كوكتەمنىڭ العاشقى كۇنىمەن تۇسپا-تۇس كەلەتىن 1 ناۋرىز العىس ايتۋ كۇنى ەڭ الدىمەن تىنىشتىق پەن ۇندەستىكتىڭ، ءوزارا سەنىمدىلىك پەن قۇرمەتتىڭ ارتۋىنا نەگىز بولاتىن كۇن. بۇل مەرەكە دوستىق پەن بىرلىكتىڭ، مادەني سان الۋاندىلىقتىڭ ۇيلەسىمىن دالەلدەي تۇسەدى.
وسى مەرەكە اياسىندا جاس ۇرپاقتى ىزگىلىككە باۋليتىن يگى شارالاردىڭ ورىن الۋى ۇلكەن ماڭىزعا يە.
قازاقستان ينجەنەرلىك-تەحنولوگيالىق ۋنيۆەرسيتەتىندە ۇلتتىق قۇندىلىقتاردى دارىپتەۋگە نەگىزدەلگەن ءىس-شارالار ۇنەمى ۇيىمداستىرىلىپ تۇرادى.
كۇنى كەشە وتكەن جاستار اراسىندا پاتريوتتىق رۋحتى نىعايتىپ، ۇلتارالىق تاتۋلىقتى ايقىندايتىن العىس ايتۋ كۇنىنە ارنالعان مەرەكەلىك شارا ەرەكشە سيپات الدى.
تالىمگەرلەر كۇنىمەن ۇشتاسقان جيىندا ۋنيۆەرسيتەتتىڭ ستۋدەنتتەر ۇيىندەگى تۇرعىندارىنا ۇستازدار ارنايى دايىنداعان قازاقتىڭ بىرنەشە ۇلتتىق تاعامدارى ۇسىنىلدى.
ەت اسىپ، ءار قاباتتاعى اس ۇيلەردە ءدامدى اس ازىرلەنىپ، ىستىق باۋىرساقتار ءپىسىرىلدى. بۇل قازاقتىڭ مول داستارحانىن، كەڭ پەيىلىن دارىپتەگەن ۇلكەن شارا دەسەك بولادى. تالىمگەرلەردىڭ ءوز ستۋدەنتتەرىنە قامقورلىق تانىتىپ، ءوز قولدارىمەن تاعام ازىرلەۋى باۋىرمالدىلىق پەن سىيلاستىقتى ايعاقتاپ تۇرعانداي.
ۋنيۆەرسيتەت اۋديتوريالارىندا وقىتۋشىلاردىڭ دارىستەرىن تىڭداپ، تەوريالىق بىلىمدەرىمەن سۋسىنداپ جۇرگەن جاستار ءۇشىن ۇستازدارىنىڭ وتباسىلىق مەيىرىمدىلىك تانىتۋى العىس كۇنىندە زور تاربيە. ەل پرەزيدەنتى جاستاردى ەڭبەكقورلىققا باۋلۋ ماسەلەسىن ءجيى كوتەرىپ ءجۇر.
ال وقىتۋشىلاردىڭ ۋنيۆەرسيتەت جاتاقحانالارىنا ارنايى بارىپ، ءدارىسحانالاردا ماماندار دايارلاپ قانا قويماي، ولاردى تۇرمىستىق-شارۋاشىلىق جۇمىستارعا قوسا باۋلۋى ەڭبەكقورلىقتى جاستار بويىنا دارىتۋدا زور ناتيجە بەرمەك.
وسى ورايدا قازاقستان ينجەنەرلىك تەحنولوگيالىق-ۋنيۆەرسيتەتىنىڭ رەكتورى گۇلنار سارسەنبەكوۆا:
«ءبىلىم جولىندا ءوز ۇيىنەن جىراق جۇرگەن ستۋدەنتتەر وتباسىلىق جىلۋلىق پەن قامقورلىقتى سەزىنۋى كەرەك. ءبىلىم وردالارى تەك ساپالى مامان دايىنداپ قانا قويماي، ستۋدەنتتەردىڭ بويىنا «جۇمساق داعدىلاردى»، جالپىادامزاتتىق قۇندىلىقتارعا باستايتىن ۇلتتىق قۇندىلىقتاردى دا ءسىڭىرۋىمىز قاجەت» دەگەن پىكىرىن جەتكىزدى.
بۇل جيىندا ەسەپتەۋ تەحنيكاسى، اۆتوماتتاندىرۋ جانە تەلەكوممۋنيكاتسيا كافەدراسىنىڭ وقىتۋشىلارى باۋىرساقتىڭ ەرەكشە ءدامدى ءپىسىرىلۋ ادىسىمەن بولىسسە، ەكونوميكا جانە قارجى كافەدراسى قامىر يلەۋدەن الدىنا جان سالمادى. ستۋدەنتتەر دە كومەك قولىن سوزىپ، مارە-سارە بولدى.
بۇل كۇنى ءارى مەرەكەلىك كوڭىل كۇي، ءارى شارۋاعا بەيىمدەلگەن شارا ءوتتى. ازىرلەنگەن قاي تاعام بولماسىن ىستىق ىقىلاس پەن ماحابباتتىڭ تۋىندىسىنداي بولىپ بەرەكەنى نىقتاي ءتۇستى.
بۇدان بولەك وقىتۋشى-پروفەسسورلار قاۋىمى مەرەكەلىك باسقوسۋدا ءبىرى دومبىرا تارتسا، ءبىرى گيتارادا ويناپ، بار ونەرىن ورتاعا سالدى. ستۋدەنتتەر دە وزدەرىنە دەگەن جىلىلىقتى، مەيىرىمدىلىكتى، قامقورلىقتى سەزىنىپ جاتقاندارىن قۋانا جەتكىزدى.
«اتا-انامىزدان جىراقتا جۇرسەك تە ، بار مەيىرىمىن توگىپ، بىزگە ارنايى اس دايىنداپ، مەيرامدا ەرەكشە كوڭىل ءبولىپ جاتقان قازيتۋ باسشىلىعىنا، وقىتۋشىلارىما العىسىم شەكسىز»، - دەدى 2 كۋرس ستۋدەنتى باقداۋلەت ەرتۋعان.
بۇگىندە ۋنيۆەرسيتەتتە ءار ۇلت وكىلدەرى ءبىلىم الىپ جاتىر. ءوز كەزەگىندە ولار قازاق حالقىنىڭ قوناقجايلىلىعىنا، مەيىرىمدىلىگىنە، باۋىرمالدىلىعىنا العىستارىن جەتكىزىپ جاتتى.
ءار ۇلت وكىلدەرىنەن جينالعان جاتاقحانادا ستۋدەنتتەر ءبىر وتباسىنىڭ بالالارىنداي تاتۋ ەكەنى سەزىلىپ-اق تۇر.
ستۋدەنتتەر ءۇيىنىڭ ءار ۇلت وكىلدەرىنەن جينالعان تۇرعىندارى داستارحان باسىندا جينالىپ، ءوزارا سىرلاسىپ شۇيىركەلەسىپ وتىرۋى – دوستىقتىڭ جارشىسىنداي دەسەك بولادى.
ءوز تۋعان ۇيىنەن جىراق جۇرگەن ستۋدەنتتەرگە اتا-انالارى الاڭداۋعا نەگىز جوق ەكەنىن، بالالارى ساپالى ءبىلىپ الىپ قاناي قويماي، تالىمگەرلەرىنەن قامقورلىق سەزىنىپ، شىن جاناشىرلارىنىڭ قاسىندا جۇرگەنى كوڭىلدەرىنە مەدەۋ ەكەنىن جاسىرمادى.
وسى تۇستا شارا بارىسىندا اتا-انالار دا ونلاين ارقىلى بايلانىسقا شىعىپ، ءوز العىستارىن جەتكىزگەنىن ايتىپ وتۋگە بولادى.
اتا-انالار قاۋىمى «قازيتۋ ۇجىمىنا ۇلكەن العىسىمدى بىلدىرەمىن، بالامىزدى ءبىلىم نارىمەن سۋسىنداپ قانا قويماي، اتاۋلى مەرەكەدە كوڭىلدەرىن كوتەرىپ، ەڭبەككە باۋلىپ جاتقانى قۋانتادى»، - دەپ ايتىپ ءوتتى.
ءار ۇلت وكىلدەرىنەن قۇرالعان ستۋدەنتتەر تاربيەلىك ماڭىزى زور شارانى ۇيىمداستىرعان قازيتۋ باسشىلىعىنا جانە ۇجىمىنا وزدەرىنىڭ العىس-تىلەكتەرىن، قۇتتىقتاۋلارىن ولەڭ جولدارىمەن جەتكىزدى. ءان ايتىپ، كۇي تارتىپ، ۇلتارالىق تاتۋلىقتىڭ ايقىن بەينەسىن كورسەتتى.
تالىمگەرلەر ءوز كەزەگىندە جاستارعا كاسىبي، ادامي اقىل-كەڭەستەرىن بەرىپ، جاستاردى تەك ءبىلىم نارىمەن عانا سۋسىنداتىپ قويماي، قاشاندا تالىمگەرلىك تانىتىپ، اركەز جاندارىنان تابىلاتىن سەنىمدى دوستارى بولاتىنىن ايتتى.
جوعارى وقۋ ورىندارىندا ەلىمىزدىڭ بولاشاق ماماندارى دايارلانىپ جاتىر.
ولاردىڭ تەك كاسىبي تۇرعىدا ماماندانىپ قويماي، ادامي قۇندىلىقتاردى بويلارىنا ءسىڭىرىپ، ىزگىلىك نۇرىنا شومىلۋىنا وسىنداي شارالاردىڭ بەرەرى مول بولماق.
”ادىرنا” ۇلتتىق پورتالى
