Qazaq ūlttyq qyzdar pedagogikalyq universitetınıŋ kıtaphanasyna biyl kürdelı jöndeu jasalyp, ūlaǧatty ūstaz Seraly Qanievtyŋ aty berıldı. Jaŋarǧan kıtaphananyŋ resmi aşyluynda QR Ǧylym jäne joǧary bılım ministrı Saiasat Nūrbek söz söiledı.
«Şyn mänınde bügın – aituly kün. Kez kelgen bılım oşaǧynyŋ jüregı – ol kıtaphana. Eŋ joǧary standartta jasalǧan, eŋ myqty elektrondyq, sifrlyq platformalary bar būl Ǧylymi kıtaphana studentter men oqytuşylar, jalpy kıtapsüier qauym üşın bılımderın arttyruǧa baǧyttalǧan myqty ortalyq bolaryna senımım mol», – dedı Qazaqstan Respublikasynyŋ Ǧylym jäne joǧary bılım ministrı Saiasat Nūrbek.
Seraly Qaniūly – Qazaq ūlttyq qyzdar pedagogikalyq universitetınıŋ damuyna ülken üles qosqan ardaqty ūstaz, belgılı ǧalym, fizika-matematika ǧylymdarynyŋ kandidaty, dosent, Qazaq SSR aǧartu ısınıŋ üzdıgı, KSRO Joǧary mektebınıŋ üzdıgı, eŋbek ardagerı. 40 jylǧa juyq Qazaq qyzdar pedagogikalyq institutynda qyzmet etıp, myŋdaǧan şäkırt tärbieledı.
Kıtaphananyŋ saltanatty aşylu räsımıne Almaty qalasynyŋ äkımı Erbolat Dosaev, Qazaq ūlttyq qyzdar pedagogikalyq universitetınıŋ Basqarma Töraǧasy – Rektory Gülmira Qanai jäne Seraly Qaniūlynyŋ jaqyn tuystary da qatysty.
Almaty qalasynyŋ äkımı Erbolat Dosaev būl kıtaphana bılım men mädeniettıŋ naǧyz ortalyǧy ekenın atap öttı. Ūlaǧatty ūstazdyŋ kelını Janat Derbisalina universitet ūjymyna alǧysyn bıldırdı:
«Äkemızge osyndai qūrmet körsetılıp jatqanyna öte quanyştymyz. Ol kısınıŋ esımı universitet qabyrǧasynda, jüregımızde mäŋgılıkke saqtalady».
Is-şara aiasynda QR Ǧylym jäne joǧary bılım ministrı Saiasat Nūrbek Seraly Qanievtyŋ ūly Berık Qanievke kıtaphananyŋ aşyluyna zor üles qosqany üşın Alǧys hat tabystady. Sonymen qatar Qazaq ūlttyq qyzdar pedagogikalyq universitetınıŋ Basqarma Töraǧasy-Rektory Gülmira Qanai da alǧysyn aityp, universitet kıtaphanasyna Seraly Qanievtyŋ aty berılgenı öte maŋyzdy oqiǧa ekenın atap öttı.
Erbolat Dosaev qazırgı studentterge oquda jäne käsıpte joǧary standarttarǧa ūmtyluǧa, öz ısıne adal boluǧa tılek bıldırdı.
«Bügın Qazaq ūlttyq qyzdar pedagogikalyq universitetı men jalpy qalamyz üşın atauly oqiǧa - bız eŋ zamanaui talaptar men älemdık standarttarǧa sai keletın jaŋa kıtaphanany aşamyz. Kıtaphana körnektı ǧalym jäne ūstaz Seraly Qanievtıŋ esımımen atalady. Ol 35 jyl boiy osy universitettıŋ qabyrǧasynda eŋbek ettı, onyŋ bılımımen qanattanǧan studentter elımızdıŋ är öŋırınde jemıstı jūmys jasauda, öz mansaptary men ömırlerınde biık mejelerge qoljetkızude», - dedı öz sözınde Erbolat Dosaev. Kıtaphana ǧimaratyn rekonstruksiialau qazaqstandyq jäne şeteldık säuletşılerdıŋ jobasy boiynşa jäne Seraly Qanievtıŋ ūly – käsıpker Berık Qanievtıŋ qarajaty esebınen jürgızıldı. Kıtaphana ǧimaraty modernizasiialanǧannan soŋ onda erekşe bılım beru qajettılıkterı bar studentterge arnalǧan arnaiy kabinet paida boldy. Ǧimaratty qaita qūru jūmystary jürgızıldı, būl kıtaphananyŋ jalpy aumaǧyn 2195 şarşy metrge, al otyratyn oryndardyŋ sanyn 550-ge deiın ūlǧaituǧa mümkındık berdı. Jaŋa kıtaphana ǧimaratynda mynalar bar: 2 oqu zaly, konferens-zal, Akademiialyq jazu ortalyǧy, oqu aimaǧy, studentterdıŋ toptyq jūmys bölmelerı, 14 jeke oqu kabinasy, relaksasiia bölmesı. Kıtaphananyŋ kıtap qory 1 mln kıtaptan asady.
