Taldaý jáne boljaý ınstıtýtynyń ǵımaratynda múmkindikteri shekteýli azamattardyń quqyqtaryn qorǵaý boıynsha sarapshylyq jumys tobynyń kezekti otyrysy ótti. Kún tártibinde oblys ortalyǵynda Chernobyl AES bolǵan apattyń zardaptaryn joıýǵa qatysqandarǵa arnalǵan eskertkish ornatý jáne oblystaǵy bilim berý uıymdaryn múmkindigi shekteýli azamattardyń qajettilikterine qaraı beıimdeý suraqtary qaraldy.
Otyrysqa sarapshylyq jumys tobynyń músheleri, memlekettik organ ókilderi, oblystyq máslıhattyń depýtaty jáne BAQ jýrnalısteri qatysty.
Alǵash bolyp mádenıet, arhıvter jáne qujattama basqarmasynyń basshysy Azamat Muhamedchınov sóz aldy. Óz sózinde ol eskertkishti ornatý máselesi 2016 jyldan kele jatqanyn jáne alǵashqy bıýdjettik ótinimniń qujattardyń durys rásimdelmeýi saldarynan qabyldanbaǵany týraly málimdedi. Eskertkishti ornatýǵa qajet qarajatty bıznes-uıymdardan jáne alpaýyt ónerkásip oryndarynan jınaý oıy da sátsizdikke ushyrady. Qazirgi tańda barlyq qujattar retke keltirilip, mamyr aıynda ákim orynbasarynyń tóraǵalyǵymen ótetin arnaıy komıssııaǵa shyǵý josparda. Bul komıssııanyń oń sheshimin alǵan jaǵdaıda maýsymda ekonomıka jáne bıýdjettik josparlaý basqarmasyna taǵy bir bıýdjettik ótinimmen shyǵý kózdelip otyr.
Sarapshylyq jumys tobynyń músheleri aıtylǵan aqparatty qabyldap, bul suraqty óz baqylaýynda ustaýǵa sheshim qabyldady. Sonymen qatar «ShQO boıynsha Chernobyl ardagerleri men múgedekteri Odaǵy» QB «ÚMZ» AQ qarjylaı kómek kórsetý týraly hat joldaý tapsyryldy.
Sarapshylyq jumys tobynyń múshesi Irına Lıahovskaıa ShQO Bilim basqarmasynyń ınklıýzıvti bilim berý jobasyn iske asyrý aıasynda oblysymyzda 38 bilim berý uıymyn beıimdeý josparlanýda ekendigin atap ótti. Osy oraıda sarapshylyq top músheleri jáne arnaıy dıplomy bar mamandar atalmysh 38 nysandy aralap, qajetti jumys kólemin anyqtady. Osy jumystyń qorytyndysy boıynsha árbir nysanǵa jeke aqaýly ónim tizimdemesi daıyndaldy. Bul tizimdeme qazirdiń ózinde barlyq nysandardy beıimdeýge qansha qarajat jumsalatynyn anyqtaýǵa múmkindik beredi.
Endigi másele mektep dırektorlarynyń durys tehnıkalyq sıpattama daıyndaýynda. Sarapshylyq jumys tobynyń jetekshisi Olga Kýzovleva óz kezeginde oryndalǵan jumysqa oń baǵasyn berdi. Alaıda, ol, bul jumys barysynda arbadaǵy múgedekterden ózge sanattarynyń muqtajdyqtary eskerilmegendigin tilge tıek etti.
Otyrys qorytyndysy boıynsha bilim basqarmasyna mektep basshylyǵymen tyǵyz baılanysta barlyq sanattaǵy múmkindikteri shekteýli azamattardyń muqtajdyqtaryna beıimdelgen bilim oryndaryn daıarlaýǵa qatysty usynymdar berildi.
