Tıldı teketıres pen eregestıŋ qaruyna ainaldyru bızge äbüiır äpermeidı. Būl turaly deputat Ermūrat Bapi Mäjılıstıŋ jalpy otyrysynda konstitusiialyq reforma boiynşa söilegen sözınde aitty, dep habarlaidy «Adyrna» tılşısı.
Ol qaznette soŋǧy alty ai kölemınde sūlbasy jasalǧan konstitusiialyq özgerısterge qatysty syndar köp aitylyp jatqanyn mälımdedı.
«İä, jaŋa Konstitusiianyŋ jobasyna qatysty aitylyp jatqan bıraz syndarly sözdıŋ törkını tılge tırelıp jatyr. Ūlttyq namysy selt etıp oianǧan halyqtyŋ talaby terıs dep, üzıldı-kesıldı kereǧar pıkır aitudyŋ jönı joq. Būl taqyrypty jyly jauyp qoiuǧa taǧy da bolmaityn edı. Bıraq qazaqta «basqa päle – tılden» degen taǧy bır tämsıl bar. Dauyly dülei qazırgı qatqyl halyqaralyq qatynastardyŋ qorşauy men tärtıbı kün saiyn qyryq qūbylǧan geosaiasi älemde bız būl «pälenıŋ» qaterınen saqtana bıluımız kerek. Bız äperbaqan, äumesır äldekımderge bılek küşın bezeitındei el emespız.
Bızde memleketımızdıŋ täuelsızdıgı men jasampaz bolaşaǧy üşın syrttaǧy soqtyqpaly-soqpaqty joldy diplomatiianyŋ demeuımen jäne syrbaz saiasatpen jürıp ötuden basqa alternativa joq! Jalpyhalyqtyq talqylauǧa ūsynylǧan jaŋa Konstitusiia jobasynyŋ jalpy saiasi sipatyn salauatty saralai bılgen adam onyŋ mazmūny men maqsaty memlekettılıktı, qauıpsızdıgımız ben täuelsızdıktıŋ tūraqtylyǧyn küitteitın astarly işarany tüsınse kerektı.
Üles salmaǧy 70 paiyzdan asqan halyq özınıŋ tılın özgege öktemdıkpen emes, sary maiǧa ystyq qasyq batyrǧandai baiyppen taŋa bılu – däl bügın äldeqaida ūtymdy aila bolar edı. Tıldı teketıres pen eregestıŋ qaruyna ainaldyru bızge äbüiır äpermeidı. Özınıŋ tılın öktemdıkpen tyqpalaǧan imansyz ideialar paida bolǧan zamanda, esermen egesu – estınıŋ ısı bolmaidy»,- dedı Bapi.
Mäjılıs deputaty psevdo-patriottardyŋ äreketın de synǧa aldy.
«Bügıngı äleumettık jelılerdegı dabyraǧa qiqu qosyp, qoǧamdy qajetsız tolquǧa şaqyryp jürgen jekelegen jelıkpe psevdo-patriottardyŋ qylyǧyna ışıŋ aşidy. Bır ǧana «KTK» mūnai qūbyryndaǧy apat eldı qandai qarjylyq qauıpke tap qylaryn bastan keşıre tūra, bız äldekımge ses körsetındei qai artymyzǧa senemız?
«Sauda soǧysy» men älem kartasyn bölıstergk sala bastaǧan qaterler qaulaǧan zamanda, Qazaqstan men onyŋ syrtyndaǧy realdy baǧalai, baǧamdai almaǧan saiasi körsoqyrlyq bızdı oryny tolmas ökınışterge tap qyluy mümkın. Äldebıreuler taǧy da front aşamyz dep bızge ses körsetıp, syrtqy dünie teŋselıp tūrǧan kezde, bız öz qolymyzben ışkı düniemızdı dürbeleŋge saluǧa qaqymyz joq»,-dedı ol.
Qazaqstannyŋ jaŋa Konstitusiiasynda advokaturanyŋ märtebesı turaly norma qosymşa pysyqtalatyn bolady
