Almaty qalasyndaǧy Dostyq üiınde elımızdıŋ jaŋa Konstitusiiasynyŋ jobasyn tüsındıruge arnalǧan kezdesu öttı. Jiynǧa belgılı otandyq jazuşylar men şyǧarmaşylyq ziialy qauym ökılderı, qoǧam qairatkerlerı, sondai-aq QR Parlamentı Mäjılısınıŋ deputattary men Konstitusiialyq reforma jönındegı komissiia müşelerı qatysty. Qazaqstan Jazuşylar odaǧynyŋ töraǧasy Mereke Qūlkenov atalǧan joba qoǧamnyŋ müddesın eskeretının atap öttı.
– Bügın bız el üşın asa maŋyzdy mäsele – jaŋa Konstitusiia jobasyn talqylau üşın jinaldyq. Ol halyqpen aşyq dialog barysynda qalyptasyp, qoǧamnyŋ şynaiy müddelerın körsetedı, – dep atap öttı spiker.
Kezdesude Ahmet Baitūrsynūly atyndaǧy Tıl bılımı institutynyŋ direktory Anar Fazyljan da söz söiledı. Ol eldıŋ odan ärı tabysty damuy üşın jaŋa Konstitusiianyŋ qajet ekenın atap öttı.
– Ärine, qoldanystaǧy Negızgı zaŋda barlyq maŋyzdy mäseleler eskerılgen, azamattardyŋ negızgı qūqyqtary men mındetterı bekıtılgen. Alaida älem bır orynda tūrmaidy, sondyqtan Konstitusiia da būl üderısterdı körsetuı tiıs. Sonymen qatar Konstitusiia jobasynyŋ qazaq tılınde äzırlenuı asa maŋyzdy. Sondai-aq onyŋ bügıngı taŋda ärtürlı jastaǧy, mamandyqtaǧy, äleumettık jaǧdaidaǧy adamdar arasynda keŋınen talqylanuynyŋ maŋyzy zor. Būl köp jaitty aŋǧartady, – dedı spiker.
Jalpy, pıkırtalas barysynda konstitusiialyq reformanyŋ negızgı baǧyttary, jaŋa Konstitusiia jobasynda qoǧamǧa, mädenietke jäne şyǧarmaşylyq salaǧa qatysty közdelgen normalar, sondai-aq azamattyq instituttardyŋ rölı men jauapkerşılıgı jönınde mazmūndy pıkır almasu öttı. Qatysuşylar qūqyqtyq reformalardyŋ el damuy üşın strategiialyq maŋyzyn, azamattardyŋ qūqyqtary men bostandyqtaryn keŋeitu qajettıgın, sondai-aq söz bostandyǧy men şyǧarmaşylyq erkındıktı institusionaldyq tūrǧyda nyǧaitudyŋ maŋyzdylyǧyn atap öttı.
Sonymen qatar, şyǧarmaşylyq qauymdastyq ökılderı jaŋa Konstitusiia tek qūqyqtyq qūjat qana emes, qoǧamdyq sanany jaŋǧyrtuǧa, ädıldık pen jauapkerşılık qaǧidattaryn bekıtuge yqpal etetın ruhani negız boluy tiıs ekenın aitty.
Talqylau qorytyndysy boiynşa qatysuşylar jaŋa Negızgı zaŋ jobasynyŋ negızgı baǧyttary men ūsynylǧan reformalardy bırauyzdan qoldaityndaryn bıldırdı.
