Astanada Qazaqstan Respublikasy Prezidentınıŋ ışkı saiasat mäselelerı jäne kommunikasiialar jönındegı kömekşısı Arman Qyryqbaevtyŋ qala tūrǧyndarymen interaktivtı formatta kezdesuı öttı.
Şaraǧa jinalǧan qauym arasynda memleket qairatkerlerı, deputattar, Konstitusiialyq komissiia müşelerı, şyǧarmaşylyq jäne jūmysşy mamandyqtardyŋ ökılderı, sondai-aq jastar ūiymdarynyŋ jetekşılerı boldy. Kezdesuge qatysuşylar eldegı konstitusiialyq damudyŋ özektı mäselelerı boiynşa pıkır almasty.
Talqylau barysynda Arman Qyryqbaev Jaŋa Konstitusiia jobasynda üş maŋyzdy qaǧidattyŋ eskerılgenın erekşe atap öttı: ūlttyq müdde men adam qajettılıgıne baǧdarlanu jäne sifrlandyru.
Sonymen qatar, Prezident kömekşısı qoldanystaǧy Konstitusiia men referendumǧa şyǧarylǧan joba arasyndaǧy sabaqtastyqqa da toqtaldy.
«1995 jylǧy Konstitusiia – täuelsızdıgın endı ǧana jariialaǧan jas memlekettıŋ Ata Zaŋy. Al Jaŋa Konstitusiia soŋǧy 35 jyl ışınde jauapty, beibıtsüigış ärı quatty «orta derjava» retınde aiaqqa nyq tūrǧan zamanaui Qazaqstannyŋ basty qūqyqtyq qūjatyna jäne strategiialyq baǧdaryna ainalady», – dedı Arman Qyryqbaev.
Būl pıkırdı «Qazaqstandyq qoǧamdyq damu instituty» KeAQ basqarma töraiymy Jūldyzai Ysqaqova da qoldady: «Bügıngı kündı täuelsızdıgımızdı alǧan 35 jyl būrynǧy kezeŋmen salystyratyn bolsaq, bız mülde basqa memleketke ainalǧanymyzdy köremız. Mūny Konstitusiiadaǧy tūjyrymdardyŋ özınen-aq baiqauǧa bolady».
Arman Qyryqbaevtyŋ aituynşa, konstitusiialyq reforma tek qūqyqtyq normalardy jaŋartumen şektelmeidı, onyŋ mänı äldeqaida tereŋ. Būl reforma Qazaqstanda qoǧamdyq azamattyq instituttyŋ qalyptasuyna negız bolady.
«Jaŋa Konstitusiia – būl bilık te, azamattar da jauapkerşılık arqalaityn memlekettıŋ jaŋa modelıne köşudı bıldıredı», – dedı ol.
Prezident kömekşısınıŋ pıkırınşe, jauapkerşılık tek bilıkke jükteletın bolsa, memleket tiımdı dami almaidy. Jaŋa konstitusiialyq modelde memleket azamattardyŋ qūqyqtaryn kepıldendırıp, zaŋ üstemdıgı men ädılettılıktı qamtamasyz etedı. Al halyq öz kezegınde belsendı azamattyq ūstanym tanytyp, qoǧamdyq ömırge qatysyp, eldıŋ bolaşaǧy üşın jauapkerşılık alady.
«Bilık pen qoǧam arasyndaǧy däl osyndai özara ıs-qimyl modelı arqyly ǧana “Ädılettı Qazaqstan” ideiasynyŋ özegı bolyp tabylatyn negızgı qūndylyqtardy jüzege asyruǧa bolady. Būl qūndylyqtar – qoǧamdyq qūrylymnyŋ ırgetasy bolyp tabylatyn zaŋ üstemdıgı, jauapkerşılık jäne azamattyq ūstanym», – dep tüiındedı Qyryqbaev.
Kezdesude Mäjılıs deputaty Aidos Sarym da söz söilep, elde Jaŋa Konstitusiia jobasy boiynşa keŋ kölemdı tüsındıru jūmystary jürgızılıp jatqanyn atap öttı.
«Bız şynymen de ülken tarihi betbūrys kezeŋınde ömır sürıp jatyrmyz. Mūndai jauapkerşılık är ūrpaqtyŋ maŋdaiyna jazyla bermeidı. Menıŋ pıkırımşe, būl – bızdıŋ buynǧa jüktelgen jauapkerşılık pen ülken qūrmet. Tüptep kelgende bızdıŋ basty mındetımız – egemen eldıŋ erkın azamattarynyŋ laiyqty ömırın qamtamasyz etu. Qazaqstan eşkımmen soǧyspaidy, qaqtyǧystarǧa barmaidy. Bız üşın eŋ bastysy – el bırlıgı», – dedı spiker.
Mäjılıs deputaty B.Bazarbek öz sözın jelıde taraǧan «Prezident bilıgı küşeitıledı-mıs» degen pıkırge jauap beruge arnady.
«Prezidenttıŋ jetı jyldyq ökılettık merzımı jäne qaita sailanu mümkındıgınıŋ bolmauy – basqa elderde älı keŋınen qoldanylmaǧan jaŋaşyldyq. Qazırgı taŋda mūndai norma tek bızdıŋ elde ǧana bar. Negızınde būl bilıktıŋ bır qolǧa şamadan tys şoǧyrlanuyna jäne ony zaŋsyz ielenu qaupıne qarsy öte pärmendı tetık», – dep atap öttı ol.
Sondai-aq, Jaŋa Konstitusiia jobasyna qatysty öz pıkırlerın jurnalist E.Köpjasar, aqyn M.Jūmabai jäne saraptamalyq-taldau qauymdastyǧynyŋ özge de ökılderı, jastar ūiymdarynyŋ köşbasşylary da ortaǧa salyp, konstitusiialyq reformany qoldaityndaryn jetkızdı.
