Mädeniet jäne aqparat ministrı Arman Qyryqbaev «PARAQTA» onlain kıtaphana platformasynyŋ negızın qalauşylar Kerım Aianqyzy men Erdäulet Qūraldy qabyldady, dep habarlaidy «Adyrna» tılşısı.
Kezdesude otandyq kıtap oqu mädenietın damytu, sifrlyq platformany jetıldıru jäne jastardyŋ kıtapqa qyzyǧuşylyǧyn arttyru mäselelerı talqylandy.
Platforma negızın qalauşylardyŋ aituynşa, ministr olardyŋ «PARAQTA» jobasy turaly jariialanymdarymen tanysyp, arnaiy kezdesuge şaqyrǧan.
Jiynda ministr memleket basşysy Qasym-Jomart Toqaevtyŋ kıtap oqu mädenietın damytu jäne zerdelı ūlt qalyptastyru jönındegı bastamalary aiasynda jüzege asyrylyp jatqan jūmystar turaly baiandaǧan.
Atap aitqanda, ministrlıktıŋ üilestıruımen ötıp jatqan «Kıtap oqityn ūlt» jalpyūlttyq marafonynyŋ nätijelerı tanystyrylǧan. Bügınde reading-nation.kz platformasyna 1,4 millionnan astam adam tırkelgen. Qatysuşylar 842 myŋnan astam kıtap oqyp, oqyǧan şyǧarmalary turaly 50 myŋnan astam beinepıkır jariialaǧan. Kezdesu barysynda Arman Qyryqbaev «PARAQTA» qosymşasynyŋ jūmysymen tanysyp, oqyrmandardyŋ belsendılıgıne qyzyǧuşylyq bıldırgen. Sondai-aq jastardy kıtap oquǧa keŋınen tartu üşın qandai qoldau qajet ekenın sūraǧan.
«PARAQTA» – oqyrmandarǧa kıtapty bastap qana qoimai, soŋyna deiın oqyp şyǧuǧa mümkındık beretın qazaqstandyq platforma. Qazırgı uaqytta jobaǧa 15 186 oqyrman tırkelıp, 1,2 million bet oqylǧan. Al 10 738 kıtap tolyq aiaqtalǧan. Sonymen qatar platforma aiasynda 180 kıtap kluby jūmys ısteidı.
Joba bır jyl ekı aidan berı jūmys ıstep keledı. Alty ai būryn onyŋ saity ıske qosylsa, ekı apta būryn mobildı qosymşasy App Store dükenınde qoljetımdı bolǧan.
Platforma negızın qalauşylardyŋ aituynşa, qazırgı basty qajettılıkterdıŋ bırı – elektrondy kıtap qoryn tolyqtyru. Bügınde qosymşada avtorlyq qūqyq merzımı aiaqtalyp, qoǧamdyq igılıkke ötken 150-ge juyq kıtap tegın ūsynylǧan. Alaida oqyrmandar platformanyŋ özınde oquǧa bolatyn şyǧarmalar sanyn köbeitudı sūraidy.
Osyǧan bailanysty ministrlık kıtap qoryn zaŋdy negızde tolyqtyruǧa qoldau körsetuge uäde bergen. Sonymen qatar oflain kezdesuler men bırlesken ıs-şaralar ötkızuge arnalǧan alaŋ qarastyru mäselesı de talqylanǧan.
Joba avtorlary ministr Arman Qyryqbaevqa jäne ministrlıktıŋ Arhiv, qūjattama jäne kıtap ısı komitetınıŋ töraǧasy Aizada Qūrmanovaǧa bastamaǧa qyzyǧuşylyq tanytyp, qoldau körsetkenı üşın alǧys bıldırdı.
