Kóktemniń alǵashqy kúnimen tuspa-tus keletin 1 naýryz Alǵys aıtý kúni eń aldymen tynyshtyq pen úndestiktiń, ózara senimdilik pen qurmettiń artýyna negiz bolatyn kún. Bul mereke dostyq pen birliktiń, mádenı san alýandylyqtyń úılesimin dáleldeı túsedi.
Osy mereke aıasynda jas urpaqty izgilikke baýlıtyn ıgi sharalardyń oryn alýy úlken mańyzǵa ıe.
Qazaqstan ınjenerlik-tehnologııalyq ýnıversıtetinde ulttyq qundylyqtardy dáripteýge negizdelgen is-sharalar únemi uıymdastyrylyp turady.
Kúni keshe ótken jastar arasynda patrıottyq rýhty nyǵaıtyp, ultaralyq tatýlyqty aıqyndaıtyn Alǵys aıtý kúnine arnalǵan merekelik shara erekshe sıpat aldy.
Tálimgerler kúnimen ushtasqan jıynda ýnıversıtettiń stýdentter úıindegi turǵyndaryna ustazdar arnaıy daıyndaǵan qazaqtyń birneshe ulttyq taǵamdary usynyldy.
Et asyp, ár qabattaǵy as úılerde dámdi as ázirlenip, ystyq baýyrsaqtar pisirildi. Bul qazaqtyń mol dastarhanyn, keń peıilin dáriptegen úlken shara desek bolady. Tálimgerlerdiń óz stýdentterine qamqorlyq tanytyp, óz qoldarymen taǵam ázirleýi baýyrmaldylyq pen syılastyqty aıǵaqtap turǵandaı.
Ýnıversıtet aýdıtorııalarynda oqytýshylardyń dáristerin tyńdap, teorııalyq bilimderimen sýsyndap júrgen jastar úshin ustazdarynyń otbasylyq meıirimdilik tanytýy alǵys kúninde zor tárbıe. El prezıdenti jastardy eńbekqorlyqqa baýlý máselesin jıi kóterip júr.
Al oqytýshylardyń ýnıversıtet jataqhanalaryna arnaıy baryp, dárishanalarda mamandar daıarlap qana qoımaı, olardy turmystyq-sharýashylyq jumystarǵa qosa baýlýy eńbekqorlyqty jastar boıyna darytýda zor nátıje bermek.
Osy oraıda Qazaqstan ınjenerlik tehnologııalyq-ýnıversıtetiniń rektory Gúlnar Sársenbekova:
«Bilim jolynda óz úıinen jyraq júrgen stýdentter otbasylyq jylýlyq pen qamqorlyqty sezinýi kerek. Bilim ordalary tek sapaly maman daıyndap qana qoımaı, stýdentterdiń boıyna «jumsaq daǵdylardy», jalpyadamzattyq qundylyqtarǵa bastaıtyn ulttyq qundylyqtardy da sińirýimiz qajet» degen pikirin jetkizdi.
Bul jıynda Esepteý tehnıkasy, avtomattandyrý jáne telekommýnıkaııa kafedrasynyń oqytýshylary baýyrsaqtyń erekshe dámdi pisirilý ádisimen bólisse, Ekonomıka jáne Qarjy kafedrasy qamyr ıleýden aldyna jan salmady. Stýdentter de kómek qolyn sozyp, máre-sáre boldy.
Bul kúni ári merekelik kóńil kúı, ári sharýaǵa beıimdelgen shara ótti. Ázirlengen qaı taǵam bolmasyn ystyq yqylas pen mahabbattyń týyndysyndaı bolyp berekeni nyqtaı tústi.
Budan bólek oqytýshy-professorlar qaýymy merekelik basqosýda biri dombyra tartsa, biri gıtarada oınap, bar ónerin ortaǵa saldy. Stýdentter de ózderine degen jylylyqty, meıirimdilikti, qamqorlyqty sezinip jatqandaryn qýana jetkizdi.
«Ata-anamyzdan jyraqta júrsek te , bar meıirimin tógip, bizge arnaıy as daıyndap, meıramda erekshe kóńil bólip jatqan QazITÝ basshylyǵyna, oqytýshylaryma alǵysym sheksiz», - dedi 2 kýrs stýdenti Baqdaýlet Ertýǵan.
Búginde ýnıversıtette ár ult ókilderi bilim alyp jatyr. Óz kezeginde olar qazaq halqynyń qonaqjaılylyǵyna, meıirimdiligine, baýyrmaldylyǵyna alǵystaryn jetkizip jatty.
Ár ult ókilderinen jınalǵan jataqhanada stýdentter bir otbasynyń balalaryndaı tatý ekeni sezilip-aq tur.
Stýdentter úıiniń ár ult ókilderinen jınalǵan turǵyndary dastarhan basynda jınalyp, ózara syrlasyp shúıirkelesip otyrýy – dostyqtyń jarshysyndaı desek bolady.
Óz týǵan úıinen jyraq júrgen stýdentterge ata-analary alańdaýǵa negiz joq ekenin, balalary sapaly bilip alyp qanaı qoımaı, tálimgerlerinen qamqorlyq sezinip, shyn janashyrlarynyń qasynda júrgeni kóńilderine medeý ekenin jasyrmady.
Osy tusta shara barysynda ata-analar da onlaın arqyly baılanysqa shyǵyp, óz alǵystaryn jetkizgenin aıtyp ótýge bolady.
Ata-analar qaýymy «QazITÝ ujymyna úlken alǵysymdy bildiremin, balamyzdy bilim nárimen sýsyndap qana qoımaı, ataýly merekede kóńilderin kóterip, eńbekke baýlyp jatqany qýantady», - dep aıtyp ótti.
Ár ult ókilderinen quralǵan stýdentter tárbıelik mańyzy zor sharany uıymdastyrǵan QazITÝ basshylyǵyna jáne ujymyna ózderiniń alǵys-tilekterin, quttyqtaýlaryn óleń joldarymen jetkizdi. Án aıtyp, kúı tartyp, ultaralyq tatýlyqtyń aıqyn beınesin kórsetti.
Tálimgerler óz kezeginde jastarǵa kásibı, adamı aqyl-keńesterin berip, jastardy tek bilim nárimen ǵana sýsyndatyp qoımaı, qashanda tálimgerlik tanytyp, árkez jandarynan tabylatyn senimdi dostary bolatynyn aıtty.
Joǵary oqý oryndarynda elimizdiń bolashaq mamandary daıarlanyp jatyr.
Olardyń tek kásibı turǵyda mamandanyp qoımaı, adamı qundylyqtardy boılaryna sińirip, izgilik nuryna shomylýyna osyndaı sharalardyń bereri mol bolmaq.
”Adyrna” ulttyq portaly
