Qazaqstanda balamasy joq alǧaşqy «qamqor SOS» sifrlyq moduldık jedel medisinalyq kömek punktı Qonaev qalasynda ıske qosyldy. Nysan halyq köp şoǧyrlanatyn Qapşaǧai jaǧajaiy aumaǧynda ornalasqan jäne tūrǧyndar men turisterge şūǧyl jaǧdaida alǧaşqy medisinalyq kömektı jedel aluǧa mümkındık beredı. Syrqattanǧan nemese zardap şekken azamat moduldık punktke kelıp, arnaiy SOS batyrmasy arqyly jedel medisinalyq järdem stansiiasynyŋ dispetcherımen bırden bailanysa alady. Medisina qyzmetkerı qaşyqtan moduldı aşyp, jedel järdem brigadasy kelgenge deiın alǧaşqy kömek körsetu boiynşa nūsqaulyq beredı.
Kölemı 2×2,5 metr bolatyn modul täulık boiy jūmys ısteidı jäne tötenşe jaǧdailarda jedel äreket etuge arnalǧan. Onyŋ ışınde alǧaşqy medisinalyq kömek körsetuge qajettı därı-därmekter men zamanaui jabdyqtar ornalastyrylǧan. Atap aitqanda, defibrilliator, jaralardy alǧaşqy hirurgiialyq öŋdeuge arnalǧan sterildı biks, jedel koronarlyq sindrom kezınde qoldanylatyn medisinalyq jinaq, brezent körpe jäne tot baspaityn bolattan jasalǧan kuşetka bar.
Punkt üzdıksız internetpen, 360 gradus syrtqy beinebaqylau kamerasymen, SOS dabyl jüiesımen, qaşyqtan basqarylatyn telemedisina keşenımen, aqparattyq displeimen jäne ışkı beinekameralarmen jabdyqtalǧan. Dispetcher beine jäne audiobailanys arqyly nauqastyŋ jaǧdaiyn baǧalap, jedel järdem brigadasy kelgenge deiın alǧaşqy kömek körsetu boiynşa nūsqaular beredı. Sondai-aq punkttegı medisinalyq jabdyqtar men därı-därmekterdı paidalanu tärtıbın tüsındıredı.
Moduldıŋ syrtqy qaptamasy joǧary berıktıgımen erekşelenetın HPL-panelder men tot baspaityn bolattan jasalǧan. Būl onyŋ ärtürlı klimattyq jaǧdailarǧa tözımdılıgın jäne ūzaq merzım qyzmet etuın qamtamasyz etedı. Almaty oblysy Densaulyq saqtau basqarmasynyŋ basşysy Erjan Süleimenovtıŋ aituynşa, joba öŋırdegı şūǧyl medisinalyq kömektıŋ qoljetımdılıgı men sapasyn arttyruǧa baǧyttalǧan.
«Bır moduldık punkt täulıgıne şamamen 50 adamǧa deiın alǧaşqy medisinalyq kömek pen keŋes beru qyzmetın körsete alady. Qajet bolǧan jaǧdaida būl körsetkış joǧary boluy mümkın. Bız tūrǧyndarǧa şūǧyl medisinalyq kömektı qoljetımdı etıp qana qoimai, sifrlyq tehnologiialardy engızu arqyly qyzmet körsetu sapasyn jaŋa deŋgeige köterıp otyrmyz. Aita keterlıgı – mūndai formattaǧy moduldık jedel medisinalyq kömek punktterı Qazaqstanda alǧaş ret ıske qosylyp otyr»*, – dedı Erjan Süleimenov.
Joba aiasynda jyl soŋyna deiın Almaty oblysynyŋ turistık jäne rekreasiialyq aimaqtarynda barlyǧy 11 sifrlyq moduldık jedel medisinalyq kömek punktın ornatu josparlanǧan. Olar Qonaev qalasy men Qapşaǧai jaǧalauynda, «Türgen» tau şaŋǧysy kurortynda, «Oi-Qaragai Lesnaya Skazka» Mountain Resort-ta, «Aqbūlaq» halyqaralyq turistık ortalyǧynda, «Han Täŋırı» halyqaralyq alpinistık lagerınde, «Arasan» şipajai-kurorttyq aimaǧynda, sondai-aq «Şaryn», «Ile-Alatauy», «Kölsai kölderı» jäne «Altyn-Emel» ūlttyq parkterı men «Taŋbaly» memlekettık qoryq-mūrajaiy aumaǧynda ornalastyrylady. Ärbır punkt belgılı bır turistık nysanǧa bekıtılıp, sol aumaqtaǧy tūrǧyndar men keluşılerge tūraqty qyzmet körsetedı.
«Turistık oryndarda demalyp jürgen azamat oqystan auyr jaraqat alsa, nemese qan qysymy köterılu, kün ötu, üsık şalu siiaqty jaǧdailarǧa tap bolsa, osyndai medisinalyq modulge kırıp, medisinalyq qyzmetkerdıŋ kömegıne onlain jügıne alady. Joba tötenşe jaǧdai turaly jedel habar beruge, medisina mamandarymen dereu bailanys ornatuǧa jäne jedel järdem kelgenge deiın qajettı kömektı ūiymdastyruǧa da mümkındık beredı», – dedı Almaty oblysy Densaulyq saqtau basqarmasynyŋ basşysy Erjan Süleimenov.
Jobany Almaty oblysynyŋ äkımdıgı, oblystyq Densaulyq saqtau basqarmasy jäne Oblystyq jedel medisinalyq järdem stansiiasy bırlesıp jüzege asyruda. Joba halyqqa medisinalyq kömektıŋ qoljetımdılıgın arttyruǧa, turistık aimaqtardaǧy tötenşe jaǧdailarda äreket etu uaqytyn qysqartuǧa jäne öŋırdıŋ densaulyq saqtau salasyna zamanaui sifrlyq tehnologiialardy engızuge baǧyttalǧan.
