ەلباسى ەل تىزگىنىن قولىنا العان العاشقى كۇننەن-اق باستاپ، قيىن كەزەڭدە ەلىمىزدىڭ ءبىلىم سالاسىنا كوپ كوڭىل ءبولدى. ءماجىلىسىنىڭ دەپۋتاتى، Nur Otan پارتياسى فراكتسيانىڭ مۇشەسى جۇلدىز سۇلەيمەنوۆا نۇرسۇلتان نازارباەۆتىڭ «تاۋەلسىزدىك تاعىلىمى» اتتى ماقالاسىنا وراي وسىنداي پىكىر ءبىلدىردى.
جۇلدىز سۇلەيمەنوۆانىڭ ايتۋىنشا، ەلباسى ماقالاسىندا ەلىمىزدىڭ تاۋەلسىزدىگىنىڭ قاستەرلى ەكەندىگىن، اياۋلى ەكەندىگىن جانە ونى كوزىمىزدىڭ قاراشىعىنداي قورعاۋ – ەڭ باستى مىندەتىمىز ەكەنىن تاريحتىڭ تولعانىستى ساتتەرىمەن جەتكىزگەن.
«بارلىعىمىز تاۋەلسىزدىك العان 90-شى جىلداردىڭ كۋاگەرىمىز، مەن 1991 جىلى مەكتەپ تابالدىرىعىن اتتاعان وقۋشى ەدىم. تاۋەلسىزدىكپەن ءوسىپ، ەگەمەندىكپەن ەر جەتتىك. قانداي قيىن كەزەڭدى ارتقا تاستاپ، بۇگىندە قاي سالا بولماسىن اۋىز تولتىرىپ ايتارلىق جەتىستىكتەرىمىز بار. وسى جەتىستىكتەردىڭ ارتىندا ەلباسىمىزدىڭ حالقىمىز ءۇشىن جاساعان ماڭىزدى مەملەكەتتىك شەشىمدەرى ءارى باتىل رەفورمالارى تۇر.
ەلباسى ەل تىزگىنىن قولىنا العان العاشقى كۇننەن-اق باستاپ، قيىن كەزەڭدە ەلىمىزدىڭ ءبىلىم سالاسىنا كوپ كوڭىل ءبولدى. سونىڭ ارقاسىندا ءبىلىم جانە عىلىم ەلىمىزدە جاڭاشا قارقىنمەن دامىدى. مەملەكەتىمىزدەگى ءبىلىم سالاسىنا قاتىستى ساياسات ءاۋ باستان دۇرىس جۇرگىزىلدى. تۇعىرلى تاۋەلسىزدىگىمىزدىڭ العاشقى كەزەڭىنەن ەلباسى مەملەكەت دامۋىنىڭ نەگىزگى مەجەسى ءارى تەمىرقازىعى رەتىندە – ءبىلىم مەن عىلىم سالاسىن ايقىندادى. ۇنەمى جاڭاشىلدىققا ۇمتىلدى، سويتە تۇرا ءوز مەنتاليتەتىمىزدى، بىرەگەي بولمىسىمىزدى جوعالتپاۋعا كوپ نازار اۋداردى»، - دەدى دەپۋتات.
