Qazaqstanda Jaŋa Konstitusiia jobasyna arnalǧan auqymdy aqparattyq-tüsındıru nauqany aiaqtaldy. El boiynşa 23 myŋnan astam kezdesu ötkızıldı, oǧan 5,4 millionnan astam adam qatysty. Tüsındıru jūmystaryna respublikalyq jäne öŋırlık deŋgeidegı 4730 spiker tartyldy.
Is-şaralar eldıŋ barlyq öŋırlerınde – qalalar men auyldyq eldı mekenderde, käsıporyndarda, bılım beru ūiymdarynda jäne qoǧamdyq alaŋdarda öttı. Nauqannyŋ negızgı maqsaty – azamattarǧa Konstitusiia jobasynyŋ negızgı erejelerı turaly jan-jaqty tüsındıru jäne tuyndaǧan sūraqtarǧa jauap beru.
Ärtürlı äleumettık jäne käsıbi toptarmen jūmysqa erekşe köŋıl bölındı. Mysaly, jastar üşın şamamen 1,5 million adamnyŋ qatysuymen 4 900 kezdesu ötkızıldı, al käsıporyndardyŋ eŋbek ūjymdarynda 1,2 million adamnyŋ qatysuymen 4 200 kezdesu öttı.
Nauqandy üilestırudı Jaŋa Konstitusiiany qoldau jönındegı Jalpyūlttyq koalisiia jüzege asyrdy, ol saiasi partiialardy, Parlament pen mäslihat deputattaryn, azamattyq qoǧam ökılderın jäne sarapşylar qauymdastyǧyn bırıktırdı.
«Bızdıŋ mındetımız – adamdardyŋ Konstitusiia jobasymen jan-jaqty tanysuyna, sūraqtar qoiuyna jäne öz pıkırın qalyptastyruyna mümkındık beru. Referendumǧa qatysu ūsynylyp otyrǧan özgerısterdı tüsınu negızınde sanaly boluy maŋyzdy», – dep atap öttı Koalisiia ökılderı.
Kezdesuler barysynda Negızgı zaŋ jobasynyŋ negızgı erejelerı talqylandy – azamattardyŋ qūqyqtary men bostandyqtaryn qorǧau, äleumettık ädılettılık mäselelerı, Parlament pen jergılıktı ökıldı organdardyŋ rölı, sondai-aq memleket pen qoǧamnyŋ ekologiialyq jauapkerşılıgı.
Ūiymdastyruşylardyŋ aituynşa, ötkızılgen nauqan qoǧamnyŋ keŋ qabatyn qamtuǧa jäne azamattardyŋ maŋyzdy memlekettık şeşımdı qabyldau prosesıne sanaly türde qatysuyna jaǧdai jasauǧa mümkındık berdı.
