Jambyl oblysynyń ákimi Nurjan Nurjigitov oblys prokýratýrasy janyndaǵy bıznesti qorǵaý jónindegi saraptamalyq keńestiń otyrysyna qatysty.
Jıyn barysynda Nurjan Moldııaruly shaǵyn jáne orta bıznes úshin qarsy mindettemelerdi engizý, olardyń jaýapkershiligin kúsheıtý máselelerine jeke toqtaldy.
- Bıznes qaýymdastyq qoǵamdaǵy turaqtylyq pen tynyshtyqty saqtaýda mańyzdy ról atqarady. Máselen, azyq-túlik baǵasyn retteý máselesin alaıyq. Áleýmettik mańyzy bar azyq-túlik taýarlaryn satý kezinde saýda ústemesin 15 paıyzǵa deıin shekteý jónindegi normalar bekitildi. Biraq, barlyq bıznes sýbektileri bul talapty saqtamaıdy. Ásirese, kóp qabatty úılerdiń aýlalaryndaǵy dúkenderdiń ıesi oıyna kelgen baǵany qoıady. Mundaı bolmaýy tıis. Bul máselede otandyq bıznestiń ortaq ustanymy mańyzdy. Al adal kásipkerler árqashan memlekettiń qoldaýyna ıe bolady, - dedi N.Nurjigitov.
Aǵymdaǵy jyldyń 1 mamyryndaǵy derekterge sáıkes, oblysta jumys istep turǵan shaǵyn jáne orta kásipkerlik sýbektileriniń sany - 76 208. Bul ótken jyldyń tıisti kezeńimen salystyrǵanda 8,5 paıyzǵa artyq. Al 124 myńǵa jýyq adam shaǵyn jáne orta kásipkerlik sýbektilerinde jumys isteıdi. Atap óterligi, bıylǵy jyly "Kásipkerlikti damytýdyń 2021 – 2025 jyldarǵa arnalǵan ulttyq jobasy" aıasynda 13,5 mlrd teńge qarastyrylǵan.
Jalpy, ústimizdegi jyldyń birinshi jarty jyldyǵynda óńirlik kásipkerler palatasyna 140 ótinish kelip túsken. Onyń ishinde qorǵaý jelisi boıynsha - 37 ótinish bolsa, búgingi tańda onyń 11-i oń sheshimin tapqan. Sondaı-aq 15 ótinish berýshige jazbasha túsinikteme berilse, 10 másele qaralý ústinde.
Otyrys barysynda oblys prokýrory Nurǵalym Ábdirov kásipkerlik sýbektileriniń quqyqtaryn qorǵaý prokýratýra organdary qadaǵalaý qyzmetiniń negizgi basym baǵyttarynyń biri ekendigin atap ótti.
- El Prezıdenti Qasym-Jomart Toqaev jyl basynda otandyq bıznes ókilderimen ótken kezdesýinde prokýratýra organdarynyń aldyna birqatar mindetter qoıdy. Sonyń ishinde osy saladaǵy buzýshylyqtarǵa yqpal etetin sebepter men jaǵdaılardy anyqtaý jáne kináli tulǵalardyń is-áreketterine qaǵıdatty baǵa berý. Sonymen qatar, olardyń qyzmetine zańsyz aralasý faktileri boıynsha shuǵyl sharalar qabyldaý, - dedi N.Ábdirov.
Aıta keteıik, jyl basynan beri oblystyq prokýratýra tarapynan kásipkerlik salasyna baılanysty 30 usynys, 23 narazylyq engizilgen. Budan bólek, QR QK-niń 365 babyna saı (zańdy kásipkerlik qyzmetpen aınalysýǵa kedergi keltirý) 1 qylmystyq is boıynsha úkim shyǵarylǵan. Sondaı-aq, jeke kásipkerlik sýbektilerine tekserý júrgizý tártibin buzǵan 3 laýazymdy tulǵa QR ÁQBtK 17 babyna sáıkes ákimshilik jaýapkershilikke tartylǵan. Esepti kezeńde 30 tulǵa tártiptik, 1 tulǵa ákimshilik jaýapkershilikke tartylsa, 1 adam 7 jylǵa bas bostandyǵynan aıyrylǵan. Jalpy, shaǵyn jáne orta bıznes sýbektilerine qatysty 251 zańsyz tekserý tirkelip, prokýratýra organdary 8000-ǵa jýyq kásipkerdiń quqyǵyn qorǵaǵan.
Basqosýda sondaı-aq agroónerkásiptik keshen salasyndaǵy memlekettik satyp alýlar, sýbsıdııalardy bólý, jarnama ornalastyrý jáne salyq zańnamasy, balalar sporty men shyǵarmashylyǵyn damytý úshin memlekettik tapsyrysty jan basyna shaqqandaǵy normatıvtik qarjylandyrýdy engizý kezindegi buzýshylyqtarda nazarǵa alyndy. Ashyq dıalog formatynda ótken otyrys barysynda kásipkerler ózderin tolǵandyrǵan suraqtaryna tushymdy jaýap alyp, týyndaǵan máselerdi sheshý boıynsha usynymdar ázirlendi. Endi barlyq aýdandarda sýbsıdııalardy bólý tetikterin retteý úshin mobıldi toptar jumys isteıtin bolady.
Jıyn sońynda Nurjan Moldııaruly memlekettik jáne quqyq qorǵaý organdarynyń ortaq kúsh-jigeriniń arqasynda bıznesti quqyqtyq qorǵaý júıesi qurylǵanyna toqtalyp, zańsyz áreketterdiń barlyq faktileri anyqtalǵan jaǵdaıda kináli tulǵalar zań aldynda jaýapqa tartylatynyn qadap aıtty.
