتكىزە ءبىلدى. سوڭىنا باي رۋحاني جانە ادەبي مۇرا قالدىرعان مەدەۋ ساپاۇلىنىڭ جارقىن بەينەسى ۇمىتىلمايدى. مارقۇمنىڭ يمانى سالامات، جانى ءجانناتتا بولسىن”، – دەپ جازىلعان قاسىم-جومارت كەمەلۇلىنىڭ جەدەلحاتىندا.
