جامبىل وبلىسىنىڭ اكىمى نۇرجان نۇرجىگىتوۆ وبلىس پروكۋراتۋراسى جانىنداعى بيزنەستى قورعاۋ جونىندەگى ساراپتامالىق كەڭەستىڭ وتىرىسىنا قاتىستى.
جيىن بارىسىندا نۇرجان مولديارۇلى شاعىن جانە ورتا بيزنەس ءۇشىن قارسى مىندەتتەمەلەردى ەنگىزۋ، ولاردىڭ جاۋاپكەرشىلىگىن كۇشەيتۋ ماسەلەلەرىنە جەكە توقتالدى.
- بيزنەس قاۋىمداستىق قوعامداعى تۇراقتىلىق پەن تىنىشتىقتى ساقتاۋدا ماڭىزدى ءرول اتقارادى. ماسەلەن، ازىق-تۇلىك باعاسىن رەتتەۋ ماسەلەسىن الايىق. الەۋمەتتىك ماڭىزى بار ازىق-تۇلىك تاۋارلارىن ساتۋ كەزىندە ساۋدا ۇستەمەسىن 15 پايىزعا دەيىن شەكتەۋ جونىندەگى نورمالار بەكىتىلدى. بىراق، بارلىق بيزنەس سۋبەكتىلەرى بۇل تالاپتى ساقتامايدى. اسىرەسە، كوپ قاباتتى ۇيلەردىڭ اۋلالارىنداعى دۇكەندەردىڭ يەسى ويىنا كەلگەن باعانى قويادى. مۇنداي بولماۋى ءتيىس. بۇل ماسەلەدە وتاندىق بيزنەستىڭ ورتاق ۇستانىمى ماڭىزدى. ال ادال كاسىپكەرلەر ارقاشان مەملەكەتتىڭ قولداۋىنا يە بولادى، - دەدى ن.نۇرجىگىتوۆ.
اعىمداعى جىلدىڭ 1 مامىرىنداعى دەرەكتەرگە سايكەس، وبلىستا جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى - 76 208. بۇل وتكەن جىلدىڭ ءتيىستى كەزەڭىمەن سالىستىرعاندا 8,5 پايىزعا ارتىق. ال 124 مىڭعا جۋىق ادام شاعىن جانە ورتا كاسىپكەرلىك سۋبەكتىلەرىندە جۇمىس ىستەيدى. اتاپ وتەرلىگى، بيىلعى جىلى "كاسىپكەرلىكتى دامىتۋدىڭ 2021 – 2025 جىلدارعا ارنالعان ۇلتتىق جوباسى" اياسىندا 13,5 ملرد تەڭگە قاراستىرىلعان.
جالپى، ۇستىمىزدەگى جىلدىڭ ءبىرىنشى جارتى جىلدىعىندا وڭىرلىك كاسىپكەرلەر پالاتاسىنا 140 ءوتىنىش كەلىپ تۇسكەن. ونىڭ ىشىندە قورعاۋ جەلىسى بويىنشا - 37 ءوتىنىش بولسا، بۇگىنگى تاڭدا ونىڭ 11-ءى وڭ شەشىمىن تاپقان. سونداي-اق 15 ءوتىنىش بەرۋشىگە جازباشا تۇسىنىكتەمە بەرىلسە، 10 ماسەلە قارالۋ ۇستىندە.
وتىرىس بارىسىندا وبلىس پروكۋرورى نۇرعالىم ءابدىروۆ كاسىپكەرلىك سۋبەكتىلەرىنىڭ قۇقىقتارىن قورعاۋ پروكۋراتۋرا ورگاندارى قاداعالاۋ قىزمەتىنىڭ نەگىزگى باسىم باعىتتارىنىڭ ءبىرى ەكەندىگىن اتاپ ءوتتى.
- ەل پرەزيدەنتى قاسىم-جومارت توقاەۆ جىل باسىندا وتاندىق بيزنەس وكىلدەرىمەن وتكەن كەزدەسۋىندە پروكۋراتۋرا ورگاندارىنىڭ الدىنا بىرقاتار مىندەتتەر قويدى. سونىڭ ىشىندە وسى سالاداعى بۇزۋشىلىقتارعا ىقپال ەتەتىن سەبەپتەر مەن جاعدايلاردى انىقتاۋ جانە كىنالى تۇلعالاردىڭ ءىس-ارەكەتتەرىنە قاعيداتتى باعا بەرۋ. سونىمەن قاتار، ولاردىڭ قىزمەتىنە زاڭسىز ارالاسۋ فاكتىلەرى بويىنشا شۇعىل شارالار قابىلداۋ، - دەدى ن.ءابدىروۆ.
ايتا كەتەيىك، جىل باسىنان بەرى وبلىستىق پروكۋراتۋرا تاراپىنان كاسىپكەرلىك سالاسىنا بايلانىستى 30 ۇسىنىس، 23 نارازىلىق ەنگىزىلگەن. بۇدان بولەك، قر قك-ءنىڭ 365 بابىنا ساي (زاڭدى كاسىپكەرلىك قىزمەتپەن اينالىسۋعا كەدەرگى كەلتىرۋ) 1 قىلمىستىق ءىس بويىنشا ۇكىم شىعارىلعان. سونداي-اق، جەكە كاسىپكەرلىك سۋبەكتىلەرىنە تەكسەرۋ جۇرگىزۋ ءتارتىبىن بۇزعان 3 لاۋازىمدى تۇلعا قر اقبتك 17 بابىنا سايكەس اكىمشىلىك جاۋاپكەرشىلىككە تارتىلعان. ەسەپتى كەزەڭدە 30 تۇلعا تارتىپتىك، 1 تۇلعا اكىمشىلىك جاۋاپكەرشىلىككە تارتىلسا، 1 ادام 7 جىلعا باس بوستاندىعىنان ايىرىلعان. جالپى، شاعىن جانە ورتا بيزنەس سۋبەكتىلەرىنە قاتىستى 251 زاڭسىز تەكسەرۋ تىركەلىپ، پروكۋراتۋرا ورگاندارى 8000-عا جۋىق كاسىپكەردىڭ قۇقىعىن قورعاعان.
باسقوسۋدا سونداي-اق اگروونەركاسىپتىك كەشەن سالاسىنداعى مەملەكەتتىك ساتىپ الۋلار، سۋبسيديالاردى ءبولۋ، جارناما ورنالاستىرۋ جانە سالىق زاڭناماسى، بالالار سپورتى مەن شىعارماشىلىعىن دامىتۋ ءۇشىن مەملەكەتتىك تاپسىرىستى جان باسىنا شاققانداعى نورماتيۆتىك قارجىلاندىرۋدى ەنگىزۋ كەزىندەگى بۇزۋشىلىقتاردا نازارعا الىندى. اشىق ديالوگ فورماتىندا وتكەن وتىرىس بارىسىندا كاسىپكەرلەر وزدەرىن تولعاندىرعان سۇراقتارىنا تۇشىمدى جاۋاپ الىپ، تۋىنداعان ماسەلەردى شەشۋ بويىنشا ۇسىنىمدار ازىرلەندى. ەندى بارلىق اۋدانداردا سۋبسيديالاردى ءبولۋ تەتىكتەرىن رەتتەۋ ءۇشىن ءموبيلدى توپتار جۇمىس ىستەيتىن بولادى.
جيىن سوڭىندا نۇرجان مولديارۇلى مەملەكەتتىك جانە قۇقىق قورعاۋ ورگاندارىنىڭ ورتاق كۇش-جىگەرىنىڭ ارقاسىندا بيزنەستى قۇقىقتىق قورعاۋ جۇيەسى قۇرىلعانىنا توقتالىپ، زاڭسىز ارەكەتتەردىڭ بارلىق فاكتىلەرى انىقتالعان جاعدايدا كىنالى تۇلعالار زاڭ الدىندا جاۋاپقا تارتىلاتىنىن قاداپ ايتتى.
